شىعارمانىڭ اۆتورى – قىرعىز اقىنى شىڭعىس ايتماتوۆ, قويۋشى – تاجىك رەجيسسەرى بارزۋ ابدۋراززاكوۆ, ال قويىلىمدى استانالىق م.گوركي اتىنداعى ورىس دراما تەاترىنىڭ اكتەرلەرى ورىندايدى. سپەكتاكل ناعىز سينەرگيانى قامتاماسىز ەتىپ, ورتالىق ازيا حالىقتارىنىڭ تەاتر ونەرىنىڭ دامۋ دەڭگەيىن كورسەتتى. قويىلىم بارىسىندا سەرب جانە اعىلشىن تىلدەرىندە سۋبتيترلەر جازىلدى.
«مانكۋرت. ۆەچنىي راب» سپەكتاكلىنىڭ كورسەتىلىمىنىڭ الدىندا قازاقستان, استانا جانە كوپشىلىكتىڭ قىزىعۋشىلىعىن وياتقان تەاترعا ارنالعان كورمە ۇيىمداستىرىلدى. ۇلتتىق مۋزىكا مەن جاس ەلوردامىز جايلى ءان-كۇيلەر حوللدا ەرەكشە اتموسفەرا ورناتىپ, جينالعان قاۋىمدى قازاق حالقىنىڭ مادەنيەتىمەن ەتەنە تانىستىردى. شارا كەزىندە تەاتردىڭ تاريحى تۋرالى ايتىلىپ, اقمولا قالاسىنىڭ سيرەك كەزدەسەتىن العاشقى سۋرەتتەرى مەن قازىرگى استانانىڭ كورىنىستەرى كورسەتىلدى.
«مانكۋرت. ۆەچنىي راب» شىعارماسى سەربيالىق كورەرمەننىڭ جۇرەگىن جاۋلاپ, فەستيۆالدى ۇيىمداستىرۋشىلار مەن كەلۋشىلەر تاراپىنان وڭ پىكىرلەر ايتىلدى.
ايتا كەتەيىك, سەربيالىق تاراپ ەلوردالىق تەاتردىڭ فەستيۆالگە قاتىسۋىنا باعا جەتپەس كومەك كورسەتتى, ولار سپەكتاكلگە قاجەتتى دەكوراتسيالاردى ازىرلەدى.
- گوركي اتىنداعى تەاتردىڭ سەربياعا كەلۋىن تاعاتسىز كۇتتىك. باعدارلامادا ۇسىنىلعان سپەكتاكل فەستيۆالدى ۇيىمداستىرۋشىلاردىڭ قىزىعۋشىلىعىن وياتتى. قازىرگى زامانعى تەاتر ءوز حالقىنىڭ عانا ەمەس, سونىمەن قاتار الەمدىك دراماتۋرگيانىڭ دا مادەني جەتىستىكتەرىن پاش ەتەدى. ال تەاترلاردىڭ دامۋى مەن ىنتىماقتاستىعى – بۇل مەملەكەتتەردىڭ ءوزارا ىنتىماقتاستىعىنىڭ ناتيجەسى, - دەدى «Synergy #wtf» فەستيۆالىنىڭ ديرەكتورى ۆالەنتيل ۆەنتسەل.
ەسكە سالايىق, وتكەن جىلى سەربياعا ساپارى بارىسىندا مەملەكەت باسشىسى نۇرسۇلتان نازارباەۆ بەلگراد قالاسىندا قازاق اقىنى جامبىل جاباەۆقا ارنالعان ەسكەرتكىشتىڭ اشىلۋىندا ەكىجاقتى مادەني جانە گۋمانيتارلىق بايلانىستى نىعايتۋ جونىندە ايتقان بولاتىن.
فەستيۆال ءبىر اپتاعا جالعاستى, وعان ۆەنگريا, رۋمىنيا, ماكەدونيا, قازاقستان جانە سەربيا مەملەكەتتەرىنەن تەاتر ۇجىمدارى قاتىستى. شارا اياسىندا تەاترالدار سيمپوزيۋمدار وتكىزىپ, تاجىريبە الماستى, الداعى تەاتر ماۋسىمىنا ارنالعان جوسپارلارىمەن ءبولىستى.
«Synergy» فەستيۆالىنىڭ سوڭىندا قاتىسۋشىلار ءبىر-بىرىنە سىيلىقتار تابىستاپ, قازاقستانداعى ەسكى تەاترلاردىڭ ءبىرى – م.گوركي اتىنداعى ماودت ساپارمەن كەلۋ تۋرالى نيەتتەرىن جەتكىزدى.
