ادامگەرشىلىك قاسيەتتەردى ارداقتايتىن ىزگى قادام بيىل كوللەدج ءبىتىرىپ, ودان ءارى وتان الدىنداعى ازاماتتىق بورىشىن وتەۋدى, جوعارى ءبىلىم الۋدى, جاتتىقتىرۋشى بولۋدى ماقسات ەتكەن 19 جاستاعى بوزبالانى قاناتتاندىرىپ, ومىرگە دەگەن قۇشتارلىعىن ارتتىرعان ەدى.
ەربول جاستايىنان سپورتپەن اينالىسىپ, شىمىرلانىپ, شىنىعىپ ءوستى. وسىدان ءۇش جىل بۇرىن جەكپە-جەك جانە دجيۋ-دجيتسۋمەن جۇيەلى تۇردە شۇعىلدانا باستاعان. كۇرەستىڭ ءادىس-تاسىلدەرىن جەتىك مەڭگەرۋدىڭ ارقاسىندا قالالىق, وبلىستىق جارىستارعا قاتىسىپ, بىرنەشە رەت توپ جاردى. رەسپۋبليكالىق تۋرنيرلەردە جۇلدەگەر اتاندى. ونىڭ ەڭبەكقورلىعىن, جانكەشتىلىگىن فەدەراتسيا باسشىلىعى جوعارى باعالاپ, قۇراماعا قابىلداعان بولاتىن. ءومىردىڭ بۇرالاڭ جولدارىندا قيىن جاعدايعا ۇشىراعان كەزدە قامقورلىعىنا الدى.
وسى جىلدىڭ 29 شىلدەسى ونىڭ تاعدىرىن مۇلدەم باسقا ارناعا بۇرىپ جىبەردى. جاستىق كەزەڭنىڭ ناعىز شەشەك اتقان كەزىندە تاعدىردىڭ تالكەگىنە كەزىگەمىن دەپ ەش ويلاماعان شىعار. قالاداعى «پارك-سيتي» تۇنگى كلۋبىندا ەكى جىگىتپەن بولعان جانجال بارىسىندا بۇعان سۋىق قارۋ كەزەنىپ, كۇش كورسەتىلدى. نامىستى جاس ودان ىعا قويماعان. وسى ويىن-ساۋىق ورتالىعى جانىندا «بارىس» باسكەتبول كومانداسىنىڭ ويىنشىسى يگور ناناەۆتى ءبىر توپ اۋمەسەر جابىلا ۇرىپ, ونىڭ سوڭى ولىمگە سوقتىرعانىن ايتا كەتكەن ءجون. ەرتەڭىنە قوس تاراپ كەزدەسۋ ورنىن بەلگىلەگەن. سپورتشى جىگىتكە كۇشتەرى جەتپەسىن بىلگەن الگى ەكەۋ شولاق مىلتىقتان بىرنەشە رەت وق اتقان. ناتيجەسىندە, ەربول اۋىر جارالانىپ, اۋرۋحاناعا جەتكىزىلگەن. ونىڭ سول اياعىن تىزەدەن جوعارى جەردەن كەسۋگە تۋرا كەلدى. وسى قىلمىستىق ىسكە قاتىستى دەگەن كۇدىكپەن ءۇش ادام تۇتقىندالىپ, تەرگەۋ امالدارى جۇرگىزىلۋدە. ولار ءۇش قىلمىستىق وقيعا بويىنشا ايىپتالىپ, 15 جىلدان 20 جىلعا دەيىن باس بوستاندىعىنان ايىرۋ جازاسى كۇتىپ تۇر.
ەربول اۋرۋحانادان شىققانىمەن, ءالى قۇلان-تازا ايىعا قويعان جوق. ازىرگە پروتەز كيۋگە بولمايدى. ونىڭ باعاسى 10 ميلليون تەڭگە تۇراتىن كورىنەدى. ەر باسىنا تۇسكەن وسىنداي قىسىلشاڭ شاقتا دوستارى, تۋىستارى, ارىپتەستەرى دەمەۋ كورسەتتى. ەلىمىزدىڭ ءار تۇكپىرىنەن قولداۋ ءبىلدىرىپ جاتقاندار دا از ەمەس.
– مەن جاي عانا ءومىر ءسۇرۋدى قالامايمىن. الداعى ماقساتىم – ۇلكەن سپورتقا قايتا ورالۋ. پاراليمپيالىق ويىندارعا قاتىسۋ ارقىلى باسەكەلەستىگىمدى, قول-اياعى بالعاداي سپورتشىلاردان كەم ەمەستىگىمدى دالەلدەۋ. وعان ەرىك-جىگەرىم دە, كۇش-قايراتىم دا, تاجىريبەم دە تولىق جەتەدى. جارا جازىلىپ, بابىما كەلگەن سوڭ بىردەن سپورت زالعا تارتامىن. جۇزۋمەن, دجيۋ-دجيتسۋمەن, گرەپپلينگپەن اينالىسامىن, – دەيدى ەربول جاسقا ءتان جىگەرلى ۇنمەن.
ونىڭ ۇلكەن اسۋلاردى باعىندىرا الاتىنىنا جاتتىقتىرۋشىسى عابيت وتەنوۆ تە بەك سەنىمدى. ءوز تاعدىرى ءوز قولىندا ەكەنىن قاپىسىز ۇققان ەربول سپورت زالعا بارعانشا اسىق.
ءومىر ەسقالي,
«ەگەمەن قازاقستان»
سولتۇستىك قازاقستان وبلىسى
