ايتۋلى ءىس-شارانى اۋدان اكىمى ب.ىسقاق اشىپ, بەرەكە بىرلىگى جاراسقان اۋىل حالقى پرەزيدەنتتىڭ رۋحاني جاڭعىرۋ يدەياسىنىڭ نەگىزىندە اتقارعان ىسىنە ءدان ريزاشىلىعىن ءبىلدىردى.
مەملەكەت جانە قوعام قايراتكەرى ك.اۋحاديەۆ تۋعان جەردى تۇلەتۋدەگى س.ەسبەرگەنوۆتىڭ ونەگەلى ەڭبەگىنە توقتالىپ, تىڭ جەردى تۇلەتكەن اكەسىنىڭ رۋحىن اتاقونىسىنا قايتا ورالتىپ, اۋىل جۇرتىن سەرپىلتكەن تەكتى جاننىڭ ۇرپاقتارىنا العىسىن جەتكىزدى. ال الماتى وبلىستىق مادەنيەت, مۇراعات جانە قۇجاتتاما باسقارماسىنىڭ باسشىسى ا.ابدۋاليەۆ وبلىس كولەمىندەگى تۋعان جەرگە دەگەن سۇيىسپەنشىلىكتەن ءورىس الىپ جاتقان ىستەردى سانامالاي كەلىپ, سونىڭ ءبىرى وسى ەسكەرتكىش ەكەنىن العا تارتتى. الداعى ۋاقىتتا قازاق حالقىنىڭ ايتۋلى اقىنى ت.مولداعاليەۆكە دە قۇرمەت كورسەتىلەتىنىن تىلگە تيەك ەتىپ, مۇنداي جۇمىستار جالعاسا بەرەتىنىن ەسكە سالدى.
ال ءماجىلىس دەپۋتاتى نۇرتاي سابيليانوۆ ەلباسىنىڭ رۋحاني جاڭعىرۋ يدەياسىنا ساي اتقارىلعان مىنا شارا كىمگە دە بولسا ۇلگى بولاتىنىن اتاپ, ەشكىمنەن ەش نارسە سۇراماي ءوز قارجىسىمەن وسىنشاما جۇمىستى اتقارعان ەسبەرگەنوۆ اۋلەتىنە, زاڭگەر بالاسى ۇلان ەسبەرگەنوۆكە ءىلتيپات تانىتىپ, قاسىرەتتى جەلتوقسان كوتەرىلىسىندە ادىلدىكتىڭ تۋىن كوتەرىپ, ونىڭ وزىنە اراشا ءتۇسىپ, بۇعاۋدان قۇتقارعانىن العا تارتىپ, ەندى ويلاپ وتىرسا تەكتىدەن تەكتى تۋاتىنىنا كوزىنىڭ جەتكەنىن اتاپ ايتتى. سول سەكىلدى ارداقتى ازامات تۋرالى ك.ومىرعالي, ءا.داۋىتقۇلوۆ, س.بايباتىروۆ, ە.سۇلتانعازيەۆ, تاعى باسقالار ەستەلىكتەر ايتىپ, ىرگەلى اۋىلدىڭ اجارىن كىرگىزگەن يگىلىكتى جۇمىسقا العىستارىن جەتكىزدى.
سالتاناتتى جيىننىڭ سوڭىندا س.ەسبەرگەنوۆتىڭ جارى, اۋلەت اناسى ايكەن اپاي مەن ۇلى ۇلان بۇكىل اۋىل حالقىنا, تىلەكتەس جۇرتقا العىستارىن ءبىلدىرىپ, ەل جاقسىسىنىڭ زامانداستارىنا سىي-سياپات جاسادى. جينالعان كوپكە وننان اسا تىگىلگەن قازاق ۇيدە اس بەرىلدى. قاۋمالاعان حالىق وسىنشا يگىلىكتى ءىستى ىسكە اسىرعان اۋلەتكە شىن نيەتتەرىن ءبىلدىرىپ, ەندىگى جەردە ەسكەرتكىش ۇلكەن-كىشىنىڭ قاسيەتتى ورنىنا اينالاتىنىن, الداعى ۋاقىتتا اۋىز سۋ ماسەلەسى دە شەشىلسە, نۇر ۇستىنە نۇر بولار ەدى دەگەن تىلەكتەرىن دە جەتكىزىپ جاتتى. ول دا تاياۋ ۋاقىتتا شەشىمىن تاباتىنىن باسشىلار مەن حالىق قالاۋلىسى اتاپ ايتتى.
سۇلەيمەن مامەت,
«ەگەمەن قازاقستان»
