اقتوبەدە ارحەولوگتارى بيىل الكەي مارعۇلان اتىنداعى ارحەولوگيالىق ينستيتۋتىمەن, رەسەي عىلىم اكادەمياسىنىڭ شىعىستانۋ ينستيتۋتىمەن بىرلەسە ءۇش قازبا, ەكى عىلىمي زەرتتەۋ جۇمىسىن جۇرگىزدى. اقتوبە قالاسى ماڭىنداعى بەكقۇل بابا اۋىلىندا جەكە تۇرعىن ءۇي قۇرىلىسىن جۇرگىزۋگە رۇقسات بەرگەن كەزدە جەرگىلىكتى ماماندار دابىل قاعىپ, الدىمەن زەرتتەۋ جۇرگىزۋگە كەلىستى. ءدال سول جەردەن ەرتە تەمىر داۋىرىنە جاتاتىن التىن سىرعا تابىلدى.
ء«بىز ءۇشىن تابىلعان زاتتىڭ ءبارى قۇندى. دەگەنمەن, بيىل ارحەولوگتار كوپتەن كۇتكەن زاتتى تاپتى. ول - ەرتە تەمىر داۋىرىنە جاتاتىن التىن بۇيىم. ءدال وسىعان ۇقساس اشەكەي بۇرىن اقتوبە وبلىسى, مارتوك اۋدانىنان 80-جىلدارى تابىلعان بولاتىن. ول كەزدە ارحەولوگ مير قابىرباەۆ قازبا جۇمىستارىن جۇرگىزجى. ءبىز كەيىن ىزدەدىك, وسى كۇندى كۇتتىك»,- دەدى ءا. مارعۇلان اتىنداعى ارحەولوگيا ينستيتۋتىنىڭ باتىس قازاقستان ايماعى بويىنشا وكىلى, ارحەولوگ ارمان بيسەنباەۆ.
ارحەولوگتار ءۇشىن ءالى دە ەسكەرتكىشتەردى قورعاۋ, قازبا جۇمىستارى جۇرگىزىلمەگەن ايماقتى امان الىپ قالۋ قيىنعا سوعىپ تۇر. سەبەبى, مۇناي-گاز كومپانيالارى قازبا جۇمىستارى كەزىندە ارحەولوگتاردى شاقىرمايدى, قاجەت كەزدە ايىپپۇل تولەيدى. ال ايىپپۇل ءىرى مۇناي كومپانيالارى ءۇشىن تىم تومەن. ولار جۇمىستى توقتاتپاۋ ءۇشىن كوبىنە ايىپپۇل تولەپ, جاۋاپكەرشىلىكتەن اتتاپ وتەدى.
«ەسكەرتكىشتەردى جويىپ جاتىر, ءبىز تەك قالعانىن زەرتتەۋگە شىعامىز. اقتوبە وبلىسى ەسكەرتكىشتەردى جويۋ ءتىزىمى بويىنشا الدىڭعى ورىندا تۇر. زاڭ بار, بىراق ول ەسكەرتكىشتەردى ساقتاي المايدى»,- دەدى ارمان بيسەنباەۆ.
