ول ماسەلە – كورشىلەس مەملەكەتتەرمەن شەكارالاس اۋماقتاردىڭ اقپاراتتىق قاۋىپسىزدىك تەحنولوگيالارىن جاڭا ساپاعا كوتەرۋ قاجەتتىلىگى. مەملەكەتىمىزدىڭ سولتۇستىگىندە, سولتۇستىك شىعىسىندا, وڭتۇستىگىندە, وڭتۇستىك شىعىسىندا, شىعىسىندا جانە باتىسىنداعى شەكارالىق اۋماقتاردا, شامامەن 150-200 شاقىرىم ەندىكتەگى ەلدى مەكەندەردەگى كەڭىستىكتە ءبىزدىڭ ۇلتتىق تەلەۆيزيا, راديو, ۇيالى تەلەفون سيگنالدارى ناشار, كەيبىر جەرلەردە مۇلدەم ەستىلمەيدى, وتپەيدى. الماتى وبلىسى سياقتى ۇلكەن وبلىستىڭ شالعاي ەلدى مەكەندەرىنە قازاق راديوسىنىڭ ءۇنى جەتپەيدى, ال وبلىستىق راديو جوق. كەرىسىنشە, كورشى مەملەكەتتەردىڭ داۋىسى مەن اقپاراتى ساڭقىلداپ, سايراپ تۇر. سولتۇستىك وبلىستاردا دا جاعداي وسىلاي. ويتكەنى ولاردىڭ (كورشىلەردىڭ) عارىشتاعى ستانسالارى وتە قۋاتتى. وسى وڭىرلەردە تۇرىپ, تىرشىلىك قۇرىپ وتىرعان قازاقستان ازاماتتارى ءوز ەلىنىڭ اقپاراتتارىن كوپ جاعدايلاردا كورشىلەس ەلدەردىڭ كوممۋنيكاتسيالىق جەلىلەرى ارقىلى الۋعا ءماجبۇر.
قازىر اقپاراتقا دەگەن سۇرانىس تا, ونى تۇتىنۋشىلار دا بۇرىن-سوڭدى بولجانباعان كولەمدە ەسەلەپ وسۋدە. ياعني, مەملەكەتىمىزدىڭ اقپاراتتىق قاۋىپسىزدىك الەۋەتىن, كوممۋنيكاتسيالىق ساپاسىن ەلباسىنىڭ تسيفرلاندىرۋ تالاپتارىنا ساي قۋاتتاندىرىپ, ولاردى ءوز مەملەكەتىمىزدىڭ مۇددەسىنە قىزمەت ەتتىرۋ ماقساتىندا وسى ۋاقىتقا دەيىنگى باعدارلامانى تۇبەگەيلى وزگەرتىپ, قايتا جاساقتاۋ قاجەتتىلىگى تۋىنداپ تۇرعانى كۇمانسىز.
ەكىنشىدەن, مەملەكەت مۇددەسى ءۇشىن بارلىق وبلىستارعا حابار تاراتاتىن ۇلتتىق تەلەۆيزيا ارنالارىمەن قاتار, اسىرەسە الماتى, شىعىس قازاقستان, وڭتۇستىك قازاقستان, سولتۇستىك قازاقستان, باتىس قازاقستان سياقتى شەكارالىق وبلىستاردىڭ اقپاراتتىق كەڭىستىكتەرى مەن ولاردىڭ مۇمكىندىكتەرىن, باسەكەلەستىككە قابىلەتتىلىگىن كوتەرۋ شارالارىن قاراستىرۋ كەرەك. سونىمەن قاتار اسقار جۇماعاليەۆتان وبلىستىق راديولارعا اۋە تولقىنىن قايتا قاراپ, ءبولىپ, بەكىتىپ, ولاردىڭ جۇمىسىن تەحنولوگيانىڭ جاڭا تالاپتارىنا ساي ۇيىمداستىرۋعا پارمەن بەرۋ قاجەتتىگى سۇرالدى. وسى ءوتىنىشتى قولداپ ونداعان ارىپتەستەرىمنىڭ قول قويۋىنا قاراعاندا, بارلىعى دا ايماقتاردا بولعاندا وسى پروبلەمامەن تانىسقانى كورىنىپ تۇردى.
قۋانىش سۇلتانوۆ,
ءماجىلىس دەپۋتاتى
