شىن مانىندە, قازاق ءتىلىن لاتىن جازۋىنا كوشىرۋ دە – «تسيفرلى ءداۋىر» تالاپتارىنان تۋىنداپ وتىر. مۇنى ەستىپ, «انا ءتىلىمىزدى تەمىر كومپيۋتەردىڭ الدىندا جىعىپ بەرەمىز بە؟!» دەپ شىن كەيىگەن سوزدەر شىعۋدا. جىقپايمىز! بۇل قايتا بولاشاقتا قازاق ءتىلىن جوعالتپاۋدىڭ قامى بولىپ تابىلادى. ءتىلىمىز تۇرلەنسىن, تۇلەسىن, ماڭگىلىك ەلمەن بىرگە جاساسىن دەسەك, ءبىز وسى وزگەرىسكە بارۋىمىز كەرەك.
ويتكەنى تسيفرلى بولاشاق, زاماناۋي اقپاراتتىق تەحنولوگيالار دوڭگەلەنگەن دۇنيەدە ءتىل تۇگىل, مەملەكەتتىڭ ءرولى مەن فۋنكتسيالارىن وزگەرتۋدە. مامانداردىڭ ايتۋىنشا, ماسەلەن, بۇعان دەيىن اقشا ەميسسياسى, ياعني قاراپايىم تىلمەن ايتقاندا, ۆاليۋتانى باسىپ شىعارۋ تەك مەملەكەتتەردىڭ عانا ايرىقشا قۇزىرەتى بولسا, قازىر دۇنيە جۇزىندە كەز كەلگەن ادام ءوز كومپيۋتەرىنىڭ بەينەكارتاسىن پايدالانىپ, كريپتوۆاليۋتا جاسايتىن بولدى. ال بلوكچەين تەحنولوگيالار, ءتىپتى الپاۋىت دەرجاۆالاردىڭ قارجىلىق وپەراتسيالارعا باقىلاۋ جاساۋ فۋنكتسيالارىن قاۋقارسىز ەتۋدە. بۇل سىن-قاتەرگە مەملەكەتتەر تەك ينتەگراتسيالانۋ جانە حالىقارالىق كووپەراتسيالانۋ ارقىلى جاۋاپ بەرمەك. سەبەبى, تسيفرلى داۋىردە ناقتى ءبىر ەلدىڭ اۋماعىندا توسقاۋىل قويۋ جانە تولىق تىيىم سالىپ تاستاۋ مۇمكىن بولماي قالدى.
قازاقستان دامىعان ەلدەردىڭ قاتارىنا تۇرىپ, بىرگە ادىمداۋى, تسيفرلى زامان اكەلگەن ەركىندىك پەن اشىقتىقتىڭ جاڭا دارەجەسىنە دايىن بولۋى شارت.
ونىڭ ۇستىنە جاڭا تسيفرلى ەكونوميكادا مۇناي مەن گاز دامىعان مەملەكەتتەردىڭ تابىسىنىڭ باستى كوزى بولمايدى. تابىستىڭ نەگىزگى باستاۋى دا ءىت-تەحنولوگيالار بولماق.
قازاق ءتىلىنىڭ ەسكى كيريلليتسادان لاتىن گرافيكاسىنا كوشۋىمەن بىرگە كوز ۇيرەنگەن ءومىردىڭ دە وزگەرۋىنەن قايمىعاتىن ازاماتتارعا ايتارىم: اعايىن, ءومىر ونسىز دا وزگەرۋدە. بىزدەن تەك وعان لايىقتى قيمىل تالاپ ەتىلەدى. ەسكى سۇرلەۋلەر سورعا باستايدى. جاڭاشا ويلاماۋ جارعا جىعادى.
«قازاق ەلى بولماسىن, ىلگەرى وزباسىن» دەيتىندەر قاشان دا ۇلتىمىزدى ۇرەي قۇشاعىندا ۇستاۋعا تىرىسادى. بوداندىقتان تەك شيرەك عاسىر بۇرىن عانا قۇتىلىپ, وڭى مەن سولىن ەندى تانىپ كەلە جاتقان ءاز ۇلتىمىزدىڭ ءار قادامىنا ۇنەمى كۇدىك بايلاپ, كۇمانداندىرىپ, ازاماتتاردىڭ سانا-سەزىمدەرىن تۇرمىس تۋدىرعان كەلەڭسىز جايلار ارقىلى ەزىپ, ەرىك-جىگەرىن بۋىپ, ەڭسەسىن كوتەرتپەستەي كۇي كەشتىرۋدى قالايدى.
ەل ءوز ىسىنە ءوزى ۇيالىپ, قورقىنىشقا بوي الدىرىپ, كۇمىلجىگەن تۇستا ۇلتتىق تۇتاستىق كۇيرەيدى. ول ەندى ۇلت ەمەس, ءار وكىلى ءوز قارا باسىن عانا كۇيتتەيتىن توبىرعا اينالادى. سوندىقتان دا ەلباسى ءاردايىم باسى ارتىق كۇيزەلىس پەن كۇيگەلەكتىككە سالىنباۋعا, اسىقپاي, بايىپپەن قوزعالۋعا شاقىرادى, قازاقستاندىقتار بويىنا سەنىم ۇيالاتا, ءۇمىت بەرە سويلەيدى. وسىلايشا, جارقىن بولاشاققا باستايدى.
قازاقستان پرەزيدەنتى دە – ۇلى دالا ەلىنىڭ تۇلعاسى, ۇلتىنىڭ ارىسى. ەلباسى ۇلى بەتبۇرىسقا كىرىسپەس بۇرىن, ەلدىڭ بۇگىنى مەن بولاشاعى تۋرالى وي تولقىندارىن قۋاتتى سەزىم اعىسىمەن جۇرەكتەن وتكىزە وتىرىپ, وڭى مەن تەرىسىن تارازىعا تەڭ تارتا باعامدايدى, ءسويتىپ, سارابدال ءجون-جوسىعىن, ەڭ ىزگىسىن ەلدىڭ تالقىلاۋىنا سالادى.
ونىڭ ەلىمىزدىڭ, جەرىمىزدىڭ تاريحىنا, اتا-بابا شەجىرەسىنە, حالىقتىڭ سالت-داستۇرىنە جەتىكتىگى جەكە ءبىر تاقىرىپ, ۇلكەن ءبىر اڭگىمە ارقاۋى. بۇل ونىڭ وزىنە اللانىڭ بەرگەن سىيى, اتا-بابانىڭ قانىمەن دارىعان قاسيەتى, جىلدار وتە ۇشتالعان شەبەرلىك-دارىنى. ياعني ول قازاق ءتىلىنىڭ بولاشاعىنا الاڭدايتىن, سوعان تەك جاقسىلىق تىلەيتىن تۇلعا.
دەمەك, ەلباسىمىزدىڭ وسى باستاماسى قازاق ءتىلىنىڭ قامىن جەگەن ءار ازامات, ءتىلىمىزدى اسىل قۇندىلىققا, ۇلكەن بايلىققا بالايتىن جۇرتتىڭ كوكىرەگىنە وي ساۋلەسىن تۇسىرۋگە ءتيىس. ۇلىلاردىڭ تالعامى, تاعىلىمى مەن ورەسى سانالى جاننىڭ جولىنا باعىت بەرىپ, كەلەلى ويعا جەتەلەيتىنى زاڭدىلىق. ال ناعىز كوشباسشىنىڭ تۇپكى ماقساتى دا سول – حالقىن ءىرى ىستەرگە ۇمتىلدىرۋ بولسا كەرەك. مەملەكەت باسشىسىنىڭ بۇل باستاماسى دا ماڭگىلىك ەل قۇرامىن دەگەن ارماندى تىلەكتەن, ەلىن سۇيگەن پەرزەنتتىك جۇرەكتەن تۋىنداعانى ءسوزسىز.
كوپشىلىك بىلە بەرمەيدى, كەزىندە ۆ.لەنين بۇكىل كەڭەس وداعىن لاتىن گرافيكاسىنا كوشىرمەك بولعان. ودان بۇرىن كريلليتسانى لاتىنشاعا اۋىستىرۋ ءۇردىسى كوپتەگەن سلاۆيان مەملەكەتتەرىن قامتىعان-تىن. اعايىندى كيريلل مەن مەفودي پراۆوسلاۆ دىنىنە وتكەن سلاۆيان حالىقتارى ءۇشىن ويلاپ تاپقان كيريلليتسانى لاتىنشاعا العاشقى بولىپ, رەچ پوسپوليتا (قازىرگى پولشا) مەن ليتۆا كنيازدىعى اۋىستىرعانى ءمالىم.
ايتپاقشى, كەڭەس وداعى دۇرىلدەپ تۇرعان داۋىردە دە ونىڭ قۇرامىنداعى 3 بالتىق ەلى – ليتۆا, لاتۆيا جانە ەستونيا لاتىن الىپبيىمەن ءومىر سۇرگەن. ولاردى كۇشتەپ كيريلليتساعا كوشىرۋگە كەڭەس وكىمەتى ءتىپتى تالاپتانعان دا جوق: سەبەبى, كيريلليتسا بۇل ەلدەردىڭ تىلىندە بار دارا, ءتول دىبىستاردى اۋىستىرا الار بالامانى ءوزىنىڭ ارىپتىك قاتارىندا تابا المادى.
وتكەن عاسىرلاردا وڭتۇستىكەۋروپالىق ەلدەردە دە لاتىن گرافيكاسى كيريلليتسانى ىعىستىرىپ شىعاردى. ماسەلەن, بۇعان دەيىن كيريلل جازۋىن پايدالانىپ كەلگەن رۋمىنيا ءحىح عاسىردا لاتىنشاعا كوشىپ الدى. كسرو ىدىرار تۇستا, 1989 جىلدىڭ 31 تامىزىندا مولدوۆا كسر-ءىنىڭ ۇكىمەتى شەرۋگە شىققان حالىقتىڭ تالابىمەن ءوز اۋماعىندا كيريلل ءالىپبيىنىڭ كۇشىن جويدى دا, لاتىن قارپىندەگى رۋمىن جازۋىن ەنگىزدى.
چەرنوگوريا مەن سەربيادا لاتىن جازۋى كەڭ تانىمال بولۋدا. ماسەلەن, سەربيادا رەسمي ءالىپبي – كيريلليتسا بولىپ تابىلادى, بىراق تاياۋدا جۇرگىزىلگەن ساۋالناما بۇل ەلدە جاستاردىڭ تەك 18,1%-ى عانا كيريلليتسادا جازاتىنىن كورسەتكەن. قالعاندارى لاتىن قارىپتەرىنە نەگىزدەلگەن سەربيالىق بەيرەسمي ءالىپبيدى («گاەۆيتسا») قولدانادى.
ءبىرىنشى بولىپ, رەسەيدە كيريلليتسادان باس تارتۋعا ءبىرىنشى پەتر تالاپتانىپ كوردى. ول ءتىل رەفورماسىن جۇرگىزىپ, «ازبۋكاداعى» بىرقاتار ارىپتەردى ەۋروپالىق بالامالارىمەن اۋىستىردى. بىراق كەيىن بۇل يدەيادان باس تارتىپ, ءبارىن ەسكى قالىپقا كەلتىردى. كەيىن بيلىك باسىنا كەلگەن ۆلاديمير لەنين لاتىنشاعا قايتا ورالدى. ول قازان رەۆوليۋتسياسىنان كەيىن بىرەگەيلەندىرۋ رەفورماسىن (رەفورما ۋنيفيكاتسي) قولعا الدى. ونىڭ بارىسىندا الدىمەن حالىق كوميسسارلارى كەڭەسىنىڭ دەكرەتىمەن, ەجەلدەن ورىس قوعامى ءۇشىن كوز ۇيرەنىستى, قۇلاق ءسىڭىستى بولعان «ساجەن», «ارشين», «وسمۋحا», «پۋد», «زولوتنيك» سەكىلدىلەر ورنىنا ەۋروپالىق كيلومەتر, ليتر, كيلوگرامم سەكىلدى قاشىقتىقتى, كولەمدى جانە سالماقتى ولشەۋدىڭ زاماناۋي بىرلىكتەرى ەنگىزىلدى. ىزىنشە ەۋروپالىق كۇنتىزبە-كالەندار قابىلداندى. وسىدان كەيىن بۇكىل كەڭەستىك وداقتاس رەسپۋبليكالار ءتىلى لاتىن گرافيكاسىنا كوشۋگە ءتيىس بولعان.
«تەپەر نادو پروۆەستي ەششە ودنۋ رەفورمۋ: ۆ ينتەرەساح رۋسسكوگو پروسۆەششەنيا زامەنيت رۋسسكي شريفت لاتينسكيم. ناش الفاۆيت چەرەسچۋر سلوجەن ي ناستولكو وتليچاەتسيا وت پرينياتوگو ۆ زاپادنوي ەۆروپە, چتو ينوسترانتسى پريحوديات وت نەگو ۆ ۋجاس. نام سلەدۋەت پەرەيتي ك لاتينسكومۋ شريفتۋ, بولەە پروستومۋ ي يزياششنومۋ, پودوبنو تومۋ, كاك مى پەرەشلي وت رۋسسكوگو كالەنداريا ك وبششەەۆروپەيسكومۋ ي ك مەتريچەسكوي سيستەمە ۆمەستو پۋدوۆ ي ارشينوۆ», دەپ جازدى 1919 جىلى «يزۆەستيا» گازەتى.
وسى ماقساتتا كەڭەستىك لينگۆيستەر كيريلليتسادا جازىلعان بارلىق رەسەيلىك ماڭىزدى قۇجاتتاردى, ەڭبەكتەردى وزگەرتۋ بويىنشا از ۋاقىت ىشىندە وراسان زور جۇمىس جۇرگىزەدى. الايدا «بولشەۆيكتەر كوسەمىنىڭ» ءومىرى ۇزاق بولماعانى بەلگىلى. ونىڭ ورنىن باسقان ي.ستالين باتىس ەلدەرىمەن تايتالاسقا تۇسەدى دە, بۇل يدەياعا توقتاۋ سالادى.
سونىمەن بىرگە, يوسيف ستالين باتىسقا قارسى تۇرعان تاۋەلسىز تۇركياعا جانە ونىڭ كوشباسشىسى مۇستافا كەمال اتاتۇرىككە قولداۋى رەتىندە 1929 جىلى كسرو-داعى نەگىزىنەن, اراب جازۋىن پايدالانعان تۇركىتىلدەس حالىقتاردىڭ بارلىعىن لاتىن گرافيكاسىنداعى بىرىڭعاي تۇركى الىپبيىنە (جاڭا ءالىپبي, «ياناليف») كوشىرەدى: ول تۇستا اتاتۇرىك ءى-ءشى جاھاندىق سوعىستا جەڭىسكە جەتكەن انتانتا ەلدەرىنىڭ (انگليا, فرانتسيا, يتاليا, گرەكيا) 1920 جىلعى سەۆر بەيبىت كەلىسىمىنىڭ شارتتارى بويىنشا تۇركيا دەگەن مەملەكەتتى تولىق جويىپ, ونىڭ جەرىن ءوزارا بولىسكە سالۋ ارەكەتىنە قارسى تەگەۋرىن تانىتىپ جاتقان ەدى. سونداي-اق ءدال سول 1929 جىلدىڭ 1 قاڭتارىنان اتاتۇرىك تۇركيادا اراب جازۋىن جويىپ, جاڭا لاتىنشا ءالىپبي ەنگىزگەن-ءتىن.
الايدا كەيىن ساياسات ساحناسىنداعى جاعداي وزگەرىپ كەتتى دە, اتاتۇرىكپەن اراسى اشىلعان ستالين الەم دۇرلىگىپ, ءىى دۇنيەجۇزىلىك سوعىس تۇتانىپ جاتقان تۇستا, ياعني 1940 جىلى تۇركىتىلدەس رەس-پۋبليكالاردى, سونىڭ ىشىندە قازاق كسر-ءىن دە قايتادان كيريلليتساعا اسىعىس كوشىردى. دەمەك, قازاقستانداعى كيريلليتسانى ء«ستاليننىڭ مۇراسى» دەپ ايتۋعا نەگىز بار.
جالپى, الەمدە كيريلليتسا «كوممۋنيزم» جانە «ازاتتىقتان ايىرىلۋ» ۇعىمدارى قاتارىندا قابىلدانادى. جانە كسرو ىدىراعالى بەرى كيريلليتسانى قولدانۋ اياسى ۇدايى تارىلىپ كەلەدى.
بۇگىندە لاتىن گرافيكاسىنىڭ فۋنكتسياسى الدەقايدا كەڭ. ول, سونداي-اق جەر جۇزىندەگى ەڭ كوپ تارالعان ءالىپبي سانالادى: دۇنيە جۇزىندەگى تاۋەلسىز ەلدەردىڭ 70 پايىزعا جۋىعى لاتىن گرافيكاسىن پايدالانادى. ەڭ باستىسى, ءبىز ۇمتىلىپ وتىرعان الەمدەگى وزىق وتىزدىقتاعى ەلدەردىڭ باسىم كوپشىلىگى, 22-ءسى تەك لاتىن قارپىن قولدانادى. قازىرگى ۋاقىتتا حالىقارالىق دەڭگەيدە اقپارات الماسۋدىڭ باستى قۇرالى لاتىن جازۋى بولىپ تۇر. الەمدەگى بارلىق اقپاراتتىڭ 70 پايىزدايى لاتىن قارپىمەن جازىلادى. عىلىمي اشىلىمدار, تەحنولوگيالىق جاڭالىقتار دا الدىمەن لاتىنشا گرافيكادا جاريالانادى.
جاھاندىق ەنتسيكلوپەديالار مالىمەتىنشە, بۇگىنگى تاڭدا عالامشارداعى وقي بىلەتىن ادامداردىڭ بارلىعى دەرلىك لاتىن الىپبيىمەن تانىس: سەبەبى, ول قارىپتەر ماتەماتيكا, حيميا, نەمەسە شەت تىلدەرى پانىندە پايدالانىلادى. سونىڭ ارقاسىندا بۇل «حالىقارالىق قاتىناستار الىپبيىنە» اينالدى.
بۇل بارلىق كورسەتكىشتەر بويىنشا يەروگليفتەر مەن كيريلليتسا كوپ كەيىن قالدى. قىتاي جانە جاپون تىلدەرىندەگى كوپتەگەن سوزدەر قازىر لاتىنشا جازىلادى, ول بانكتىك قۇجاتتاردا دەربەس دەرەكتەردى جازۋ ءۇشىن كەڭ قولدانىلادى. قىتاي حالىق رەسپۋبليكاسى, جاپونيا سەكىلدى يەروگليفپەن جازاتىن مەملەكەتتەر ءوز تىلدەرىندەگى بارلىق سوزدەردى لاتىنشا جازۋدى ءبىر ستاندارتقا كەلتىرىپ العان جانە ول مەكتەپتەردە وقىتىلادى.
مامانداردىڭ ايتۋىنشا, اقپاراتتىق عاسىر العا وزعان سايىن كيريلليتسامەن جازۋعا بايلانىستى تۋىندايتىن تەحنيكالىق قيىندىقتار دا كوبەيگەن كورىنەدى. ماسەلەن, حالىقارالىق تەلەگراممالار اۋەل باستان تەك لاتىنشا جازىلىپ كەلگەنى ەستە. ال قازىر كليەنتتىڭ كومپيۋتەرلىك تەحنيكاسى نە ۇيالى تەلەفونى كيريلليتسانى قولدامايتىندىقتان, ورىس تىلىندەگى حات-حاباردى لاتىنشا جازىپ, جولداۋ ءجيى كەزدەسەدى. «ترانسليت» (ياعني, ءماتىندى بوتەن الفاۆيت كومەگىمەن بەرۋ) ۇدەرىسى قازاقستاندا دا كەڭ تارالعان. بۇل رەتتە لاتىن گرافيكاسىنداعى بىرىڭعاي ستاندارت بولماعاندىقتان, قازاق ءتىلىن دارالاپ تۇرار, وزىنە عانا ءتان ءتول دىبىستارعا جويىلۋ قاۋپى تونەدى, سەبەبى, ء«ا» ءارپى «a»-مەن, «ڭ» – «n»-مەن, ء«و» – «و»-مەن اۋىستىرىلا سالىنادى. حالىق تالقىسىنان وتكەن جاڭا ءالىپبيدىڭ قابىلدانۋىمەن بىرگە بۇعان دەگەن قاجەتتىلىك تە جويىلىپ, كەسىر تاجىريبە توقتايتىن بولادى.
لاتىن جازۋىنا كوشۋدىڭ ەكونوميكالىق نەگىزدەرى دە بار. باسقانى ايتپاعاندا, بۇگىندە دۇنيە جۇزىندە تۋريستەردىڭ ەڭ كوپ كەلۋى بويىنشا نەگىزىنەن لاتىن جازۋىن قولداناتىن ەلدەر الدا تۇر. بۇل پسيحولوگيالىق فاكتورلارمەن تۇسىندىرىلەدى. شەتەلدىك ازاماتتار ءتىپتى ءتىل بىلمەگەننىڭ وزىندە, بوگدە ەلدەگى وزىنە كەرەكتى دۇكەننىڭ, نە مەكەمەنىڭ لاتىنشا جازىلعان ماڭدايشاسىن وقۋعا قاۋقارلى بولعىسى كەلەدى, سوندا ول ءوزىن بۇل ەلدە جات ەمەس, الدەقايدا ەركىن سەزىنەدى. سول سياقتى بيزنەسمەندەر دە وزىنە تانىس لاتىن ارىپتەرىمەن ىستەس بولعاندى قالايدى. دۇنيەجۇزىلىك بانكتىڭ Doing Business رەيتينگىندە بيزنەس جۇرگىزۋ ءۇشىن ەڭ تارتىمدى وتىز ەلدىڭ 25-ءى تەك لاتىن نەگىزىندەگى ءالىپبيدى پايدالانادى. دەمەك, لاتىن گرافيكاسىنا ءوتۋىمىز قازاقستانعا ينۆەستورلاردى, سونداي-اق ساياحاتتاۋشىلاردى تارتۋعا دا ىقپال ەتپەك.
ءدال سول سياقتى قازاق ءتىلىنىڭ لاتىن گرافيكاسىنداعى جاڭا الىپبيىنە كوشۋىمىز قازاقستان حالقىنىڭ, اسىرەسە, جاستارىمىزدىڭ الەمدىك قازىرگى زامانعى تەحنولوگيالىق ورتاعا, كوممۋنيكاتسياعا, سونداي-اق, عىلىمي جانە ءبىلىم بەرۋ پروتسەسىنە تەرەڭىرەك كىرىگۋىنە جول اشادى.
لاتىن جازۋىنا كوشۋىمىز مەملەكەتتىك ءتىلدىڭ ءورىسىن كەڭەيتپەك. سەبەبى, جاڭا الىپبيگە حالىقتى ۇيرەتۋ بويىنشا كەڭ اۋقىمدى بۇقارالىق كۋرستار ۇيىمداستىرا وتىرىپ, سونىمەن بىرگە قازاقستاندىقتاردى مەملەكەتتىك ءتىلدى ۇيرەنۋگە تارتۋدىڭ ماڭىزدى مۇمكىندىگىنە يە بولامىز.
بۇل حالىقارالىق قوعامداستىق وكىلدەرىنىڭ قازاق ءتىلىن ۇيرەنۋ جولىن دا جەڭىلدەتپەك. ايتپەسە, قازىر شەتەلدىكتەردەن, ماسەلەن, شەت مەملەكەتتەردىڭ ەلىمىزدەگى ەلشىلەرىنەن ءتىل ۇيرەنۋ ءۇشىن الدىمەن كيريلليتسانى مەڭگەرۋ تالاپ ەتىلەدى.
دەمەك, لاتىن گرافيكاسىنا كوشۋ ارقىلى انا تىلىمىزدەن – بابانىڭ ءتىلى عانا ەمەس, ودان وزىق قوعامنىڭ, زاماننىڭ, ءتىپتى عالامنىڭ ءتىلىن جاسايتىن بولامىز.
قازىرگى كەزدە قازاق ءالىپبيىنىڭ لاتىن گرافيكاسىنداعى جوباسىن جالپىحالىقتىق تالقىلاۋ جۇرۋدە. قازاقتىڭ جاڭا جازۋىنىڭ سىنشىسى دا, تىلەكشىسى دە, تورەشىسى دە حالىق بولماق. دەمەك, ءالىپبيدىڭ اقىرعى نۇسقاسىنىڭ قانداي بولاتىنى دا بارشا قازاقستاندىقتارعا بايلانىستى بولۋعا ءتيىس.
بۇل باستاما ءبولىنىپ-جارىلۋعا ەمەس, ەسكىدەن ارىلۋعا, سانانىڭ جاڭعىرۋىنا, مەملەكەتتىك ءتىلدىڭ جاڭاشا دامۋىنا باس-تايدى. تاۋەلسىز قازاق ەلىنىڭ ازاماتتارىنا الدەنەنى سىرتتان تاڭۋعا ەشكىمنىڭ حاقىسى جوق. بۇل – ءبىزدىڭ, قازاقستاننىڭ تاۋەلسىز, وركەنيەتتىك تاڭداۋى. بۇل تاڭداۋدا دا بارشا قازاقستاندىقتاردىڭ كەزەكتى رەت ىرىس پەن ىزگىلىككە ۇشتاسار بىراۋىزدىلىق تانىتارىنا سەنىم بىلدىرەمىن.
باحىتبەك سماعۇل,
پارلامەنت ءماجىلىسىنىڭ دەپۋتاتى,
اۋعان سوعىسى ارداگەرلەرى ۇيىمدارىنىڭ «قازاقستان ارداگەرلەرى» قاۋىمداستىعىنىڭ توراعاسى
