جيىندا «اقپاراتتىق قازاقستان – 2020» مەملەكەتتىك باعدارلاماسىنىڭ جۇزەگە اسىرىلۋى جانە ونداعى زاڭدىلىق ماسەلەسى قارالدى. سونىمەن قاتار دەنساۋلىق ساقتاۋ جۇيەسىندەگى سىبايلاس جەمقورلىققا قارسى ءىس-قيمىل بويىنشا قابىلدانىپ جاتقان شارالار ماسەلەسى دە قوزعالدى.
باسقوسۋدى اشقان گۇلشارا ابدىقالىقوۆا پارلامەنتتىڭ ءۇشىنشى سەسسياسىنىڭ اشىلۋىندا نۇرسۇلتان نازارباەۆ دەنساۋلىق ساقتاۋ سالاسىن ەل دامۋىنىڭ ماڭىزدى الەۋمەتتىك ءمانى بار باسىم باعىتىنىڭ ءبىرى رەتىندە اتاعانىن ايتتى.
ءىس-شارا بارىسىندا اقپارات جانە كوممۋنيكاتسيالار ءمينيسترى داۋرەن اباەۆتىڭ جانە باس پروكۋرور جاقىپ اسانوۆتىڭ بايانداماسى تىڭدالدى.
بايانداماشىلاردىڭ مالىمەتىنە سايكەس, باعدارلامانى ىسكە اسىرۋدىڭ نەگىزگى ماقساتتى كورسەتكىشتەرى وڭ قارقىن الىپ وتىر. ماقساتتى 40 كورسەتكىشكە مەرزىمىنەن بۇرىن قول جەتكىزىلدى (48%). ماسەلەن, 2017 جىلى ازاماتتاردىڭ كومپيۋتەرلىك ساۋاتتىلىق دەڭگەيى 76%-دان استى, ال جوسپارلانعان مەجە 65% بولاتىن; ۇلتتىق جەرسەرىك جەلىسى ابونەنتتەرىنىڭ سانى جوسپارلانعان 500 مىڭنان اسىپ ءتۇسىپ, 1,2 ملن-نان ارتتى.
ەكىنشى ماسەلە بويىنشا دەنساۋلىق ساقتاۋ ءمينيسترى ەلجان ءبىرتانوۆ پەن سىبايلاس جەمقورلىققا قارسى ءىس-قيمىل بيۋروسىنىڭ باسشىسى تالعات تاتۋباەۆ بايانداما جاسادى. مينيستر دەنساۋلىق ساقتاۋ سالاسىنداعى جەمقورلىق ارەكەتتەردىڭ الدىن الۋ بويىنشا قابىلدانعان شارالار تۋرالى مالىمدەدى.
وتىرىستا سوڭعى 2 جىلدا بۇل سالا بويىنشا تىركەلگەن سىبايلاس جەمقورلىق سيپاتىنداعى قىلمىس سانى 2 ەسە وسكەنى مالىمدەلدى. تەگىن مەديتسينالىق كومەكتىڭ كەپىلدىك بەرىلگەن كولەمى اياسىندا ءدارى-دارمەك جانە مەديتسينالىق قىزمەتتەردى ساتىپ الۋ, فارماتسەۆتيكالىق كومپانيالارمەن قارىم-قاتىناس ماسەلەلەرىنە قاتىستى, سونداي-اق ءدارى-دارمەك فورمۋليارلارىن قالىپتاستىرۋ جۇيەسىندە, سەرتيفيكاتتاۋ راسىمدەرىندە جانە ت.ب. سالالاردا ەلەۋلى قاتەرلەر انىقتالدى.
كوميسسيا وتىرىسىنىڭ قورىتىندىسى بويىنشا دەنساۋلىق ساقتاۋ سالاسىنداعى سىبايلاس جەمقورلىق قاتەرلەرىن جويۋ جونىندە تاپسىرمالار بەرىلدى.
