اۋدارۋ جۇمىستارىنا كىتاپتىڭ اۆتورى – قر پرەزيدەنتى كەڭسەسىنىڭ باستىعى ماحمۇد قاسىمبەكوۆتىڭ ءوزى جەتەكشىلىك ەتتى. كىتاپتا پرەزيدەنت نۇرسۇلتان نازارباەۆتىڭ ءتۇرلى قيىندىقتار مەن قىزىقتى ساتتەرگە تولى ءومىرى تۋرالى, ونىڭ قازاقستانعا تونگەن قاۋىپ-قاتەرمەن كۇرەسى جايلى جازىلعان. ءماتىن ەلباسىنىڭ جەكە مۇراعاتىنداعى قۇجاتتارمەن جانە سۋرەتتەرمەن تولىقتىرىلعان.
ازەربايجان تىلىندەگى اۋدارماعا العى ءسوزدى ازەربايجان رەسپۋبليكاسى پرەزيدەنتىنىڭ قوعامدىق-ساياسي ماسەلەلەر بويىنشا كومەكشىسى, سول ەلدەگى پرەزيدەنت اكىمشىلىگىندە ءبولىم باسشىسى, تاريح عىلىمدارىنىڭ دوكتورى, پروفەسسور ءالي گاسانوۆ جازدى. تاعدىرى ورتاق ەكى مەملەكەتتىڭ دوستىق قارىم-قاتىناسىن ەرەكشە اتاپ وتكەن گاسانوۆ ەكى ۇلتتىڭ ومىرىندەگى كوشباسشىلاردىڭ رولىنە توقتالعان.
گاسانوۆتىڭ پىكىرىنشە, نۇرسۇلتان نازارباەۆتىڭ پاراساتتى ساياساتىنىڭ جەمىسى رەتىندە قازاقستانداعى تۇراقتىلىقتى, ۇلتتار مەن ەتنوستار اراسىنداعى تاتۋلىقتى اتاپ وتۋگە بولادى. قازاقستاندا ازاماتتىق بەيبىتشىلىك پەن جالپىحالىقتىق ىزەتتىلىك جاعدايىندا 130 استام حالىقتىڭ وكىلى بىرگە ءومىر ءسۇرىپ كەلەدى. سولاردىڭ قاتارىندا ازەربايجان حالقى دا بار.
كىتاپتى ورىس تىلىنەن اۋدارعان – ازەربايجان جوعارعى مەدياپرەمياسىنىڭ جانە حالىقارالىق تۇركى اكادەمياسىنىڭ يسمايل گاسپرينسكي اتىنداعى مەدياپرەمياسىنىڭ لاۋرەاتى, جۋرناليست-پۋبليتسيست ايدا ەيۆازوۆا. كونسۋلتانتتار – حالىقارالىق تۇركى اكادەمياسىنىڭ پرەزيدەنتى, پروفەسسور دارحان قىدىرالى جانە فيلوسوفيا دوكتورى, ميللي مەدجيليس دەپۋتاتى دجاۆانشير فەيزيەۆ. رەداكتور – ۆەلي اكپەروۆ.
