قالا اكىمى باۋىرجان بايبەك قالاعا كەلگەن ءاربىر شەتەلدىك قوناقتىڭ كورىكتى جەرلەر, مادەني وقيعالار, مەيمانحانالار تۋرالى ءبىر تەرەزە ءپرينتسيپى بويىنشا تولىق مالىمەتتى قالاي الاتىندىعىمەن تانىستى.
قالانىڭ تۋريزم جانە سىرتقى بايلانىستار باسقارماسىنىڭ باسشىسى ەرلان جايلاۋباي ۆيزيت ورتالىقتىڭ الماتى تۇرعىندارى مەن قوناقتارىنا مەگاوليستىڭ تۋريستىك الەۋەتى تۋرالى كاسىبي كەڭەس, جول كارتالارى مەن تاۋ باعىتتارىنىڭ اتلاستارىن, تۋروپەراتورلار بروشيۋرالارىن, مادەني- بۇقارالىق شارالاردىڭ انونستارىن بەرەتىندىگىن, ەكسكۋرسياعا, سۋۆەنير بۇيىمدارعا تاپسىرىس الۋعا, ەڭ باستىسى تۋريستەر ءۇشىن ءموبيلدى بايلانىس وپەراتورىنىڭ SIM-كارتاسىن بەيىمدەۋگە بولاتىندىعىن ايتا كەلە, قازىرگى كەزدە بارىنشا تانىمال لوكاتسيالاردا اقپاراتتىق تۋريستىك كيوسكىلەر اشۋ ماسەلەسى قاراستىرىلىپ جاتقانىنا توقتالدى. باسقارما باسشىسى مۇنداي ورتالىقتى اشۋ پاريج, لوندون, دۋباي, نيۋ-يورك, بارسەلونا سياقتى تۋريزم سالاسى دامىعان قالالار تاجىريبەسىنەن الىنعاندىعىن جەتكىزدى.
«قازىردىڭ وزىندە www.visitalmaty.kz رەسمي سايتى جۇمىس ىستەۋدە, كەيىن ول جەتى ءتىلدى قامتيتىن بولادى. سايتتا قالانىڭ تانىمال كورنەكى ورىندارى, ۇلتتىق ءمازىر دايىندايتىن مەيرامحانالارى, وقيعالالار تىزبەگى تۋرالى تولىق اقپاراتتار جاريالانادى.ۆيزيت ورتالىقتا كەڭەس بەرۋ, سۋۆەنير, سويلەسۋ, ءتۇرلى شارالار وتكىزۋدىڭ ينتەراكتيۆتى ايماقتارى قامتاماسىز ەتىلگەن. تەحنيكالىق تۇرعىدا اشىلعالى بەرى 109 تۋريست حابارلاستى», – دەگەن ورتالىق ديرەكتورى اسەل نۇركەباەۆا ساياحاتشىلار ءۇشىن توتەنشە جاعداي تۋىنداي قالسا ءتۇرلى ماسەلەنى جەدەل شەشەتىن شۇعىل جەلى قۇرىلعانىن دا اتاپ ءوتتى.
ايتا كەتسەك, «الماتىنىڭ ۆيزيت ورتالىعىن» بولاشاقتا مەملەكەتتىك-جەكەشەلىك ارىپتەستىكتىڭ كاتاليزاتورىنا جانە الماتى كلاستەرىنىڭ تۋريستىك دەۆەلوپمەنتىنە اينالدىرۋ جوسپارلانعان. حالىقارالىق نارىقتا تۋريستىك الەۋەتتى كورسەتۋ جوبالارىن جۇزەگە اسىرۋ, ءوڭىردىڭ رەيتينگى مەن باسەكەگە قابىلەتتىلىگىنە تالداۋ جاساۋ, ءتۋريزمدى دامىتۋ مۇمكىندىكتەرىن ىزدەستىرۋ, وسى سالادا ءتۇرلى زەرتتەۋلەر جۇرگىزۋ تۋريستىك اقپاراتتىق ورتالىق جۇمىسىنىڭ باستى بولىگى بولادى.
ميرا بايبەك,
«ەگەمەن قازاقستان»
الماتى
