«…قازاقستاندىق تاراپ ۇستىمىزدەگى جىلعى 19 قىركۇيەكتە الماتى قالاسىندا قازاقستان رەسپۋبليكاسىنىڭ پرەزيدەنتى ن.ءا.نازارباەۆتىڭ قىرعىز رەسپۋبليكاسىنىڭ پرەزيدەنتتىگىنە كانديداتتاردىڭ بىرىمەن بولعان كەزدەسۋىنە وراي قىرعىز رەسپۋبليكاسىنىڭ سىرتقى ىستەر مينيسترلىگىنىڭ ارەكەتىنە قاتتى تاڭدانىس بىلدىرەدى.
مەملەكەت باسشىسىنىڭ ءارتۇرلى ەلدەردىڭ كورنەكتى ساياسي قايراتكەرلەرىمەن جانە ساياسي پارتيالاردىڭ باسشىلارىمەن ولاردىڭ ءوتىنىشى بويىنشا كەزدەسۋلەرى تۇراقتى تۇردە وتكىزىلىپ تۇرادى جانە حالىقارالىق تاجىريبەگە تولىق سايكەس كەلەدى. بۇل رەتتە مۇنداي ءىس-شارالار اشىق, ترانسپارەنتتى سيپاتتا ءوتىپ, بۇقارالىق اقپارات قۇرالدارىندا كەڭىنەن جاريالانادى.
ماسەلەن, ۇستىمىزدەگى جىلعى 14 تامىزدا استانادا مەملەكەت باسشىسى قىرعىز رەسپۋبليكاسىنىڭ پرەزيدەنتتىگىنە كانديداتتاردىڭ ءبىرى, بۇرىنعى پرەمەر-مينيستر س. جەەنبەكوۆپەن وسىنداي ەكىجاقتى كەزدەسۋ وتكىزدى.
وعان قوسا, مەملەكەت باسشىسىنىڭ تۇجىرىمدارىن قىرعىز رەسپۋبليكاسى سىرتقى ىستەر مينيسترلىگىنىڭ بۇرىس تۇسىندىرۋىنە تۇسىنبەستىك بىلدىرەمىز. اتالعان كەزدەسۋلەر بارىسىندا قازاقستان رەسپۋبليكاسىنىڭ پرەزيدەنتى قىرعىز رەسپۋبليكاسى پرەزيدەنتتىگىنە قانداي دا ءبىر ناقتى ۇمىتكەردىڭ پايداسىنا قولداۋ بىلدىرگەن جوق. ونىڭ ۇستىنە, استانا جانە الماتى قالالارىندا قىرعىز وكىلدەرىمەن كەلىسسوزدەر بارىسىندا مەملەكەت باسشىسى باۋىرلاس قىرعىز حالقى سەنىم ءبىلدىرىپ, سايلايتىن قىرعىز رەسپۋبليكاسىنىڭ كەز كەلگەن پرەزيدەنتىمەن ءتيىمدى ءوزارا ءىس-قيمىل جاساۋعا دايىن ەكەنىن ايتتى.
وسىعان بايلانىستى قىرعىز رەسپۋبليكاسىنىڭ ىشكى ىسىنە ارالاسۋعا جانە ەل حالقىنىڭ تاڭداۋىنا ىقپال ەتۋ ارەكەتىنە قاتىستى قىرعىز تاراپىنىڭ ويدان شىعارىلعان تۇجىرىمدارىن تاباندى تۇردە جوققا شىعارامىز.
قىرعىز رەسپۋبليكاسى سىرتقى ىستەر مينيسترلىگىنىڭ مۇنداي ارەكەتى قازاقستاندىق تاراپ ادالدىق تانىتاتىن, ەكى حالىق اراسىنداعى ءداستۇرلى باۋىرلاستىق قاتىناستارعا جانە قازاقستان رەسپۋبليكاسى مەن قىرعىز رەسپۋبليكاسى اراسىنداعى وداقتىق قارىم-قاتىناستار تۋرالى شارتقا تۇبەگەيلى قايشى كەلەدى دەپ سانايمىز...», دەلىنگەن جاۋاپ نوتادا.
