سۋرەتتەردە: جاڭا مەكتەپ عيماراتىنىڭ اشىلۋ راسىمىنەن كورىنىستەر
قوبدا – حالقىمىزدىڭ دەموگرافيالىق وسىمىنە دە ءوز ۇلەسىن قوسىپ, بەسىكتەرى تەربەتىلۋدەن تولاستاماي كەلە جاتقان وركەندى ءوڭىر. مۇندا ومىرگە كەلگەن نارەستەلەردىڭ سانى وبلىستاعى وزگە وڭىرلەرمەن سالىستىرا قاراعاندا ءبىرشاما جوعارى. بۇل جاعىمدى جايت اۋدان ورتالىعىنداعى مەكتەپ ءۇيىنىڭ تارلىعىن كورسەتتى. سوندىقتان وقۋشىلار ءۇش اۋىسىمدىق وقۋ تارتىبىنە كوشكەن بولاتىن.
ەندى مىنە, وسى ءبىر ۋاقىتشا قولايسىزدىق ارتتا قالىپ, تەكتى توپىراقتىڭ ۇل-قىزدارى زاماناۋي ءزاۋلىم عيماراتتا وقۋلارىن جالعاستىردى. جاڭا عيماراتتا وقۋشىلاردىڭ ساپالى ءبىلىم الۋىنا بارلىق جاعدايلار جاسالعان, سوڭعى ۇلگىدەگى اقپاراتتىق تەحنولوگيا جەتىستىكتەرىمەن جاراقتاندىرىلعان.
اتاپ ايتقاندا, ءۇش قاباتتى ەڭسەلى نىساندا سپورت جانە ءماجىلىس زالدارى, كىتاپحانا, اسحانا جانە جاڭا موديفيكاتسياعا نەگىزدەلگەن وقۋ كابينەتتەرى بار. مەدياتەكا دەيسىز بە, قىسقى باق دەيسىز بە, وسىنىڭ ءبارى قوبدالىق جەتكىنشەكتەردىڭ جان-جاقتى ۇيلەسىمدى دامۋىنا قىزمەت جاساماق. گيمنازيا مارتەبەسىن يەلەنگەن ايرىقشا ساۋلەت جوباسىنىڭ جالپى قۇنى 760 ميلليون تەڭگەنى قۇرايدى.
تەمىر قۇسايىن,
«ەگەمەن قازاقستان»
اقتوبە وبلىسى
