سۋرەتتى تۇسىرگەن: رۋفينا تورپيششەۆا
جالپى, مۇناي-گاز, مەتاللۋرگيا, ماشينا جاساۋ, كولىك تەحنولوگيالارى, تەحنولوگيالىق ماشينالار, ستاندارتتاۋ, مەترولوگيا جانە سەرتيفيكاتتاۋ, كولىكتى پايدالانۋ, جۇك قوزعالىسى مەن تاسىمالداۋدى ۇيىمداستىرۋ سالالارى بويىنشا مامان دايارلايتىن فاكۋلتەتتە 60-تان اسا وقىتۋشى-عالىمدار قىزمەت ەتەدى.
20 يننوۆاتسيالىق پاتەنتى, 132-دەن استام عىلىمي جۇمىستارى جاريالانعان فاكۋلتەت پروفەسسورلارىنىڭ ءبىرى ءابىلحان قاراقاەۆ جۋىردا «قازاقستاننىڭ ەڭبەك سىڭىرگەن ونەرتاپقىشى» اتاندى. فاكۋلتەت دەكانى قايرات ابىشەۆتىڭ ايتۋىنشا, جاڭا ءبىلىم جۇيەسىن وقىپ-ۇيرەنۋ ءۇشىن ستۋدەنتتەر نازارباەۆ ۋنيۆەرسيتەتىندە, وقىتۋشىلار ۇلىبريتانيا, جاپونيا, سينگاپۋر ەلدەرىندە بىلىمدەرىن جەتىلدىردى. بىرقاتار ستۋدەنتتەر پرەزيدەنت شاكىرتاقىسىنىڭ يەگەرى بولدى. ماشينا جاساۋ ماماندىعىنىڭ ستۋدەنتتەرى پولشانىڭ ليۋبلين تەحنيكالىق ۋنيۆەرسيتەتىنە, مەتاللۋرگيا ماماندىعى بويىنشا وقيتىن جاستار بولگاريانىڭ مەتاللۋرگيا ۋنيۆەرسيتەتىنە جىبەرىلىپ, بىلىمدەرىن جەتىلدىردى. سونداي-اق چەحيا, لاتۆيا مەن رەسەيدەن شاقىرىلعان وقىتۋشىلار ساباق بەرەدى. فاكۋلتەتتىڭ وقىتۋشىلىق الەۋەتىن مەتاللۋرگيا كافەدراسىنىڭ پروفەسسورى ا.بوگومولوۆتىڭ «ۆيلگەلم لەيبنيتس» مەدالىمەن ناگرادتالىپ, اعا وقىتۋشى ا.جاقىپوۆتىڭ مەتاللۋرگيا سالاسىنا ارنالعان جوباسى ءۇشىن ەلىمىزدىڭ «جاس عالىم» بايقاۋىندا 1-ورىندى جەڭىپ العانىنان كورۋگە بولادى.
ۋنيۆەرسيتەتتەگى كاسىپتىك اۋديتوريانىڭ اشىلۋىنا كاسىپورىن ديرەكتورىنىڭ كەڭەسشىسى ولەگ تيموشوۆ, وقۋ ورتالىعىنىڭ جەتەكشىسى اناستاسيا گريشينا جانە فاكۋلتەت عالىمدارى مەن ستۋدەنتتەرى قاتىستى. ەكىجاقتى ارىپتەستىك اياسىندا ءتيىمدى وقۋ پروتسەسىن ۇيىمداستىرۋ ءۇشىن قاجەتتى جابدىقتار مەن اقپاراتتىق-ادىستەمەلىك ماتەريالدارمەن قامتىلعان اۋديتوريا ەندى ستۋدەنتتەر ءۇشىن تاجىريبەلىك ساباققا ارنالعان الاڭ قىزمەتىن اتقارماق.
فاريدا بىقاي,
«ەگەمەن قازاقستان»
پاۆلودار
