ەلباسىنىڭ «بولاشاققا باعدار: رۋحاني جاڭعىرۋ» باعدارلامالىق ماقالاسىندا ايتىلعان ۇلتتىق قۇندىلىقتاردى ناسيحاتتاۋ باعىتىندا وتكەن بايگەگە 200-دەن استام جۇيرىك ات قاتىستى.
كوكپارمەن بىرگە الامان بايگە, توق بايگە, جامبى اتۋ, اسىق اتۋ, قازاق كۇرەسى سىندى ۇلتتىق سپورت تۇرلەرى بويىنشا دا جارىس قىزدى. ماحامبەت اۋدانىندا وتكەن شاراعا اۋدان تۇرعىندارى عانا ەمەس, وبلىس ورتالىعىنان ارنايى بارعاندار دا كۋا بولدى. توق بايگەدەن ماڭعىستاۋلىق «مەرسەدەس» تۇلپارى مارە سىزىعىن ءبىرىنشى بولىپ كەستى. الامان بايگەدە باتىس قازاقستاننان كەلگەن «ايماڭداي» يەسىنە جەڭىس سىيلادى. «دارابوز-2017» جاپپاي كوكپار جارىسىندا جامبىل وبلىسىنان قاتىسۋشى قۋانىشبەك قۇراماەۆ باس بايگە – «التىن قامشىنى» يەلەنىپ, 1 ميلليون تەڭگە سىياقىمەن ماراپاتتالدى.
جۇيرىكتەردى «استانا» كوكپار كلۋبىنىڭ پرەزيدەنتى امانجول قاسەنوۆ پەن اتىراۋداعى ۇلتتىق سپورت تۇرلەرى قاۋىمداستىعىنىڭ نەگىزىن قالاۋشى ونەربەك جانبالا باعالادى.
نوسەر جاۋىن مەن اتىراۋدىڭ باۋىرمال بالشىعى دا ۇلتتىق ونەر جانكۇيەرلەرىنە كەدەرگى بولعان جوق. جينالعاندار جارىستى سوڭىنا دەيىن تاماشالاپ, ەتنواۋىلدا تاماشا دەمالىس كۇنىن وتكىزدى. ۇلتتىق سپورت ۇلىقتالعان شاراعا وبلىس اكىمى نۇرلان نوعاەۆ پەن ۇلتتىق سپورت تۇرلەرى قاۋىمداستىعىنىڭ ءبىرىنشى ۆيتسە-پرەزيدەنتى ەرلان وسپانوۆ قاتىستى.
– اتىراۋدا بۇرىن-سوڭدى مۇنداي اۋقىمدى كوكپار ويىنى وتپەگەن, – دەيدى وبلىستىق ۇلتتىق سپورت تۇرلەرى فەدەراتسياسىنىڭ پرەزيدەنتى اسلانبەك ونەرباي ۇلى. – باستامامىزدى وبلىس اكىمى قولداپ, ەلىمىزدىڭ تۇكپىر-تۇكپىرىنەن ەڭ جۇيرىك دەگەن تۇلپارلار جينالدى. الداعى جىلى ايماقتىق تۋرنير وتەدى. ۇلتتىق سپورتتى ۇلىقتاۋعا ارنالعان شارالار الداعى ۋاقىتتا دا جالعاسادى.
باقىتگۇل باباش,
«ەگەمەن قازاقستان»
اتىراۋ
