جالپى, وزەنگە جىبەرىلەتىن تۇقى بالىعىنىڭ شاباقتارى قاراعاندى وبلىسىنىڭ ارنايى بالىق شارۋاشىلىعى كاسىپورنىندا ءوسىرىلىپتى. ءاربىر شاباقتىڭ سالماعى 20-30 گرامم شاماسىندا. ەرتىس وزەنى بويىندا ورنالاسقان باسقا كاسىپورىندار دا شاباقتاردى سۋعا جىبەرەدى. كورپوراتسيا ەكولوگتارى «قازحروم» تۇك» فيليالى – اقسۋ فەرروقورىتپا زاۋىتىنداعى ارىپتەستەرىمەن بىرگە وزەنگە 15 000 شاماسىندا ءبىر جاسار بالىق تۇقىمدارىن جىبەرگەن بولاتىن. ال ستانسا جانىنداعى بالىق شارۋاشىلىعىنىڭ باسشىسى سەرگەي كيرەەۆتىڭ ايتۋىنشا, سۋعا جىبەرىلگەن شاباقتار ەندى ءتورت جىلدا تولىق جەتىلىپ, ۋىلدىرىعىن سۋ تۇبىندەگى شوپكە شاشادى دا, وزەندەگى تۇقى بالىقتارىنىڭ سانى كوبەيەدى. سوڭعى ەكى جىلدا وزەندە شورتان جانە تۇقى بالىقتارى ارتقان كورىنەدى. تۇقى بالىقتارى ەرتىس وزەنىندە ءومىر سۇرۋگە بەيىمدەلگەن. ستانسا ماماندارى جەرگىلىكتى بالىق ينسپەكتسياسىمەن بىرلەسە وزەن تازالىعىن ساقتاپ, بالىعىن كوبەيتىپ, قورعاۋ ماقساتىندا جۇمىس جاساۋدا. وسى كۇنگە دەيىن وزەنگە 160 مىڭنان استام تۇقى بالىعى جىبەرىلىپتى. بۇل ماقساتقا 6 ميلليون تەڭگەگە جۋىق قاراجات بولىنگەن. ەنەرگەتيكتەر وزدەرى دە بالىق شارۋاشىلىعىن اشىپ, وندا تۇقى شاباقتارى مەن بالىقتار وسىرەدى دە, ەرتىس وزەنىنە جىبەرەدى.
اتالعان كاسىپورىن ءوندىرىستى جاڭعىرتۋ باعىتىنداعى نەگىزگى جۇمىستاردان بولەك, ەرتىس وزەنى مەن جاسىباي كولىنىڭ جايىلماسىندا سەنبىلىكتەر وتكىزۋ, وزەننىڭ جاعالاۋلارىن كەڭەيتۋ, ارناسىن تازالاۋ, ەكولوگيالىق ايلىقتار, اعاش ەگۋ مەن كوگالداندىرۋ شارالارىن قامتيتىن اۋقىمدى قورشاعان ورتانى قورعاۋ شارالارىن تۇراقتى ىسكە اسىرىپ كەلەدى.
فاريدا بىقاي,
«ەگەمەن قازاقستان»
پاۆلودار وبلىسى
