جيىندى ءسوز سويلەپ اشقان اقمولا وبلىستىق ىشكى ساياسات باسقارماسى باسشىسىنىڭ مىندەتىن اتقارۋشى ارحات ايبابين «رۋحاني جاڭعىرۋ» باعدارلاماسى بويىنشا وڭىرىمىزدە 107 جوبا قولعا الىنعاندىعىن اتاپ كورسەتتى. سولاردىڭ ەڭ باستىلارى بۋراباي, قورعالجىن جانە زەرەندى اۋداندارىندا شوعىرلانعاندىعىن ايتا كەتكەن ءجون. «بۋراباي اۋدانى بويىنشا «ابىلاي حان الاڭى» مەموريالدىق ستەللاسى, ەرەيمەنتاۋ اۋدانىندا «قۇماي» ارحەولوگيالىق كەشەنى سالىندى جانە دە قورعالجىن اۋدانىندا كوپتەگەن شارۋالار اتقارىلۋدا. سونىمەن قاتار ءبىلىم, مادەنيەت سالاسىندا كوپتەگەن شارالار نازاردان تىس قالماعان. وبلىسىمىز تابيعي بايلىقتارى عانا ەمەس, سونىمەن بىرگە رۋحاني قۇندىلىقتارى دا مول ءوڭىر سانالادى. سوندىقتان دا «رۋحاني جاڭعىرۋ» باعدارلاماسى بويىنشا ۇلكەن ۇلەس قوساتىنىمىزعا نىق سەنىمدىمىز», دەدى ا.ايبابين.
بۇدان كەيىن ءسوز العان وبلىستىق ىشكى ساياسات باسقارماسىنىڭ مامانى, «رۋحاني جاڭعىرۋ» باعدارلاماسىنىڭ ءوجو باس مەنەدجەرى اسەم ازىرباەۆا الداعى اتقارىلار جۇمىستارعا كەڭىنەن توقتالدى. اتاپ ايتقاندا, «تاربيە جانە ءبىلىم» كىشى باعدارلامالارى بويىنشا 24 شاعىن جوبا, «رۋحاني قازىناعا» – 79 جوبا جانە ۇلتتىق داستۇرلەر مەن قۇندىلىقتاردى, ىشكى ءتۋريزمدى دامىتۋ جونىندەگى ءىس-شارالار, «اتامەكەن» كىشى باعدارلاماسىنا 4 جوبا قاراستىرىلىپ وتىر. «تاربيە جانە ءبىلىم» اتتى كىشى باعدارلامانىڭ باستى نازارى قازاقستاندىقتاردى باسەكەلەستىككە, پراگماتيكالىق جانە امبيتسيالىق تۇلعا رەتىندە تاربيەلەۋگە باعىتتالىپ وتىرعانىن «رۋحاني جاڭعىرۋ» باعدارلاماسىنىڭ رەسپۋبليكالىق باسقارماسىنىڭ «تاربيە جانە ءبىلىم» كىشى باعدارلاماسىنىڭ باس مەنەدجەرى, ءبىلىم جانە عىلىم مينيسترلىگىنىڭ مەكتەپكە دەيىنگى ءبىلىم بەرۋ ءبولىمىنىڭ باس مامانى ستەللا يبراەۆا العا تارتا سويلەدى. ال ەلىمىزدىڭ قاسيەتتى مەكەندەرىنە ەنگەن تاريحي ورىندارى جايىندا ءسوز قوزعاعان وبلىستىق مادەنيەت باسقارماسىنىڭ باسشىسى ساۋلە بورىباەۆا ولاردىڭ ماڭىزىن اشىپ بەرۋگە تىرىستى.
ونىڭ مالىمەتىنە قاراعاندا, «قازاقستاننىڭ 100 قاسيەتتى ورنى» رەسپۋبليكالىق تىزىمىنە 11 نىسانمەن بىرگە 8 جوبا ەنگەن. «ەرەيمەنتاۋ اۋدانىنىڭ اۋماعىندا قۇماي بىرەگەي ارحەولوگيالىق جانە ەتنوگرافيالىق كەشەنى بار. مۇندا بىرنەشە داۋىرلەردىڭ ەسكەرتكىشتەرى – قولا ءداۋىرى, ەرتە تەمىر ءداۋىرى, عۇن, كلاسسيكالىق تۇركى جانە ەتنوگرافيالىق دامۋ كەزەڭدەرى ساقتالعان. ەڭ ماڭىزدى ەسكەرتكىشتەر – I-VI عاسىرلارعا دەيىنگى باتىس تۇرىك قاعاناتىنىڭ كەزەڭىنىڭ تاس مۇسىندەرى. وسى كەشەننىڭ قۇرىلىسى بولاشاقتا ەكولوگيالىق, ەتنومادەني جانە باسقا دا تۋريستىك قىزمەت تۇرلەرىن دامىتۋ ءۇشىن العىشارتتار جاسايدى», دەدى باس مامان. سونداي-اق وڭىرىمىزدە «اتامەكەن» كىشى باعدارلاماسى شەڭبەرىندە 2017 جىلى 4,8 ميلليارد تەڭگەگە بىرنەشە مادەني, تاريحي جانە الەۋمەتتىك نىسانداردى قايتا قۇرۋ جانە سالۋ باعىتىندا 57 جوبا قولعا الىنىپ, جۇزەگە اسىرىلۋدا. كەڭەس وتىرىسى بارىسىندا الەۋمەتتىك ماڭىزى بار جوبالارعا جۇرتشىلىقتى جانە قوعام وكىلدەرىن تارتا وتىرىپ, كەلەشەك ۇرپاقتى وتانسۇيگىشتىككە, پاتريوتيزمگە تاربيەلەۋ, قاسيەتتى جەرلەردى باق ارقىلى كەڭىنەن ناسيحاتتاۋ ماسەلەلەرى جان-جاقتى كوتەرىلدى.
اسقار تۇراپباي ۇلى,
«ەگەمەن قازاقستان»
