ەندى وسىعان وراي ايتاتىن پىكىرىمىز, لاتىن گرافيكاسىنا اۋىسۋ قارەكەتىن تىم اسىقتىرماي, اپتىقتىرماي, جەتى رەت ولشەپ, ءبىر كەسەتىن شارۋا دەپ بىلەمىز. ويتكەنى ءالىپبي ءبىر جىلعا, ون جىلعا تاڭدالمايدى. ول عاسىرلارعا كەتەدى. ۇلتتىق مۇراعا اينالاتىن قۇندىلىق. و باستان قازاقستاندا ءالىپبي وزگەرەتىن بولسا, وندا بۇكىل بالاباقشا, مەكتەپتەر لاتىنعا اۋىسۋ كەرەك دەگەن يدەيانى ايتقان ەدىم. جانە سول يدەيانى ءالى دە ايتام. ياعني ءالىپبي اۋىساتىن بولسا, جارتىسى كيريلليتسادا قالىپ, جارتىمىز لاتىنعا اۋىساتىن بولساق, بۇل بولىنۋگە اكەلمەي مە دەگەن كۇدىك بار.
بۇل فورما تۋرالى مىنانداي ۇسىنىس ايتسام. ءبىز پرەزيدەنتپەن كەزدەسۋدە قازاقستاندا بالاباقشادان باستاپ, ورتا مەكتەپ ءبىر باعدارلامامەن وقۋى كەرەك جانە ول جەردە مەملەكەتتىك ءتىل باستى ءتىل بولىپ, ورىس ءتىلى مەن اعىلشىن ءتىلى قوسىمشا ءجۇرۋ كەرەك دەگەن ەدىك. مىنەكەي, وسى ورايدا مەملەكەتتىك ءتىلدى لاتىن گرافيكاسىمەن وقىتىپ, وقۋ پروتسەسىنىڭ ونە بويىندا, ونىڭ ىشىندە ورىس تىلىندە جۇرەتىن پاندەردى كيريلليتسامەن, اعىلشىن تىلىندە وقىتاتىن پاندەردى اعىلشىن الىپبيىمەن وقىتسا, قالاي بولار ەدى. سوندا مەكتەپتە, ءۇش ءالىپبي دە جۇرەدى. ارينە, ەڭ باستى قازاق ءالىپبيى ءبىرىنشى تۇرادى. سوندا بۇرىنعى قۇندىلىقتار دا ۇمىت قالماي, ەندى بايلىقتى دا ءوزىمىز يەمدەنىپ, پايداعا كەنەلەر ەدىك. وتكەن ءجۇز جىلدىق تاريحتان قول ۇزبەيمىز, رۋحاني ءجىپ ۇزىلمەيدى.
سماعۇل ەلۋباي,
جازۋشى
