جيىن بارىسىندا ورتالىق سايلاۋ كوميسسياسىنىڭ مۇشەسى مارات سارسەمباەۆتىڭ كورشى ەلدەگى سايلاۋدى بايقاۋعا بارۋى جونىندەگى ماسەلە قارالدى. م.سارسەمباەۆ وتىرىستا وسى جونىندە باستاما كوتەرگەن بولاتىن. كوميسسيا مۇشەلەرى ونىڭ ۇسىنىسىن ءبىر اۋىزدان قابىلدادى. كوميسسيانىڭ شەشىمى قىرعىزستان تاراپىنا جەتكىزىلدى.
ورتالىق سايلاۋ كوميسسياسىنىڭ مۇنداي شەشىم شىعارۋىنا قىرعىزستان پرەزيدەنتى الماسبەك اتامباەۆتىڭ قازاقستاندى ايىپتاۋى سەبەپ بولىپ وتىر. ايتسە دە, قازاقستاندىقتار حالىقارالىق ۇيىمداردىڭ قۇرامىندا قىرعىزستان پرەزيدەنتىن سايلاۋ بارىسىنا باقىلاۋشى رەتىندە قاتىسا الادى. ەلىمىزدىڭ اتىنان قىرعىزستانعا اتتاناتىن باقىلاۋشىلار داۋىس بەرۋدىڭ ءادىل وتۋىنە مۇددەلى ەكەنىن ايتادى م.سارسەمباەۆ.
«قىرعىزستانعا باراتىن ارىپتەستەرىمىز ادىلدىكتى ءبىرىنشى ورىنعا قويادى. ولار بارىنشا وبەكتيۆتى باعا بەرۋگە تالپىنادى. الدا-جالدا حالىقارالىق ۇيىمدار داۋىس بەرۋ قىرعىزستاننىڭ كونستيتۋتسياسى مەن سايلاۋ زاڭناماسىنا ساي ءوتتى دەپ شەشىم شىعارسا, ءبىزدىڭ باقىلاۋشىلار سول پىكىردى ۇستانادى», – دەدى م. سارسەمباەۆ.
ورتالىق سايلاۋ كوميسسياسىنىڭ باسشىسى بەرىك يماشەۆتىڭ ايتۋىنشا, قازاقستان وزىنە بەرىلگەن حالىقارالىق مىندەتتەمەلەردى ورىنداي وتىرا قىرعىزستانداعى پرەزيدەنتتىك سايلاۋعا باقىلاۋشى رەتىندە وكىل جىبەرەدى. ونىڭ سوزىنە سۇيەنسەك, حالىقارالىق ۇيىمدار قۇرامىنداعى 46 قازاقستاندىق ايىر قالپاقتى اعايىنداردىڭ داۋىس بەرۋى قانشالىقتى ءادىل وتكەنىن بايقاپ قايتادى.
سونىمەن قاتار, جيىن بارىسىندا ا.اتامباەۆتىڭ مالىمدەسى شىندىققا ساي كەلمەيتىنى جانە ونىڭ سوزدەرى باۋىرلاس ەكى ەل اراسىنداعى دوستىققا سىزات تۇسىرمەيتىنى ءسوز بولدى.
