مىنە, سول ءسات بۇگىن تۋدى. كوكەيدەگى كۇمان دە, ەكونوميكالىق قيىندىق تا ەندى وعان تەجەۋ بولا المايدى. اسىرەسە مەملەكەت ءوز تاۋەلسىزدىگىنە قول جەتكىزىپ, بولاشاقتى باياندى ەتۋدىڭ بارلىق جولى بەكىتىلىپ, ونى حالىقتىڭ ەرتەڭگى كۇنىمەن بىرگە قاراستىرىپ وتىرعان جاۋاپتى كەزەڭدە تاعدىرلى ماسەلەلەردىڭ ماڭىزى ءتىپتى ارتا تۇسەدى. تاۋەلسىز ەلىمىز ۇلتتىق مادەنيەتتىڭ انىقتاۋىشى ىسپەتتى انا ءتىلىمىزدى لاتىن الىپبيىنە كوشىرۋگە بايلانىستى العاشقى قادامىن جاسادى. ءالىپبي اۋىستىرۋ ماسەلەسى وسىعان دەيىن بىرنەشە مارتە كوتەرىلگەنىمەن, ىلعي شەگەرىلىپ كەلگەن بولسا, جوبانىڭ قابىلدانۋىنا جاۋاپتى ازاماتتارىمىز حالىقتىڭ قۇلاعىن ۇيرەتىپ, بىرلىككە سىزات تۇسىرمەي, ازىرلىك كەزەڭدەرىنەن بىرتە-بىرتە وتكەننەن كەيىن عانا تالقىعا سالۋدى ءجون دەپ شەشكەنىنەن بولار.
مەن لينگۆيست ەمەسپىن, ارحيۆ اقتارىپ وتىرعان تاريحشى عالىم دا ەمەسپىن, ء«تىلدى», ء«تۇسىندىرۋدى» قاجەت ەتپەيتىن ونەردىڭ توڭىرەگىندە جۇرسەم دە, لاتىن قارپىنىڭ قابىلدانۋىن قولدايمىن. ويتكەنى لاتىن دەگەن دۇنيە قازاق جۇرتىنا جات, تاڭسىق نارسە ەمەس. سوعىس باستالعانعا دەيىن وسى قارىپپەن قارا تانىپ, وسى الىپبيمەن ساۋات اشقان قازاقتىڭ ەشقايسىسىنىڭ دامىماي, دالادا قالعانىن كورگەنىمىز جوق. كەرىسىنشە, تاپ وسى كەزەڭدە ءومىر سۇرگەن قازاق حالقى ءۇشىن بۇل رۋحاني, مادەني, اعارتۋ, ەكونوميكالىق سالالار بويىنشا ۇلكەن سەكىرىس جاساعان التىن ارالىق بولىپ تاريحتا قالدى. ءبىراز جاستى ەڭسەرگەنىمىزبەن, وسى قارىپتىڭ بارىمەن بالا كۇنىمىزدەن تانىسپىز, كوكەيدە جاتتالعان, كوز الدىمىزدا ءالى كۇنگە سايراپ تۇر. بار بولعانى, ءبىز لاتىن قارپىن نەمىس ءتىلى دەپ وقىعان ەكەنبىز. ال بۇگىنگى تەحنولوگيالاردىڭ قارىشتاپ العا باسىپ, جاھاندىق قويان-قولتىق بايلانىسقا ءبارىمىز مۇددەلى بولىپ وتىرعان زاماندا جاس ۇرپاقتىڭ وسى قارىپتەرگە نەگىزدەلگەن الىپبيمەن قارىم-قاتىناس جاساعانى كوپ ءتۇيىندى شەشىپ بەرەتىنى انىق.
قوعامدا لاتىنعا ءوتۋ ماسەلەسى الدەقاشان ءپىسىپ-جەتىلدى, تەك جان-جاعىن سالماقتاپ, سارالاعان دۇرىس شەشىم قاجەت. ارينە, جوبانى تالقىلاۋ بارىسىندا تالاس-تارتىس, كوزقاراس قايشىلىعى دا ورىن الاتىنى زاڭدىلىق. ناتيجەسىندە جۇمىس كوميسسياسى جاۋاپتى مەكەمەلەرمەن ورتاق مامىلە جاساي وتىرىپ ۇلتىمىز ۇتىلمايتىن, زاماناۋي تالاپتىڭ ۇدەسىنەن شىعاتىن ءالىپبي ۇسىنسا, بۇگىنگى قايشىلىق تا, قيىندىق تا ۇمىت قالارى ءسوزسىز.
قازاقستاننىڭ حالىق ءارتىسى,
پروفەسسور
الماتى
