ۇلتتىق ەكونوميكا ءمينيسترى تيمۋر سۇلەيمەنوۆ ەلىمىزدىڭ الەۋمەتتىك-ەكونوميكالىق دامۋ بولجامى 2016 جىلعى ءجىو بويىنشا ەسەپتىك دەرەكتەر مەن وسى جىلدىڭ كورسەتكىشتەرى نەگىزىندە انىقتالعانىن مالىمدەدى.
2017 جىلدىڭ باسىنان بەرى قر-دا ەكونوميكالىق بەلسەندىلىكتىڭ جاقسارعانى بايقالادى. وسى جىلدىڭ توعىز ايىنداعى ءجىو ءوسىمى 4,3%-دى قۇراعان, ال جالپى جىل قورىتىندىسى بويىنشا ەكونوميكا ءوسىمى 3,4% دەڭگەيىندە بولادى دەپ كۇتىلۋدە. 2017 جىلى اتاۋلى ءجىو 51 855,3 ملرد تەڭگە كولەمىندە بولجانعان, بۇل اقپاندا ماقۇلدانعان كورسەتكىشتەن 2 114,7 ملرد تەڭگەگە جوعارى. حالىقتىڭ جان باسىنا شاققاندا ءجىو $8,7 مىڭعا دەيىن ۇلعايادى.
ونەركاسىپ ءوسىمى تاۋ-كەن ءوندىرىسى سالاسىنىڭ 8,2%-عا دەيىنگى بولجامدى ءوسىمى مەن وڭدەۋ ونەركاسىبىنىڭ 4,5%-عا دەيىنگى كۇتىلەتىن ءوسىمى ەسەبىنەن 6,2%-عا دەيىن ۇلعايتىلادى دەپ قايتا قارالدى.
مۇناي ءوندىرۋ كولەمى ءىرى كەن ورىندارىندا (قاشاعان, تشو, قاراشىعاناق) ءوندىرۋ جوسپارىن اسىرا ورىنداۋ ەسەبىنەن 81-دەن 84,5 ملن تونناعا دەيىن ۇلعايتىلدى. اۋىل شارۋاشىلىعىنىڭ جالپى ءونىم كولەمىنىڭ ءوسىمى 2,5% دەڭگەيىندە ساقتالعان.
ەكونوميكالىق بەلسەندىلىكتىڭ جاقسارۋى مەن ەكسپورتتالاتىن تاۋارلارعا الەمدىك باعانىڭ تۇراقتاۋىن ەسكەرە وتىرىپ, ەكسپورت بويىنشا بولجام $1,9 ملرد-قا $47 ملرد-قا دەيىن ۇيعايعان, يمپورت ماقۇلدانعان $32,7 ملرد دەڭگەيىندە ساقتالدى.
تۇزەتىلگەن ماكروەكونوميكالىق بولجام نەگىزىندە 2017 جىلعا ارنالعان رەسپۋبليكالىق بيۋدجەت پارامەترلەرىنىڭ بولجامى دا ناقتىلاندى. رەسپۋبليكالىق بيۋدجەتتىڭ 2017 جىلعى كىرىستەرى (ترانسفەرتتەردى ەسەپكە الماعاندا) 4 952,8 ملرد تەڭگە كولەمىندە باعالانادى, بۇل بەكىتىلگەن جوسپاردان 60,8 ملرد تەڭگەگە جوعارى كورسەتكىش.
جەر قويناۋىن پايدالانۋشىلاردان تۇسەتىن كورپوراتيۆتىك تابىس سالىعى بويىنشا, سونىمەن قاتار مەملەكەتتىك كاسىپورىندار كىرىسىنىڭ ءبىر بولىگى مەن ديۆيدەنتتەردىڭ جوسپارلانباعان تۇسىمدەرى ەسەبىنەن سالىقتىق ەمەس تۇسىمدەر بويىنشا نەگىزگى اسىرا ورىنداۋ ورىن الادى دەپ كۇتىلۋدە.
سونىمەن قاتار ۇكىمەتتىك قارىز ءوسىمىن شەكتەۋ جانە ەلىمىزدىڭ تاۋەلسىز رەيتينگىن ساقتاۋ ماقساتىندا بيۋدجەت تاپشىلىعىن 47,9 ملرد تەڭگەگە نەمەسە ءجىو 3,1%-دان 2,9%-عا دەيىن قىسقارتۋ ۇسىنىلعان.
ۇلتتىق قوردىڭ كەپىلدى جانە ماقساتتى ترانسفەرتتەرى بۇعان دەيىن بەكىتىلگەن كولەمدە ساقتالعان.
