بۇعان ەشكىم داۋ ايتا قويماس دەپ ويلايمىز. سودان دا بولار, ەلباسى «بولاشاققا باعدار: رۋحاني جاڭعىرۋ» ماقالاسىندا كەلەشەكتە ۇلتتىڭ تابىستى بولۋى ونىڭ تابيعي بايلىعىمەن ەمەس, ادامدارىنىڭ باسەكەلىك قابىلەتىمەن ايقىندالاتىنىن اتاپ ءوتىپ, «سوندىقتان ءاربىر قازاقستاندىق, سول ارقىلى تۇتاس ۇلت ءححى عاسىرعا لايىقتى قاسيەتتەرگە يە بولۋى كەرەك. مىسالى, كومپيۋتەرلىك ساۋاتتىلىق, شەت تىلدەرىن ءبىلۋ, مادەني اشىقتىق سياقتى فاكتورلار اركىمنىڭ العا باسۋىنا ءسوزسىز قاجەتتى العىشارتتاردىڭ ساناتىندا. سول سەبەپتى «تسيفرلى قازاقستان», ء«ۇش تىلدە ءبىلىم بەرۋ», «مادەني جانە كونفەسسياارالىق كەلىسىم» سياقتى باعدارلامالار ۇلتىمىزدى, ياعني بارشا قازاقستاندىقتاردى ءححى عاسىردىڭ تالاپتارىنا دايارلاۋدىڭ قامى», دەپ جازعان ەدى. مەملەكەت باسشىسى مەڭزەگەن ماڭىزدى باعىتتار بويىنشا شىعىس قازاقستاندا دا جۇيەلى جۇمىستار قولعا الىنۋدا. بۇل رەتتە ءبىلىم وردالارىنا ارتىلار جاۋاپكەرشىلىك جۇگى سالماقتى ەكەنى ايتپاسا دا تۇسىنىكتى شىعار. دەگەنمەن دە «تسيفرلى قازاقستان», ء«ۇش تىلدە ءبىلىم بەرۋ» سەكىلدى اۋقىمدى باعدارلامالارعا العاش ءۇن قوسىپ, وقۋشىلاردى ەرتە باستان كومپيۋتەردى جەتە مەڭگەرۋگە باۋلىپ جاتقان مەكتەپتەر دە بار. ماسەلەن, اشىلعانىنا 3 جىل عانا بولعان وسكەمەندەگى № 46 قازاق ورتا مەكتەبى ينفورماتيكا ءپانىن ادەتتەگىدەي 5-سىنىپتان ەمەس, بيىلعى وقۋ جىلىنان 4-سىنىپتان باستاپ وقىتۋدى ءجون كورىپتى. اپتاسىنا ءبىر ساعات جۇرگىزىلەتىن قوسىمشا ساباق «اقپاراتتىق تەحنولوگيالار نەگىزدەرىمەن تانىسۋ» دەپ اتالادى. وسى ماقساتتا 20 نوۋتبۋك الدىق. قازىرگىدەي اقپارات زامانىندا وقۋشىلارىمىز كومپيۋتەردى بالعىن شاعىنان باس-تاپ مەڭگەرسە, ۇتىلمايتىنىمىز انىق, دەيدى مەكتەپ ديرەكتورى گۇلفاريدا اۋعانباەۆا. تاعى ءبىر ەرەكشە اتاپ وتەر دۇنيە, ءبىلىم ورداسى بيىل مەكتەپ باعدارلاماسىنا العاش رەت «مەن – ينجەنەرمىن» دەگەن قوسىمشا ساباق ەنگىزگەن. بەس ساعاتتان تۇراتىن ساباق 5-سىنىپ وقۋشىلارىنا عانا جۇرگىزىلەدى. «جاقسىنى كورمەككە» دەگەندەي, جاڭا ءپاننىڭ قالاي جۇرگىزىلەتىنىنە ءبىز دە قىزىعۋشىلىق تانىتىپ, ءبىر ساباعىنا ارنايى قاتىسىپ كوردىك. قىرىق بەس مينۋت مۇعدارىندا اڭعارعانىمىز, بۇل قوسىمشا ساباق وقۋشىلاردى وزدىگىنەن جازۋ-سىزۋعا, كومپيۋتەر كومەگىمەن ءارتۇرلى دۇنيەلەردىڭ ەسكيزىن جاساۋعا ۇيرەتەدى ەكەن. ءار وقۋشىنىڭ الدىندا ءبىر-ءبىر كومپيۋتەر. وقۋشىلاردىڭ بۇل پانگە دەگەن قىزىعۋشىلىعىن ءبىر ساعاتقا جۋىق ۋاقىت بويى باس كوتەرمەي تاپسىرما ورىنداۋلارىنان-اق بايقاعانداي بولدىق. «قوسىمشا ساباقتى جۇرگىزىپ جاتقانىمىزعا كوپ ۋاقىت بولعان جوق. بىراق شاكىرتتەرىمىزدىڭ ىقىلاسىن, ىنتا-جىگەرىن ءوزىڭىز دە اڭعارعان بولارسىز. بۇگىن وقۋشىلار «3D Builder» دەگەن باعدارلامامەن جۇمىس ىستەپ, جازىق دەنەدەن ءۇش ولشەمدى دەنەنى قۇراستىردى. ولارعا قازىر گەومەتريالىق فيگۋرالاردى كومپيۋتەرلىك ۇلگىدە جاساۋدى ۇيرەتىپ جاتىرمىن. بۇل ءپان وقۋشىلاردىڭ جىلدام شەشىم قابىلداۋىنا, سىني تۇرعىدان ويلاۋىنا ۇلكەن سەپتىگىن تيگىزەدى», دەيدى ينفورماتيكا ءپانىنىڭ مۇعالىمى شىنار باباتاەۆا. سونىمەن قاتار ول الداعى ۋاقىتتا وقۋشىلاردىڭ كومپيۋتەر ارقىلى جاساعان جۇمىستارىن قالاداعى ا.پۋشكين اتىنداعى وبلىستىق كىتاپحاناعى 3D پرينتەردەن شىعارۋدى جوسپارلاپ وتىرعاندىعىن دا جەتكىزدى. ساباق سوڭىندا ەكى-ءۇش وقۋشىنى سوزگە تارتقانىمىزدا «ساباق وتە قىزىقتى. كومپيۋتەرمەن جۇمىس ىستەۋدى ۇيرەنەمىز, ءوزىمىز قالاعان دۇنيەنى جاسايمىز», دەدى بارلىعى ءبىراۋىزدان.
مىڭنان استام وقۋشىسى بار مەكتەپتە اعىلشىن ءتىلىن ۇيرەنۋگە دە ەرەكشە دەن قويىلىپ جاتىر ەكەن. قازىرگى ۋاقىتتا ءبىلىم ورداسىنىڭ حيميا, فيزيكا, بيولوگيا جانە ينفورماتيكا پاندەرىنىڭ 6 مۇعالىمى الەمدە سالتانات قۇرعان ءتىلدى مەڭگەرۋ ءۇشىن ءارتۇرلى كۋرستارعا قاتىسىپ, تانىم كوكجيەكتەرىن كەڭەيتۋدە. بۇدان بولەك مەكتەپتىڭ قازاق, ورىس جانە اعىلشىن ءتىلى پاندەرىنىڭ مۇعالىمدەرى وبلىستا قولعا الىنعان ارنايى باعدارلاما اياسىندا بىلىكتىلىكتەرىن ارتتىردى. ءبىر ايتا كەتەرلىگى, ءوڭىردىڭ اعىلشىن ءتىلى ۇستازدارىنا لوندوننان كەلگەن ءتىل جەتكىزۋشىلەر, ياعني اعىلشىنداردىڭ وزدەرى ساباق بەرگەن بولاتىن. ء«وز ىشىمىزدە قايناپ جۇرە بەرگەن جارامايدى ەكەن. ءبىز قانشا دەگەنمەن قالادا تۇرامىز عوي. كوپ دۇنيە قولجەتىمدى. شەتەلدەن ارنايى شاقىرىلعان مامانداردان ءدارىس الۋ اسىرەسە شالعاي اۋىلداردان كەلگەن ارىپتەستەرىمىزگە پايدالى بولدى دەپ ويلايمىن. بايقاعانىم, ولار اۋىز ەكى سويلەۋگە كوپ ءمان بەرەدى. وسىنداي تاجىريبە الماسۋلار ءبىز ءۇشىن اسا قاجەت», دەيدى №46 مەكتەپتىڭ 25 جىلدىق ەڭبەك ءوتىلى بار ۇستازى, اعىلشىن ءتىلى ءپانىنىڭ مۇعالىمى ايگۇل مۋسينوۆا.
ازامات قاسىم,
«ەگەمەن قازاقستان»
وسكەمەن
سۋرەتتى تۇسىرگەن اۆتور
