بۇگىنگى كۇندە سىيلىقاقىعا ۇمىتكەرلەردەن ءوتىنىش قابىلداۋ ناۋقانى اياقتالدى. ەكى ايدىڭ ىشىندە 230 ءوتىنىش كەلىپ تۇسكەن. ولاردىڭ ىشىندە استانا مەن الماتى قالالارىنىڭ, پاۆلودار, وڭتۇستىك قازاقستان, الماتى وبلىستارىنىڭ ۇەۇ بەلسەندىلىك تانىتقان. تۇڭعىش رەت سىيلىقاقى الەۋمەتتىك ماسەلەلەردى شەشۋگە قوسقان ۇلەسى ءۇشىن ۇكىمەتتىك ەمەس ۇيىمدارعا بەرىلەتىن بولادى.
ءدىن ىستەرى جانە ازاماتتىق قوعام مينيسترلىگىنىڭ ازاماتتىق قوعام كوميتەتىنىڭ ءتورايىمى ءاليا عالىموۆا جەڭىمپازداردىڭ قالاي انىقتالاتىندىعىن اتاپ ايتتى.
«سىيلىقاقىنى ۇسىنۋعا قويىلاتىن تالاپتار مەيلىنشە اشىق ۇسىنىلعان. سىيلىقاقىنى الۋ ءۇشىن تاپسىرىلعان ءاربىر ءوتىنىش ءۇش كەزەڭ بويىنشا باعالانادى. باعالاۋعا – مەكەمەنىڭ تاجىريبەسى, قوعام تاراپىنان مويىندالۋى, يننوۆاتسياسى, قىزمەتتىك تيىمدىلىگى, سالانىڭ, ءوڭىردىڭ, رەسپۋبليكانىڭ دامۋىنا قوسقان الەۋمەتتىك ۇلەسى سياقتى تالاپتار قويىلاتىن بولادى», – دەپ اتاپ ءوتتى ءاليا عالىموۆا.
ەڭ كوپ وتىنىمدەر مىنا باعىتتار بويىنشا ۇسىنىلعان: حالىقتىڭ الەۋمەتتىك تۇرعىدان وسال توپتارىن قولداۋ – 23%, جاستار ساياساتى مەن بالالار باستامالارىن قولداۋ – 12,1%, ازاماتتار مەن ۇيىمداردىڭ قۇقىقتارىن, زاڭدى مۇددەلەرىن قورعاۋ; – 7,8%, قوعامدىق كەلىسىمدى جانە ۇلتتىق بىرلىكتى نىعايتۋ – 7,8%.
14 ءوتىنىم اۋىلدىق جانە 26 ءوتىنىم اۋداندىق ۇيىمداردان كەلىپ ءتۇستى. بۇل ۇەۇ-عا ارنالعان سىيلىقاقىلاردى بەرۋگە باعىتتالعان بايقاۋعا قاتىسۋ ءۇشىن كەلىپ تۇسكەن وتىنىمدەردىڭ جالپى سانىنىڭ 17 % -ىن قۇرادى.
سىيلىقاقىنىڭ از مولشەرى 2000 اەك-كە تەڭ (4,5 ملن تەڭگە). سىيلىقاقىلار ۇەۇ-نى ينستيتۋتسيونالدىق دامىتۋعا, ۇيىمنىڭ جارعىلىق ماقساتتارىنا, ونىڭ ماتەريالدىق بازاسىن نىعايتۋعا, قىزمەتكەرلەرىنىڭ بىلىكتىلىگىن ارتتىرۋعا باعىتتالادى.
سىيلىقاقىلاردى تابىستاۋ تۋرالى شەشىمدى كونكۋرستىق كوميسسيا مەن ۇەۇ-مەن ءوزارا ءىس قيمىل بويىنشا ۇيلەستىرۋشى كەڭەستىڭ ۇسىنىمدارى نەگىزىندە ءدىن ىستەرى جانە ازاماتتىق قوعام مينيسترلىگى 2017 جىلعى 1 جەلتوقسانعا دەيىن قابىلدايدى.
ءاليسۇلتان قۇلانباي,
«ەگەمەن قازاقستان»
