– بۇگىنگى «ەمبىمۇنايگاز» – گەولوگيالىق بارلاۋ, مۇناي كەن ورىندارىن پايدالانۋ, مۇناي مەن گاز دايىنداۋ جانە ءوندىرۋ جۇمىستارىن جۇرگىزەتىن بولاشاعى زور زاماناۋي مۇناي كومپانياسى. كاسىپورىننىڭ بولاشاقتا رەسۋرستىق بازانى كەڭەيتۋ, جاڭا باعىتتاردى دامىتۋ, تەرەڭ ۇڭعىمالاردى بۇرعىلاۋ جانە باسقا دا جوبالار بويىنشا جوسپارلارى كوپ. ولاردىڭ ءبارىن ءبىز كاسىبي جانە ىنتىماعى زور ۇجىمىمىزبەن بىرگە ءساتتى جۇزەگە اسىراتىنىمىزعا سەنەمىن, – دەپ اتاپ ءوتتى ءوز سوزىندە «ەمبىمۇنايگاز» اق باسقارما توراعاسى ءانۋار جاقسىبەكوۆ.
سالتاناتتى جيىن بارىسىندا كاسىپورىننىڭ 40 قىزمەتكەرى «مۇناي-گاز سالاسىن دامىتۋداعى ۇلەسى ءۇشىن», «ەمبىنىڭ 95 جىلدىعى» مەدالدارىمەن, ەنەرگەتيكا مينيسترلىگىنىڭ, «سامۇرىق-قازىنا» ۇاق اق, «قازمۇنايگاز» ۇلتتىق كومپانياسى» اق, «قازمۇنايگاز» بارلاۋ ءوندىرۋ» اق-تىڭ قۇرمەت گراموتالارىمەن, «قازمۇنايگاز» ۇلتتىق كومپانياسى» اق ەستەلىك بەلگىلەرىمەن جانە «العىس حاتتارىمەن» ماراپاتتالدى.
ال ەڭ باستى ماراپات ۇجىم مۇشەلەرى ءۇشىن ورتالىق كەڭسەنىڭ اۆتوتۇراعى اۋماعىندا دايىندالىپتى. ەمبىنىڭ ۇزدىك جۇمىسشىلارىن بۇل جەردە سۋ جاڭا «نيۆا-شەۆرولەت» اۆتوكولىكتەرى كۇتىپ تۇردى.
– كومپانيانىڭ ۇلكەن مەرەكەسىنە وراي ءبىز ءار وندىرىستىك قۇرىلىمدىق بولىمشەنىڭ ۇزدىك ەڭبەكشىلەرىنە 6 اۆتوكولىكتى سىيعا تارتىپ وتىرمىز. وسىلايشا, «ەمبىمۇنايگاز» جانكەشتى ەڭبەكتەرى مەن ماماندىققا دەگەن ادالدىعى ءۇشىن مۇنايشىلارعا العىسىن بىلدىرەدى! – دەدى ءا.جاقسىبەكوۆ.
باعالى ماراپاتقا يە بولعانداردىڭ بارلىعى جۇمىسشى ماماندىعىنىڭ وكىلدەرى.
قاجەنباي ابدىكارىموۆ – «جايىقمۇنايگاز» مگوب-دە تەحنولوگيالىق قوندىرعىلار وپەراتورى. سايت اسانوۆ – «جىلىويمۇنايگاز» مگوب-دە مۇناي جانە گاز ءوندىرۋ وپەراتورى. قازبەك قوشاەۆ – «قاينارمۇنايگاز» مگوب-دە مۇناي جانە گاز ءوندىرۋ وپەراتورى. جۇماجان باەسەنوۆ – «دوسسورمۇنايگاز» مگوب-دە ۇڭعىمالاردى جەراستى جوندەۋ وپەراتورى. عاتيەت ءابدىراحمانوۆ – «ەمبىمۇنايەنەرگو» باسقارماسىنىڭ «قۇلسارى» اۋداندىق ەلەكتر تورابىنىڭ ەلەكترومونتەرى. جۇماجان سارسەنوۆ – وتقججك باسقارماسىنىڭ جۇك قارمالاۋشىسى.
جۇماجان باەسەنوۆتىڭ وندىرىستەگى جالپى ەڭبەك ءوتىلى – 44 جىل. ونىڭ 41 جىلدان استام ۋاقىتىن ول جەر استى جانە كۇردەلى جوندەۋ قىزمەتىنە ارناعان. سۇيىكتى ىسىنە بەرىلە جۇمىس جاساعان جۇماجان وسىنشاما ۋاقىتتىڭ ىشىندە دەنساۋلىعىنا بايلانىستى دەمالىسقا دا شىقپاعانىن بايقاماپتى! كاسىپورىننىڭ كادر قىزمەتى وسىنى ايتقان كەزدە قاتتى تاڭقالدى. مۇنىڭ ءبارى ول جۇمىسقا دەگەن ادال نيەتىنىڭ جانە ۇنەمى سپورتپەن اينالىسقاننىڭ جەمىسى دەپ بىلەدى. جۇماجان سپورتتىق شارالاردان ەشقاشان تىس قالمايدى, ۆولەيبول وينايدى. ءتورت ۇلىنىڭ ءبىرى اكەسىنىڭ جولىن قۋىپ, مۇنايشى بولعان.
– ەڭبەك جانە دەمالىس جاعدايىن تۋدىرىپ قانا قويماي, ونى جەتىلدىرىپ وتىراتىن سۇيىكتى كومپانياما العىس ايتامىن. مەن ەڭبەككە 1973 جىلى ارالاسىپپىن, سول كەزدە قانداي قيىن جاعدايلاردا جۇمىس جاساعانىمىز ەسىمدە. قازىر بارلىق جەردە اۆتوماتتاندىرىلعان جۇيەلەر ەنگىزىلىپ جاتىر, ولار پروتسەستەردى وڭتايلاندىرىپ, ەڭبەك قاۋىپسىزدىگىن كۇشەيتەدى. قىزمەتكەرلەر جايلى جاتاقحانالاردا دەمالادى. ءبىز ۇنەمى شيپاجايلارعا جولدامالار الىپ تۇرامىز. ەندى, مىنە, ءبىزدىڭ ەڭبەگىمىزگە وراي اۆتوكولىك تابىستاپ جاتىر, – دەيدى ءوز قۋانىشىن جاسىرا الماعان مۇنايشى.
مەرەيتويعا قاراماستان كومپانيا قول جەتكىزگەن تابىستارمەن توقتالماق ەمەس. جوسپاردا جاڭا مۇناي كەن ورىندارىن اشۋ مىندەتى تۇر. قازىرگى تاڭدا «ەمبىمۇنايگاز» اق-قا بىرنەشە جاڭا كەلىسىمشارتتىق تەرريتوريانى, سونىڭ ىشىندە كاسپي ماڭى ويپاتىندا ورنالاسقان بولاشاعى بار زابۋرىن جانە جايىق الاڭدارىن بەرۋ ماسەلەسى شەشىلۋدە. جانە دە كومپانيانىڭ كادرلىق الەۋەتىنە دە تياناقتى ءمان بەرۋ جالعاسىن تاپپاق – جاس قىزمەتكەرلەردىڭ دامۋىنا ۇلكەن كۇش جۇمسالسا, ارداگەرلەرگە قۇرمەت كورسەتىلەدى.
باقىتگۇل باباش,
«ەگەمەن قازاقستان»
