«ولاردىڭ ەسىمدەرى ءبىزدىڭ جۇرەگىمىزدە» دەگەن اتاۋمەن وتكەن كەشتىڭ مازمۇنى تەرەڭ, ماڭىزى جوعارى دەۋگە بولادى. ۇلاعاتتى شارانى ۇيىمداستىرىپ, ۇيىتقى بولعان استانا قالاسى اكىمدىگىنىڭ تۇڭعىش ءباسپاسوز حاتشىسى, قازاقستان رەسپۋبليكاسىنىڭ ەڭبەك سىڭىرگەن قايراتكەرى, «تۇگەل مەديا» بىرلەستىگىنىڭ باسشىسى سادىبەك تۇگەلدىڭ سوزىنە سۇيەنسەك اتالعان شارا وسىدان 5 جىل بۇرىن ۇيىمداستىرىلا باستاعان ەكەن.
ء«يا, 2012 جىلدىڭ 4 مامىرى كۇنى وسىنداي يگى شارانىڭ تۇساۋى كەسىلدى. ءبىز بۇل كۇنى «استانا قالاسى حالىقارالىق ءباسپاسوز ورتالىعىنىڭ» جۇمىسىنا بەلسەنە ارالاسقان, 14 اتاقتى قالامگەر-ءجۋرناليستى, دارىندى ارىپتەستەرىمىزدى ەسكە الدىق. ولاردىڭ ىشىندە اقسەلەۋ سەيدىمبەك, دۇكەش بايىمبەتوۆ, ۆلاديمير كوچەنوۆ, تالعات ءىلىمجان, رافاەل جۇماباەۆ, جۇماتاي سابىرجانوۆ, وكتيابر الىبەكوۆ, جومارت ابدىحالىق, ۆلاديمير بويكو, مادريد رىسبەكوۆ, شاكيزادا قۇتتاياقوۆ, الماس جولتاەۆ, ولەگ كۆياتوۆسكي, ءبىرجان بەلعارا بار. ال ەكىنشى ەسكە الۋ كەشى 2013 جىلدىڭ 12 جەلتوقسانى كۇنى «جاستار» سارايىندا جوعارى دەڭگەيدە وتكىزىلدى. وندا ەلوردامىزدىڭ دامۋىنا جانە جۋرناليستيكاعا زور ۇلەس قوسقان ارىپتەستەرىمىز اسكەن نابيەۆ, باقتىباي شاحانوۆ, ۆلاديمير گۋندارەۆ, ەربول شايمەردەنوۆ, دۇكەنباي دوسجان, سابىرجان شۇكىروۆ, مارفۋعا بەكتەمىروۆا, اندرەي تريشەچكين, ناتاليا حاباروۆا, يۆان بالۋچەۆسكي تۋرالى بەينە-سيۋجەتتەر كورسەتىلىپ, اسەرلى ەستەلىكتەر ايتىلدى. ۇلكەن تەبىرەنىسپەن وتكەن شارادا كوزىنە جاس الىپ, كوڭىلى تولقىماعان جان بولمادى», دەدى سادىبەك تۇگەل.
وسىمەن ءۇشىنشى مارتە ۇيىمداستىرىلىپ وتىرعان كەشتە «تۇمار» جۋرنالىنىڭ نەگىزىن قالاۋشى, ونىڭ باس رەداكتورى, پوەزيا پاديشاسى فاريزا وڭعارسىنوۆا, «جاڭا سارىارقا» جۋرنالىنىڭ نەگىزىن قالاۋشى, باس رەداكتورى, اقىن نۇرعوجا وراز, «الەم ادەبيەتى» جۋرنالىنىڭ نەگىزىن قالاۋشى, باس رەداكتورى, جازۋشى كەڭەس يۋسۋپ, «استانا اقشامى» گازەتىنىڭ باس رەداكتورىنىڭ ورىنباسارى, جازۋشى ديداحمەت ءاشىمحان ۇلى, «ەكسپرەسس-ك» گازەتىنىڭ باس ديرەكتورى الەكسەي پان, «ەگەمەن قازاقستان» گازەتىنىڭ جاۋاپتى قىزمەتكەرى مارات اققۇل, قازاقستان رەسپۋبليكاسى پرەزيدەنتى تەلەراديو كەشەنىنىڭ رەداكتورى سماعۇل راحىمبەك, «استانا جاس تىلشىلەر كوزىمەن» فەستيۆالىنىڭ اۆتورى ءارى ۇيىمداستىرۋشىسى سۆەتلانا گاليەۆا, ەۋرازيا ۇلتتىق ۋنيۆەرسيتەتى جۋرناليستيكا فاكۋلتەتىنىڭ ۇستازى سەمباي قيسىم ۇلى, «ازامات تايمس» گازەتىنىڭ باس رەداكتورى ەرلان اقمۋرزين, «استانا راديوسىنىڭ» قىزمەتكەرى ءاليا ءجۇسىپوۆا, «حابار» تەلەارناسىنىڭ تىلشىلەرى ولگا لاتىنينا, ازامات قالىمبەتوۆ, سەرگەي ناسىروۆ, اگروۋنيۆەرسيتەتتىڭ ءباسپاسوز حاتشىسى ايجان جۇماباەۆا سەكىلدى ەرەن ەڭبەك يەلەرىنىڭ جارقىن بەينەسى جاڭعىردى.
استانا قالاسى اكىمدىگىنىڭ قولداۋىمەن, « ۇلى دالا قىراندارى» قوعامدىق مادەني-الەۋمەتتىك قوزعالىسىنىڭ ۇيىمداستىرۋىمەن جۇزەگە اسقان كەشتە ارىپتەس-قالامگەرلەردى ەسكە الىپ, ولاردىڭ شىعارماشىلىق جولىنداعى جەتىستىكتەرى مەن ەرەن ەڭبەكتەرى جانە ءومىر جولدارى تۋرالى ەسكىرمەس ەستەلىكتەر ايتىلدى.
راۋان قايدار,
«ەگەمەن قازاقستان»
