كۇتۋ
كەيدە ءبىر قۋانىشتى كۇندى اسىعا كۇتەسىڭ. بىراق... وعان دەيىنگى جاي كۇندەردىڭ ءبارى دە سول باقىتتى كۇننىڭ جولىندا قۇرباندىق بولىپ جاتقانداي كورىنەدى.
تابىلماعان تەڭىز
مىنا ءومىردى وزەنگە تەڭەيتىن بولساق, سوندا ونىڭ اعىپ بارىپ قۇياتىن تەڭىزى قايدا؟ الدە قۇمعا ءسىڭىپ كەتە مە ەكەن؟..
تاۋ
ول نە؟ تەك اشەيىن تاستاردىڭ ءۇيىندىسى عانا ما؟! جوق الدە, كوز شىرىمىن الىپ جاتقان تاريح پا؟..
رۋح
بىردە ءبىز رايىمبەك داڭعىلىنىڭ بويىنداعى زيراتقا بارىپ, ۇلى مۇحاڭنىڭ – مۇحتار اۋەزوۆتىڭ قابىرىنە زيارات ەتىپ, قۇران وقىدىق.
جو-جوق. سىزدەرگە وتىرىك ايتا المايمىن. مۇحاڭ ول جەردە جوق سياقتى. سوندا... ۇلى سۋرەتكەردىڭ رۋحى قايدا؟
«ول – «اباي جولى» ەپوپەياسىندا!», دەيدى ىشتەگى ءبىر جۇمباق داۋىس.
دالادان قالاعا كەلگەندەر
ءبىزدىڭ كوپشىلىگىمىزگە ءتان نارسە – ءاۋ باستاعى توپىراعىمىزدان جەل ۇشىرىپ اكەتىپ, بوتەن جەرگە كەلىپ تۇسكەن دانگە ۇقسايتىنىمىز. ارينە ول ءدان جەرسىنىپ, تامىر جايىپ كەتسە جاقسى, ال ەگەر, بۋلىعىپ, اسفالتتىڭ جاعاسىنداعى بۇتاداي تۇتىنگە تۇنشىعىپ, تىربيىپ قالسا شە؟!
شىبىن جان
قۋ تاقىرعا اينالعان كارى كەۋدەدەگى قارا شىبىن: «مەن باياعىدا-ا-ا اپپاق قۇس بولاتىنمىن!..», دەيدى. سەنەسىز بە؟..
سوڭعى كۇن
ادام عۇمىرىنىڭ ەڭ سوڭعى كۇنى. ول دا تاڭەرتەڭگىلىك ادەتتەگى جاي كۇندەردىڭ ءبىرى بولىپ باستالار ما ەكەن؟..
