كونفەرەنتسيانى اشقان قازۇۋ-دىڭ پرورەكتورى م.بۇركىتباەۆ اكادەميك سۇلتان سارتاەۆتىڭ زاڭ عىلىمىنا قوسقان ولشەۋسىز ۇلەسى مەن قايراتكەرلىك بولمىسىنا ايىرىقشا توقتالىپ ءوتتى. الەمدىك ماڭىزى زور عىلىمي ەڭبەكتەرىمەن زاڭ عىلىمىنىڭ قازىناسىن بايىتا وتىرىپ, تەك ءوز ەلىمىزدە عانا ەمەس, تمد جانە الىس شەتەلەردە دە زاڭ-قۇقىق سالاسىنداعى تانىمال تۇلعاعا اينالدى. ول كوپتەگەن حالىقارالىق سەزدەر مەن سيمپوزيۋمداردىڭ, كونفەرەنتسيالاردىڭ قادىرلى قوناعى ءھام بەلسەندى قاتىسۋشىسى. اكادەميك س.سارتاەۆ 500-دەن اسا عىلىمي جانە عىلىمي-كوپشىلىك جۇمىستاردىڭ, 30-دان اسا مونوگرافيا مەن جيناقتاردىڭ اۆتورى. توقساننىڭ تورىنە شىقسا دا, قاتاردان قالماي قىزمەت ەتىپ, اياۋلى التىن قازىعى – قازۇۋ-دىڭ ارداگەرلەر كەڭەسىن باسقارىپ وتىر. سىر جاعالاۋىنان تۇلەپ ۇشقان سارتاەۆ ادامنىڭ بويىنداعى كىسىلىك قاسيەتتى بىلىممەن بىرىكتىرە وتىرىپ جەتىلدىرۋدى دانالىق مۇراتىنا اينالدىرعان. ول وزىمەن قاناتتاس بەلگىلى عالىمدارمەن بىرگە قازاقستانداعى زاڭ عىلىمىنىڭ ىرگەتاسىن قالاسىپ, مەملەكەتتىك-قۇقىقتىق قۇرىلىمنىڭ دامۋىنا زور ۇلەس قوستى.
كونفەرەنتسياعا مەملەكەتتىك ورگانداردىڭ وكىلدەرى – قازاقستان رەسپۋبليكاسى پرەزيدەنتى اكىمشىلىگى باسشىسىنىڭ ورىنباسارى ت.دوناقوۆ, كونستيتۋتسيالىق كەڭەس توراعاسى ي.روگوۆ, باس پروكۋرور ج.اسانوۆ, قازاقستاننىڭ جانە شەت مەملەكەتتەردىڭ زاڭ سالاسىنىڭ عالىمدارى, عىلىمي-زەرتتەۋ ينستيتۋتتارىنىڭ ماماندارى, «نۇر وتان» ساياسي پارتياسىنىڭ جانە قوعامدىق بىرلەستىكتەردىڭ وكىلدەرى قاتىسىپ, سۇلتان سارتاەۆتى 90 جىلدىعىمەن قۇتتىقتاپ, جىلى لەبىزدەرىن ءبىلدىردى. جيىن بارىسىندا سۇلتان سارتاەۆتىڭ اتىنا ەلباسى نۇرسۇلتان نازارباەۆتىڭ اتىنان قۇتتىقتاۋ حات وقىلدى.
«حالقىمىز ءوزىڭىزدى قازاقستان زاڭ عىلىمىنىڭ كورنەكتى وكىلى, ۇلاعاتتى ۇستاز جانە بەلگىلى قوعام قايراتكەرى رەتىندە قادىرلەيدى. ءسىز ونداعان جىلدار بويى جوعارى وقۋ ورىندارىندا ساباق بەرىپ, باسشىلىق جاساپ, بولاشاق زاڭگەرلەر مەن وسى سالاعا ارناپ عىلىمي كادرلار تاربيەلەدىڭىز. ءوزىڭىزدىڭ كەمەل ءبىلىمىڭىز بەن مول تاجىربيەڭىزدىڭ جانە زور ابىروي-بەدەلىڭىزدىڭ ارقاسىندا ەلىمىزدىڭ جوعارعى كەڭەسىنىڭ دەپۋتاتى بولىپ, تاۋەلسىز قازاقستاننىڭ مەملەكەتتىك-قۇقىقتىق جۇيەسىن قالىپتاستىرۋ مەن دامىتۋ ىسىنە سۇبەلى ۇلەسىڭىزدى قوستىڭىز. ءسىزدىڭ ونەگەلى ەڭبەك جولىڭىز بەن ەل يگىلىگىنە ارناپ اتقارعان ىستەرىڭىز ءوسىپ كەلە جاتقان ۇرپاقتار ءۇشىن ءاردايىم جاقسى ۇلگى بولىپ قالا بەرەدى دەپ ويلايمىن. مىقتى دەنساۋلىق, باياندى باقىت, اۋلەتىڭىزگە اماندىق پەن قۇت-بەرەكە تىلەيمىن», دەلىنگەن قۇتتىقتاۋ حاتتا.
كونفەرەنتسيا بارىسىندا سۇلتان سارتاەۆتىڭ ەڭبەكتەرىندەگى كسرو-نىڭ ىدىراۋ ۇدەرىسىنە بەرگەن ساياسي-قۇقىقتىق باعاسى تالدانىپ, ەگەمەندى جانە تاۋەلسىز قازاقستاننىڭ قالىپتاسۋىنا نەگىز بولعان ەڭبەكتەرىنىڭ عىلىمي ماڭىزدى تۇستارى اتالىپ ءوتتى. سۇلتان سارتاەۆتىڭ ەڭبەكتەرى ستۋدەنت جاستاردىڭ پاتريوتتىق جانە ونەگەلىك ساناسى مەن تاربيەسىنىڭ قالىپتاسۋىنا دا ۇلكەن اسەرى بار. سونداي-اق شارا بارىسىندا قازاقستان رەسپۋبليكاسىنداعى مەملەكەتتىك قۇرىلىستىڭ جانە قۇقىقتىق جۇيەنىڭ دامۋىن, ونى جەتىلدىرۋدىڭ نەگىزگى جولدارىن جانە كونستيتۋتسيالىق زاڭناما جۇيەسىن دامىتۋدىڭ نەگىزگى ماسەلەلەرى دە كەڭىنەن تالقىعا سالىندى.
ايگۇل احانبايقىزى,
«ەگەمەن قازاقستان»
الماتى
