بەكىتىلگەن كۇن تارتىبىنە وراي, دەپۋتاتتار ۇلتتىق ەكونوميكا ءمينيسترى تيمۋر سۇلەيمەنوۆتىڭ تانىستىرۋىمەن «قازاقستان رەسپۋبليكاسىنىڭ حالىقارالىق ۆاليۋتا قورىنا, حالىقارالىق قايتا قۇرۋ جانە دامۋ بانكىنە, حالىقارالىق قارجى كورپوراتسياسىنا, حالىقارالىق دامۋ قاۋىمداستىعىنا, ينۆەستيتسيالار كەپىلدىگىنىڭ كوپجاقتى اگەنتتىگىنە, ينۆەستيتسيالىق داۋلاردى رەتتەۋ جونىندەگى حالىقارالىق ورتالىققا, ەۋروپا قايتا قۇرۋ جانە دامۋ بانكىنە, ازيا دامۋ بانكىنە, يسلام دامۋ بانكىنە مۇشەلىگى تۋرالى» قازاقستان رەسپۋبليكاسىنىڭ زاڭىنا وزگەرىستەر ەنگىزۋ تۋرالى» زاڭ جوباسىن تالقىلادى.
«اتالعان زاڭ جوباسى قازاقستاننىڭ ازيا ينفراقۇرىلىمدىق ينۆەستيتسيالار بانكىنە مۇشەلىگىن زاڭنامالىق تۇرعىدان رەتتەۋگە باعىتتالعان. سونداي-اق بۇل قۇجات ارقىلى حالىقارالىق ۇيىمدارمەن قاتىناس جاساۋعا ۋاكىلەتتى مەملەكەتتىك ورگانداردى بەكىتۋمەن قاتار, ەلىمىزدىڭ حالىقارالىق ۇيىمدارعا مۇشەلىگىنە بايلانىستى قارجىلىق ارەكەتتەردى رەتتەۋ كوزدەلەدى», دەدى بايانداماشى ت.سۇلەيمەنوۆ.
زاڭ جوباسىن ازىرلەۋشىلەردىڭ تۇسىندىرۋىنشە, مۇنداي قاجەتتىلىك ەلىمىزدىڭ حالىقارالىق ۇيىمدارعا مۇشەلىگى سالاسىنداعى قوعامدىق قاتىناستاردى رەگلامەنتتەيتىن قۇقىقتىق نورمالارعا مونيتورينگ جۇرگىزۋ بارىسىنداعى انىقتالعان ولقىلىقتار مەن كەيبىر قايشىلىقتاردى جويۋ ءۇشىن تۋىنداعان.
وتىرىستا حالىق قالاۋلىلارىنىڭ ءبىراۋىزدان ماقۇلداۋىنا يە بولعان ەكىنشى قۇجات – قورعانىس ءمينيسترىنىڭ ورىنباسارى تالعات مۇحتاروۆتىڭ تانىستىرۋىمەن – «قارۋ ساۋداسى تۋرالى شارتتى راتيفيكاتسيالاۋ تۋرالى» زاڭ جوباسى بولدى. 2003 جىلى نيۋ-يوركتە جاسالعان قارۋ ساۋداسى تۋرالى شارت كادىمگى قارۋ-جاراقتىڭ حالىقارالىق ساۋداسىن رەتتەۋ ءۇشىن ورتاق حالىقارالىق ستاندارتتاردى بەلگىلەۋگە, سونداي-اق, كادىمگى قارۋ-جاراقتىڭ زاڭسىز ساۋداسىن بولعىزباۋ مەن جويۋعا جانە زاڭسىز قايتا باعىتتالۋىن اۋىزدىقتاۋعا ارنالعان.
«شارت مىناداي ساناتتار شەڭبەرىندەگى كادىمگى قارۋ-جاراقتىڭ بارلىق تۇرلەرىنە قولدانىلادى: جاۋىنگەرلىك تانكىلەر, جاۋىنگەرلىك بروندالعان ماشينالار, ۇلكەن كاليبرلى ارتيللەريالىق جۇيەلەر, جاۋىنگەرلىك ۇشاقتار, جاۋىنگەرلىك تىكۇشاقتار, اسكەري كورابلدەر, زىمىراندار مەن زىمىراندىق ۇشىرۋ قوندىرعىلارى, اتىس قارۋى مەن جەڭىل قارۋ-جاراق سىندى ونىمدەر بار», دەدى ت.مۇحتاروۆ.
سونىمەن قاتار, شارتتىڭ 6-بابىندا كادىمگى قارۋ-جاراق پەن وق-دارىلەردى جانە زاقىمداۋ قۇرالدارىن, بولشەكتەر مەن كومپونەنتتەردى بەرۋگە تىيىم سالۋ جاعدايلارى دا ەسكەرىلگەن. وعان قوسا, ءاربىر قاتىسۋشى مەملەكەت شارت ەرەجەلەرىن جۇزەگە اسىرۋ ءۇشىن ۇلتتىق باقىلاۋ تىزىمىمەن قاتار, ۇلتتىق باقىلاۋ جۇيەسىن قۇرىپ, پايدالانادى جانە وعان قاتىستى ماسەلەلەر بويىنشا اقپارات الماسۋ ماقساتىندا ۇلتتىق بايلانىس ورتالىعىن تاعايىندايدى.
سونداي-اق قاتىسۋشى مەملەكەت قارۋ-جاراق ەكسپورتى بويىنشا ناقتى وپەراتسيالاردى ورىنداۋعا رۇقساتتار بەرۋدى ۇلتتىق ەسەپكە الۋدى جۇرگىزەدى جانە جىل سايىن الدىڭعى جىل ءۇشىن رۇقسات ەتىلگەن قارۋ-جاراقتىڭ ەكسپورتى مەن يمپورتى تۋرالى اقپاراتتى قامتيتىن بايانداما ۇسىناتىن بولادى. وسىنداي مىندەتتەمەلەردى ورىنداۋ ءۇشىن ارنايى حاتشىلىق قۇرىلادى دا, ول ءوز كەزەگىندە قاتىسۋشى مەملەكەتتەردىڭ كونفەرەنتسياسىن شاقىرادى.
وسى كۇنى دەپۋتاتتار بەكىتىلگەن كۇن تارتىبىنە ساي, «قازاقستان رەسپۋبليكاسى ۇكىمەتى مەن گرۋزيا ۇكىمەتى اراسىنداعى قازاقستان رەسپۋبليكاسى ۇكىمەتىنىڭ گرۋزيا ۇكىمەتىنە بەرگەن مەملەكەتتىك كرەديتتەرى بويىنشا گرۋزيا ۇكىمەتىنىڭ بەرەشەگىن قايتادان قايتا قۇرىلىمداۋ تۋرالى كەلىسىمدەردى راتيفيكاتسيالاۋ تۋرالى», «قازاقستان رەسپۋبليكاسىنىڭ ۇكىمەتى مەن ازەربايجان رەسپۋبليكاسىنىڭ ۇكىمەتى اراسىنداعى حالىقارالىق اۆتوموبيل قاتىناسى تۋرالى كەلىسىمدى راتيفيكاتسيالاۋ تۋرالى» جانە «قازاقستان رەسپۋبليكاسى مەن ازيا دامۋ بانكى اراسىنداعى №2967-KAZ قارىز تۋرالى كەلىسىمگە تۇزەتۋلەرگە قاتىستى قازاقستان رەسپۋبليكاسى مەن ازيا دامۋ بانكى اراسىنداعى كەلىسىم-حاتتى راتيفيكاتسيالاۋ تۋرالى» زاڭىنىڭ جوباسى بويىنشا قورىتىندى ازىرلەۋ جونىندە قاۋلى قابىلدادى.
نۇرلىبەك دوسىباي,
«ەگەمەن قازاقستان»
