- ماتچتان العان اسەرىڭىزبەن بولىسسەڭىز.
- شىنى كەرەك, ءبىرتۇرلى كۇيدە قالىپ وتىرمىن. ارينە, ماتچتىڭ ءبىز ءۇشىن ويداعىداي اياقتالعانى قۋانتادى. بىراق ويىننىڭ العاشقى 25 مينۋتىندا قارسىلاستارىمىز ءبىزدى ءوز الاڭىمىزدا قىسپاققا الۋمەن بولدى. ولاردىڭ باسىمدىعىن وسى كەزدە انىق بايقادىق. كوماندامداعى جىگىتتەر بىرنەشە قاتەلىككە بوي الدىردى. دەگەنمەن, ءۇش ۇپاي العانىمىزعا قۋانىپ وتىرمىن.
- بۇگىن كوماندادا بىرنەشە ماڭىزدى ويىنشى الاڭعا شىعا المادى. باكامبۋ, باككا, چەرىشەۆ ماتچتى قوسالقى قۇرامنان باستادى. ءسىز «استانانى» ەكىنشى قۇراممەن جەڭەمىن دەپ ويلادىڭىز با؟
- ونداي ويدان اۋلاقپىن. «استانانى» قاتتى سىيلايمىن. بۇل ويىندا الاڭعا دايىن ويىنشىلاردى ءجون سانادىم.
- بۇگىنگى ويىندا «ۆيلياررەال» جاقسى قىرىنان كورىنۋى كەرەك ەدى. ءسىزدىڭ ويىڭىزشا, «استانا» بۇگىن جاقسى وينادى ما, الدە كومانداڭىز ادەتتەگىدەن وسالداۋ بولدى ما؟
- ەڭ باستى قاتەلىگىمىز – دوپتان ءجيى ايىرىلىپ, كوبىرەك يەلىك ەتە المادىق. «استانا» وتە جاقسى كوماندا. ال ءبىزدىڭ كوبىرەك گول سوعاتىن مۇمكىندىگىمىز بولعان. بىراق بۇل ويىمىزدى ويىن سوڭىنا تامان جۇزەگە اسىرا بىلدىك.
- ءسىز «استانانىڭ» ويىندارىنا تالداۋ جاسادىڭىز. قازاقستاندىقتاردىڭ ءۇش جىل بۇرىنعى ويىنىن قايتا كورىپ شىققانىڭىز دا انىق. سول ويىنعا قاراعاندا «استانا» كۇشەيدى دەپ ويلايسىز با؟ قارسىلاستارىڭىزدى ءۇش قورعاۋشىمەن ويناعانى سىزدەر ءۇشىن كۇتپەگەن جايت بولدى ما؟
- شىنى كەرەك, «استانانى» قورعانىسقا بەس جىگىتتى جاۋاپتى ەتە مە دەپ ويلادىق. قارسىلاسىمىز ساۋاتتى قورعانىپ, بىزگە ءبىراز قيىندىق تۋدىردى. «ماككابي» مەن «سلاۆياعا» قارسى ويىندا ءبارى باسقاشا بولادى دەپ ويلايمىن. ەكىنشى سۇراققا كەلەر بولسام, ءۇش جىل بۇرىن مەن «ۆيلياررەالدا» ەمەس ەدىم. بىراق «استانانىڭ» جىلدان جىلعا دامىپ جاتقانىن ەرەكشە اتاپ وتكىم كەلەدى.
- چەرىشەۆتىڭ الاڭعا شىعۋى تۋرالى ويىڭىزدى ءبىلدىرىپ ءوتىڭىزشى.
- چەرىشەۆتىڭ جاراقاتىنان ايىعىپ, قاتارعا قوسىلۋى ءبىز ءۇشىن جاقسى جاڭالىق.
ايان ءابدۋالي,
«ەگەمەن قازاقستان»
