جاڭارتىلعان ءبىلىم بەرۋ مازمۇنى اياسىنداعى باعدارلامالاردى ىسكە اسىرۋ ءۇشىن مۇعالىمدەردى بىلىممەن, داعدىلارمەن قامتاماسىز ەتۋ جانە ولاردىڭ پىكىرلەرىن وزگەرتۋگە ىقپال ەتۋ جەتكىلىكتى ەمەس ەكەندىگىن كورىپ وتىرمىز. مەكتەپكە وزگەرىس ەنگىزىپ, ونى باسقارۋدا يننوۆاتسيالىق قادام جاساۋ ءۇشىن جاڭا مادەنيەت قۇرۋ قاجەتتىگى تۋىندادى.
وسى ورايدا, مەكتەپ باسشىلارىنىڭ الدىندا «XXI عاسىردا نەنى وقىتۋ كەرەك؟», «مۇعالىمدەر وقۋشىلاردى XXI عاسىرعا قالاي دايىندايدى؟» جانە «XXI عاسىردا مەكتەبىمدى تابىسقا قالاي جەتەلەيمىن؟» دەگەن سۇراقتارعا بىرلەسىپ جاۋاپ ىزدەۋ ماسەلەسى تۇرعانى ايدان انىق. سەبەبى, وتكەن عاسىرداعى جۇيە مەن تاۋەلسىز قازاقستاندىق ءبىلىم بەرۋ سالاسىنداعى ايتۋلى ايىرماشىلىقتار تۋرالى ايتاتىن بولساق, بۇل قازاقستاندا عانا ەمەس, الەم ەلدەرىندە بالالاردى «قالاي وقىتۋ كەرەكتىگى» تۋرالى وزەكتى ماسەلەگە باسىمدىق بەرۋ قاجەتتىلىگىن تەرەڭ ءتۇسىنۋدى كوزدەپ وتىر. ال «XXI عاسىردا تابىستى بولۋ ءۇشىن مەكتەپ وقۋشىسى قانداي داعدىلاردى مەڭگەرۋى كەرەك؟» دەگەن سۇراقتىڭ جاۋابىن ەلىمىزدەگى ءبىلىم سالاسىندا بولىپ جاتقان جاڭالىقتاردان ىزدەگەنىمىز ءجون بولار.
جاھاندانۋ زامانىندا ءوز ءتىلىن, سالت-ءداستۇرىن جوعالتىپ الماي, جاڭا عاسىر باسەكەسىنە تۇسە الاتىن, «وزگەرمەلى ومىرگە يكەمدى» بالا وقىتىپ, تاربيەلەۋ جاڭارتىلعان ءبىلىم بەرۋ باعدارلاماسىنىڭ نەگىزگى يدەياسى. سوندىقتان جاڭارتىلعان ءبىلىم بەرۋ جاعدايىندا ديرەكتور كوشباسشىلىعىنا قويىلاتىن تالاپتار دا كۇشەيىپ وتىر. مەكتەپتەگى وزگەرىستەردى باسقارىپ, جەتەكشىلىك ەتۋ ءۇشىن مەكتەپ ديرەكتورىنا نەگىزى ءۇش تالاپ قويىلادى. العاشقىسى ءوز ۇجىمىندا ورتاق ۇستانىم مەن قۇندىلىقتاردى قالىپتاستىرۋ, كەلەسىسى مەكتەپ كوشباسشىلىعى مەن ونى باسقارۋ تۋرالى مىقتى ءبىلىم مەن تۇسىنىك قالىپتاستىرۋ جانە ءتيىستى جەكە قاسيەتتەردىڭ, الەۋمەتتىك داعدىلاردىڭ بولۋى مەن ادامدارمەن قارىم-قاتىناس جاساۋ ونەرىن يگەرۋ.
بۇگىندە وبلىستىق ديرەكتورلار كەڭەسى قۇرىلىپ, 2017-2019 جىلدارعا ارنالعان «تابىستى باسشى» جوباسى ازىرلەنگەن. جوبانىڭ نەگىزگى ماقساتى زاماناۋي پەداگوگيكالىق تاسىلدەر مەن ءبىلىم بەرۋ تاجىريبەسى نەگىزىندە مەكتەپ باسشىلارىنا يننوۆاتسيالىق باسقارۋدا كاسىبي قولداۋ كورسەتۋدى كوزدەيدى. جوبانى ىسكە اسىرۋدا 6 ايماقتا تاجىريبە الاڭى ۇيىمداستىرىلىپ, ايماقتاردا جاڭا ءبىلىم بەرۋ مازمۇنى اياسىندا جالپى ءبىلىم بەرۋ ۇيىمدارىندا كوشباسشىلىق پەن باسقارۋ, ستراتەگيالىق جوسپارلاۋ بويىنشا مەكتەپ باسشىلارىنىڭ كاسىبي قۇزىرەتتىلىكتەرىن جەتىلدىرۋ جانە ادىستەمەلىك قولداۋ كورسەتۋ ماقساتىندا مەكتەپ باسشىلارىنا ارنالعان تالدىقورعان قالاسى مەن الاكول, كوكسۋ اۋداندارىندا ايماقتىق سەمينارلار ءوتتى. بۇل شارالاردىڭ جالعاسى ء«بىلىم بەرۋ مازمۇنىن جاڭارتۋ اياسىندا زاماناۋي مەكتەپتى باسقارۋداعى يننوۆاتسيالىق قادام» تاقىرىبىنداعى وبلىستىق ديرەكتورلار فورۋمىنا ۇلاستى.
فورۋمعا 150-دەن استام «ورلەۋ» بىلىكتىلىكتى ارتتىرۋ ۇلتتىق ورتالىعى» اق الماتى وبلىسى بويىنشا پەداگوگ قىزمەتكەرلەردىڭ بىلىكتىلىگىن ارتتىرۋ ينستيتۋتى, الماتى قالاسىنداعى «نازارباەۆ زياتكەرلىك مەكتەپتەرى» دببۇ پەداگوگيكالىق شەبەرلىك ورتالىعى, تالدىقورعان قالاسىنداعى نازارباەۆ زياتكەرلىك مەكتەبىنىڭ وكىلدەرى مەن جالپى ءبىلىم بەرۋ ۇيىمدارىنىڭ باسشىلارى قاتىستى. ەلباسىنىڭ «قازاقستاننىڭ ءۇشىنشى جاڭعىرۋى: جاھاندىق باسەكەگە قابىلەتتىلىك» اتتى جولداۋىنداعى ءۇش ءتىلدى وقۋعا كەزەڭ-كەزەڭمەن كوشۋدە اۋىل مەكتەپتەرىن قالا مەكتەپتەرىنە جاقىنداستىرۋ ماسەلەسىنە وراي, فورۋم بارىسىندا مەكتەپ باسشىلارى اۋىل مەكتەپتەرىن قالالىق مەكتەپتەرگە جاقىنداستىرۋ ماقساتىندا «سەرىكتەستىك الاڭى» اكتسياسىنا اۋىل مەكتەپتەرىن تارتۋ قاجەتتىگى تۋرالى وزەكتى ماسەلە كوتەردى. سونداي-اق ءبىلىم بەرۋ مازمۇنىن جاڭارتۋ اياسىندا زاماناۋي مەكتەپتى باسقارۋدا مەكتەپ باسشىلارىنا ءۇش تىلدە ءبىلىم بەرۋدى كەزەڭ-كەزەڭىمەن جۇزەگە اسىرۋدا مەكتەپتىڭ يننوۆاتسيالىق قىزمەتىن جەتىلدىرۋ, مەكتەپتى يننوۆاتسيالىق باسقارۋدا وزىق پەداگوگيكالىق يدەيالار مەن نازارباەۆ زياتكەرلىك مەكتەبىنىڭ تاجىريبەلەرىن جالپى ءبىلىم بەرەتىن مەكتەپتەرگە ەنگىزۋ, «ماڭگىلىك ەل» جالپىۇلتتىق يدەياسىنىڭ قۇندىلىقتارىن تاربيە ۇردىسىندە جۇزەگە اسىرۋ سياقتى ناقتى ماقسات-مىندەتتەر قويىلىپ, بولاشاقتا مەكتەپتى دامىتۋدىڭ قادامدارى ايقىندالدى.
قازاقتىڭ تالانتتى اقىنى ماعجان جۇماباەۆ «ادام جاڭاشىل: جاڭا ۇستىنە جاڭا تىلەيدى, جاڭادان جاڭاعا قۇمار كەلەدى. ادام اسەمشىل: اسەمنەن اسەم, سۇلۋدان سۇلۋ تاڭدايدى», دەيدى. بۇل قۇندى وي ارقىلى جاھاندانۋ زامانىندا ادامزات ەسكى سۇرلەۋمەن جۇرە بەرمەي ىلگەرىلەۋگە, وزگەرۋگە ۇمتىلۋى قاجەتتىگىن ايتقان. سەبەبى, بۇل – زامان تالابى. مەكتەپتە وقۋشىلاردىڭ سىني تۇرعىسىنان ويلاۋ داعدىلارىن قالىپتاستىرۋدا, ولاردىڭ ارقايسىسىنىڭ ەرەكشەلىگىن ەسكەرە جانە ىنتىماقتاستىق ورتادا ءبىلىم الۋىن قامتاماسىز ەتە وتىرىپ, وزىق ەلدەردىڭ قاتارىنا ەنۋىمىز كەرەك. ياعني جاڭارتىلعان ءبىلىم بەرۋ جاعدايىندا زاماناۋي مەكتەپ باسشىسى جوعارى ناتيجەگە قول جەتكىزۋ ءۇشىن ىنتىماقتاستىق ورتادا بىرلەسكەن جۇمىس ىستەيتىن تابىستى كوشباسشى بولۋى كەرەك. يننوۆاتسيالىق باسقارۋدىڭ ناتيجەسىندە عانا ءبىز بولاشاقتىڭ تىزگىنىن ۇستايتىن فۋنكتسيالىق ساۋاتتى XXI عاسىردىڭ جاڭا بۋىن وكىلىن تاربيەلەي الامىز.
مايگۇل وماروۆا,
الماتى وبلىسى ءبىلىم باسقارماسى باسشىسىنىڭ ورىنباسارى
تالدىقورعان
