قازاقستان رەسپۋبليكاسىنىڭ پرەزيدەنتى نۇرسۇلتان نازارباەۆتىڭ ۇسىنۋى بويىنشا پارلامەنت سەناتىنىڭ توراعاسى لاۋازىمىنا قاسىم-جومارت توقاەۆتىڭ كانديداتۋراسى ۇسىنىلدى.
توقاەۆ وزىنە جۇكتەلگەن زور سەنىمىنە وراي مەملەكەت باسشىسىنا العىس ايتتى.
ء«بىزدىڭ پرەزيدەنتىمىزدى الەم جۇرتشىلىعى عالامدىق دەڭگەيدەگى ساياساتكەر, ۇلى رەفورماتور رەتىندە قۇرمەتتەيدى. شىن مانىندەگى تاريحي تۇلعا دەپ بىلەدى. ەلباسىنىڭ كورەگەن كوشباسشىلىعىمەن ەلىمىز بيىك بەلەستەردى باعىندىرىپ, الەمدەگى تانىمال, ابىرويلى ەلدەردىڭ قاتارىنا قوسىلدى. ەلباسىنىڭ ساليقالى, كورەگەن ساياساتىن ىسكە اسىرۋ مەن ءۇشىن ارقاشان جاۋاپتى ءارى زور مارتەبەلى مىندەت», - دەدى ق.توقاەۆ.
جاسىرىن داۋىس بەرۋ بارىسىندا جوعارعى پالاتانىڭ توراعاسى بولىپ قاسىم-جومارت توقاەۆ ءبىراۋىزدان سايلاندى.
ال پارلامەنت سەناتى توراعاسىنىڭ ورىنباسارى بولىپ بەكتاس بەكنازاروۆ قايتا سايلاندى.
پالاتا دەپۋتات دارحان كالەتاەۆتى حالىقارالىق قاتىناستار, قورعانىس جانە قاۋىپسىزدىك كوميتەتىنىڭ قۇرامىنا سايلاۋ تۋرالى قاۋلى قابىلدادى, دەلىنگەن حابارلامادا.
سونىمەن قاتار, سەنات توراعاسى ق. توقاەۆ قازاقستان پرەزيدەنتىنىڭ جارلىعىمەن دەپۋتاتتىق وكىلەتتىگى توقتاتىلعان لياززات كينوۆقا پارلامەنتتىڭ زاڭ شىعارۋ قىزمەتىنە قوسقان زور ۇلەسى ءۇشىن العىس ايتتى. ل. كينوۆ پارلامەنت سەناتىنىڭ قۇرمەت گراموتاسىمەن ماراپاتتالدى.
