بىلىكتى پەداگوگ بالالاردى ەشقاشان «جاقسى وقيتىندار» نەمەسە «جامان وقيتىندار» دەپ ءبولىپ-جارمايدى. س.جاقىپوۆانىڭ پايىمىندا بالالاردىڭ بارلىعى دا تالانتتى, تەك دەر كەزىندە ولاردىڭ قابىلەتىن اشا ءبىلۋ كەرەك. سوندىقتان دا بولار ۇستازدار قاۋىمى تاڭەرتەڭنەن قارا كەشكە دەيىن مەكتەپتە جۇرەدى. ويتكەنى ءاربىر بالانىڭ بولاشاعىنا الاڭداعان جاقسى مۇعالىم, وعان جەكە ۋاقىتىن دا ارنايدى. ۇلى اعارتۋشى ىبىراي التىنسارين بىلاي دەگەن ەكەن: «مۇعالىم بارىنەن دە قىمبات, ويتكەنى مۇعالىم – مەكتەپتىڭ جۇرەگى». ال استراحان اۋدانىنداعى №6 اگروتەحنيكالىق كوللەدج ديرەكتورىنىڭ ورىنباسارى ساۋلە جاقىپوۆا وقۋ ورداسىنىڭ جۇرەگىنە اينالعالى قاشان. ول ەشقاشان ۇستازدىق ەتۋدەن جالىققان ەمەس. ءاربىر وقۋشىنىڭ بويىنداعى جىگەرىن وياتىپ, ونىڭ ومىردەگى ءوز ورنى بارىنا, سوندىقتان دا ىزدەنىس قاجەتتىگىنە سەندىرە الاتىن جاقسى قاسيەتكە يە. بالالاردىڭ بويىندا بولاشاققا دەگەن نىق سەنىمدى ۇيالاتقان ۇلاعاتتى ۇستاز ارمانداردىڭ ورىندالماي قويمايتىندىعىنا دا سەندىرە بىلەدى. ءاربىر جەتىستىككە جەتۋ ءۇشىن ايانباي تەر توگۋ قاجەتتىگىن دە ەسكەرتۋدى نازاردان ءبىر ءسات شىعارعان ەمەس.
ءوزىنىڭ پەداگوگيكالىق ەڭبەك جولىن ساۋلە جاقىپوۆا 1987 جىلى جاڭا دالا اۋدانىنا قاراستى چاپاەۆ ورتا مەكتەبىندە ماتەماتيكا ءپانىنىڭ مۇعالىمدىگىنەن باستادى. ءبىراز جاسقا كەلگەن ونىڭ وسى ماماندىقتى تاڭداۋى دا قىزىقتى. 1979 جىلدان 1982 جىلعا دەيىنگى ارالىقتا اگرونوم-ەسەپشى بولىپ جۇمىس ىستەپ كەلگەن ساۋلە جاقىپوۆا سول جىلى پەداگوگيكالىق ءبىلىم بەرەتىن جوعارى وقۋ ورنىنا ءتۇسىپ, ماتەماتيكا پانىنەن مۇعالىم بولۋ تۋرالى ارمانىن ورىنداۋعا كىرىسىپ كەتەدى. سودان بەرگى ەڭبەك ءوتىلى – 40 جىل. ءوزىنىڭ ەڭبەك جولىندا ول پەداگوگتاردىڭ بىلىكتىلىگىن ارتتىرۋدا بەلسەندى جۇمىستار اتقارىپ, مۇعالىمدەر شەبەرلىكتەرىن ارتتىرا تۇسۋگە قۇلشىناتىن جاعداي جاساي ءبىلدى. مۇعالىمدەردىڭ ءوز بىلىمدەرىن تولىقتىرا تۇسۋگە قۇلشىندىرىپ, ولاردى اتتەستاتسيادان وتكىزۋ سياقتى ماڭىزدى مىندەتتەردىڭ قاسىنان تابىلىپ جۇرگەندە وسى ساۋلە حاميتقىزى. سول تىنىمسىز ەڭبەگى ءۇشىن دە ساۋلە جاقىپوۆا اقمولا وبلىسى اكىمىنىڭ قۇرمەت گراموتاسىمەن ماراپاتتالدى. سونىمەن قاتار ءبىلىم بەرۋ مەن تاربيەلەۋ پروتسەستەرىن جەتىلدىرۋ جانە ءبىرتۇتاس وقىتۋدى قامتاماسىز ەتۋ مەن تاربيەلەۋدەگى جەتىستىكتەرى ءۇشىن ء«بىلىم بەرۋ ءىسىنىڭ قۇرمەتتى قىزمەتكەرى» توسبەلگىسىنىڭ يەگەرى اتاندى.
اسقار تۇراپباي ۇلى,
«ەگەمەن قازاقستان»
اقمولا وبلىسى
