«15 قازاندا ءىىد جەدەل باسقارۋ ورتالىعىنىڭ قىزمەتكەرى بوگەنباي داڭعىلى بويىنشا ءجۇرىس بولىگىندە ماس كۇيدە جانجال شىعارىپ جۇرگەن بەلگىسىز ەر ازاماتتى بايقاعان. اتالعان جەرگە شۇعىل تۇردە پوليتسەيلەر جاساعى باعىتتالدى. ولار بۇزاقىنى ۇستاپ, پوليتسيا بولىمىنە جەتكىزدى جانە قر اقبتك 440-ب. بويىنشا اكىمشىلىك حاتتاما تولتىردى», دەلىنگەن استانا قالاسىنىڭ ءىىد ءباسپاسوز قىزمەتى تاراتقان حابارلامادا.
سونداي-اق 16 قازاندا تاڭعى ساعات 6.00 شاماسىندا بەينەباقىلاۋ كامەراسى ارقىلى رەسپۋبليكا-كەنەسارى كوشەلەرىنىڭ قيىلىسىندا ۆەلوسيپەدتى ۇرلاۋ فاكتىسى تىركەلگەن. پوليتسيا جاساقتارى 36 جاستاعى ازاماتتى ۇستادى جانە ءارى قاراي تەرگەۋ ءۇشىن پوليتسيا بولىمشەسىنە جەتكىزدى. اتالعان فاكت قر قك 188-بابى بويىنشا (ۇرلىق) تىركەلدى. تەرگەپ-تەكسەرۋ جۇرگىزىلىپ جاتىر.
جالپى, «15 قازاننان باستاپ «سەرگەك» بەينەكامەرالارى جۇيەسى ارقىلى 1371 اكىمشىلىك قۇقىق بۇزۋشىلىق انىقتالدى. ونىڭ ىشىندە 20 فاكتى - ۇساق بۇزاقىلىق, 135 فاكتى - قوعامدىق ورىنداردا الكوگولدى سۋسىندار ءىشۋ, 145 فاكتى - قوعامدىق ورىنداردا مازالاۋ, 300-دەن استام فاكتى - جول ءجۇرىسى قاعيداسىن بۇزۋ جانە شامامەن 700 فاكتىگە جۋىق باسقا دا بۇزۋشىلىقتار انىقتالدى. سونداي-اق جبو بەينەكامەرا ارقىلى 7 قىلمىستىق قۇقىق بۇزۋشىلىق, ونىڭ ىشىندە بۇزاقىلىق, بوتەننىڭ مۇلكىن ۇرلاۋ, توناۋ اشىلدى».
