قورداي اۋدانىندا ورنالاسقان «ۆەترو ينۆەست» جاۋاپكەرشىلىگى شەكتەۋلى سەرىكتەستىگى جەل ەلەكتر ەنەرگياسىن وندىرەدى. جالپى جوبالىق قۇنى 12 753 ميلليون بولاتىن سەرىكتەستىكتە 13 تۇراقتى جۇمىس ورنى اشىلاتىن بولادى. قازىرگى كەزدە جوبانىڭ ءبىرىنشى كەزەگى اياسىندا 19 قوندىرعى ورناتىلىپ, جوبا ىسكە قوسىلدى. ال بۇگىندە كاسىپورىندا 11 ادام تۇراقتى جۇمىس ورنىمەن قامتىلعان بولسا, ونىڭ ىشىندە 5 ادام جەرگىلىكتى تۇرعىندار بولىپ وتىر.
بۇگىندە ەلىمىزدە كاسىپكەرلىككە كەڭ ءورىس اشىلعان. اتالعان جوبا بويىنشا مەملەكەتتىڭ قولداۋى رەتىندە 199,4 گەكتار جەر ءبولىنىپ بەرىلگەن. سونداي-اق, بۇل جوبا «بيزنەستىڭ جول كارتاسى-2020» باعدارلاماسى اياسىندا الىنعان نەسيەنىڭ پايىزدىق ستاۆكاسىن سۋبسيديالاۋ تەتىگى بويىنشا قولداۋ العان. سونىمەن قاتار, «پەرۆومايسكيە دەليكاتەسى» جاۋاپكەرشىلىگى شەكتەۋلى سەرىكتەستىگىنىڭ شۇجىق ءوندىرۋ تسەحىن جاڭارتۋ جوباسىنىڭ جالپى قۇنى 223 ميلليون تەڭگەنى قۇرايدى. ال كاسىپورىن جىلىنا 3000 توننا ەتتى قايتا وڭدەۋگە قاۋقارلى. بولاشاقتا 70 تۇراقتى جۇمىس ورنى اشىلاتىن كاسىپورىن مەملەكەتتىڭ قولداۋى رەتىندە «دامۋ ءوندىرىس-ءىى» باعدارلاماسى اياسىندا نەسيە العان.
قورداي اۋدانى توعىز جولدىڭ تورابىندا ورنالاسقان. الماتى مەن تاراز شاھارلارىنىڭ اراسىن جالعاپ تۇرعان اۋداندا تىرشىلىكتى تىكتەۋگە مۇمكىندىك مول. سونداي-اق, وبلىس ەكونوميكاسىن ارتتىرۋدا دا ايتارلىقتاي ۇلەس قوسىپ وتىرعان اۋداندا بۇدان بولەك «BioVet KZ», «الاتاۋ قورداي» جانە «Aurum Deutschland AG» جاۋاپكەرشىلىگى شەكتەۋلى سەرىكتەستىكتەرى دە مەملەكەتتىڭ قولداۋى ەسەبىنەن جۇزەگە اسىپ وتىرعان جوبالار قاتارىندا. ەكىنشى بەسجىلدىق شەڭبەرىندە قولعا الىنىپ وتىرعان بەس جوبا اۋداننىڭ عانا ەمەس, وبلىستىڭ دا دامۋ كورسەتكىشى بولىپ سانالادى. بولاشاقتا حالىقتى جۇمىسپەن قامتۋدا جانە ءوڭىر ەكونوميكاسىن ارتتىرىپ, الەۋەتىن كوتەرۋگە دە سەرپىن بەرەتىنى انىق.
قورداي اۋدانى بۇگىندە اۋىل شارۋاشىلىعى سالاسىندا دا ايتارلىقتاي كورسەتكىشكە قول جەتكىزىپ وتىر. اۋداندىق اۋىل شارۋاشىلىعى ءبولىمىنىڭ مالىمەتىنشە, سالاعا قاتىستى مەملەكەتتىك باعدارلامالار بويىنشا دا اۋداندا بىرقاتار جۇمىستار اتقارىلعان. ماسەلەن, «التىن اسىق» باعدارلاماسى بويىنشا اعىمداعى جىلى 335 باس قوي جانە «قۇلان» باعدارلاماسى بويىنشا 4 باس جىلقى ساتىپ الىنعان.
ايماقتاعى قاقپاتاس اۋىلىندا ورنالاسقان «قاقپاتاس-قورداي» جاۋاپكەرشىلىگى شەكتەۋلى سەرىكتەستىگى وڭىردەگى ەڭ ءىرى شارۋاشىلىقتاردىڭ ءبىرى. سەرىكتەستىك باسشىسى دۇيسەحان قوشاليەۆتىڭ ايتۋىنشا, اتالعان سەرىكتەستىك 799 ميلليون تەڭگەگە تاۋارلى-ءسۇت فەرماسىن قايتا جاراقتاندىرۋ ارقىلى 600 باس ساۋىن سيىرعا ارنالعان شۆەتسيانىڭ «دەلوۆال» فيرماسىمەن كەلىسىمگە وتىرىپ, زاماناۋي جاڭا قۋاتتى ساۋىن قوندىرعىلارىن وندىرىسكە ەنگىزگەن. الداعى ۋاقىتتا شارۋاشىلىقتاعى اسىل تۇقىمدى ساۋىن سيىرلار سانىن 600 باسقا جەتكىزۋ جوسپاردا بار ەكەن. ءسۇت ونىمدەرىن ءوندىرۋ جانە اسىل تۇقىمدى ءىرى قارا مال ءوسىرىپ, كوبەيتۋدى قولعا العان سەرىكتەستىكتە بۇگىندە 61 ادام جۇمىس ىستەيدى.
جالپى, قورداي اۋدانىندا بولشەك ساۋدا تاۋار اينالىمى, كوتەرمە ساۋدا تاۋار اينالىمى, نەگىزگى كاپيتالعا سالىنعان ينۆەستيتسيا كولەمى دە ايتارلىقتاي وسكەن. ال ەلدى مەكەندەردى گازداندىرۋ بويىنشا قورداي, ستەپنوي, ارال, قالعۇتى, جامبىل, جاڭاتۇرمىس, سارىبۇلاق, قاينار, قاسىق, قاقپاتاس, بەرىكتاس جانە بەتقاينار اۋىلدارىندا گاز جەلىسى تارتىلعان. بولاشاقتا قالعان ەلدى مەكەندەردى گازداندىرۋ ماسەلەسى بويىنشا ناقتى جۇمىستار قولعا الىنىپ جاتىر.
جامبىل وبلىسىنىڭ اكىمى كارىم كوكىرەكباەۆ جۇمىس ساپارىمەن قورداي اۋدانىنا بارعانىندا, اۋداننىڭ بۇگىنگى دامۋ دەڭگەيىنە وڭ باعاسىن بەرگەن بولاتىن. سونداي-اق, قولعا الىنعان بەس جوبانىڭ ارتىقشىلىقتارىن دا اتاپ وتكەن ەدى. وبلىستىڭ ەڭ الەۋەتتى اۋدانى سانالاتىن قوردايدا قاناعاتتانارلىق تىرلىك كوپ ەكەنىن جەرگىلىكتى تۇرعىندار دا ايتادى. اسىرەسە مەملەكەتتىك باعدارلامالاردىڭ ورىندالۋى ارقىلى ءبىرىنشى كەزەكتە حالىقتى جۇمىسپەن قامتۋ ماسەلەسى وڭ شەشىمىن تاپقان.
حاميت ەسامان,
«ەگەمەن قازاقستان»
جامبىل وبلىسى
