وڭىرارالىق ىنتىماقتاستىق فورۋمىنا قازاقستان مەن قىتاي باسشىلارى نۇرسۇلتان نازارباەۆ پەن سي تسزينپين باستاماشىلىق جاساعان بولاتىن.
فورۋمعا قازاقستان تاراپىنان وڭىرلەر باسشىلارى: شىعىس قازاقستان وبلىسىنىڭ اكىمى دانيال احمەتوۆ, قوستاناي وبلىسىنىڭ اكىمى ارحيمەد مۇحامبەتوۆ, وبلىستار اكىمدەرىنىڭ ورىنباسارلارى, مينيسترلىكتەر مەن ۇلتتىق كومپانيالاردىڭ, بيزنەس-قاۋىمداستىقتاردىڭ وكىلدەرى قاتىسۋدا. قىتاي تاراپىنان پروۆينتسيالار باسشىلارى, مەملەكەتتىك ورگاندار مەن ءىرى كومپانيالاردىڭ جەتەكشىلەرى قاتىسىپ جاتىر.
– ءبىزدىڭ مەملەكەتتەرىمىز باسشىلارىنىڭ باستاماشىلىعىمەن ۇيىمداستىرىلعان فورۋم ەلدەرىمىز اراسىنداعى دوستىقتى, تاتۋ كورشىلەستىك پەن ستراتەگيالىق ارىپتەستىكتى نىعايتۋعا سونى سەرپىن بەرەتىن بولادى, – دەدى ا.مامين جانە فورۋمنىڭ ەكىجاقتى ۇنقاتىسۋدىڭ تارتىمدى الاڭى جانە قازاقستان مەن قىتايدىڭ وڭىرارالىق ىنتىماقتاستىعىنىڭ كوكەيكەستى ماسەلەلەرى بويىنشا ءتيىمدى كونسۋلتاتسيالار الماسۋعا مۇمكىندىك بەرەتىن باستاما رەتىندە تيىمدىلىك اكەلەتىنىن اتاپ ءوتتى.
قازاقستان رەسپۋبليكاسى پرەمەر-ءمينيسترىنىڭ ءبىرىنشى ورىنباسارى «نۇرلى جول» باعدارلاماسىمەن استارلاسقان ء«بىر بەلدەۋ – ءبىر جول» جوباسىنىڭ اياسىندا فورۋم وتكىزۋدىڭ ماڭىزدىلىعىنا دا باسا نازار اۋداردى.
– مەملەكەت باسشىسى نۇرسۇلتان نازارباەۆتىڭ باستاماسى «جىبەك جولىنىڭ ەكونوميكالىق بەلدەۋى» جوباسى مەن «نۇرلى جول» باعدارلاماسى شەڭبەرىندە ينۆەستيتسيالار تارتۋعا جانە ەكى ەلدىڭ ينفراقۇرىلىمدىق جوبالار بويىنشا ءىس-قيمىلدارىن ۇيلەستىرۋگە مۇمكىندىك بەردى, – دەپ اتاپ وتە كەلىپ, ا.مامين ەكى ەل ەكونوميكاسىنىڭ باسەكەگە قابىلەتتىلىگىن ارتتىراتىن جوبالاردىڭ تابىستى جۇزەگە اسىرىلىپ كەلە جاتقانىن كولدەنەڭ تارتتى.
ا.مامين فورۋمنىڭ ەكى ەلدىڭ ەكونوميكالىق ءوسىمىنىڭ, ساۋ-دا, ينۆەستيتسيالىق, كولىكتىك-ترانزيتتىك ىنتىماقتاستىقتى دامىتۋدىڭ ىرگەتاسى رەتىندەگى ماڭىزىنا توقتالىپ, 2015 جىلدىڭ جەلتوقسان ايىندا قول قويىلعان شەكارالىق ىنتىماقتاستىق باعدارلاماسىن قازاقستان مەن قىتايدىڭ شەكارالىق وڭىرلەرىنىڭ اراسىنداعى ىنتىماقتاستىعىنىڭ ايتارلىقتاي ماڭىزى بار قۇجاتىنىڭ ءبىرى رەتىندە اتادى.
– قازاقستاننىڭ بارلىق 16 ءوڭىرى ىسكەرلىك بايلانىستارعا يە جانە قىتايدىڭ ءتۇرلى پروۆينتسيالارىنداعى كومپانيالارمەن بىرلەسكەن جوبالاردى جۇزەگە اسىرۋ ۇستىندە, – دەپ اتاپ ءوتتى ا.مامين.
قازاقستان رەسپۋبليكاسى پرەمەر-ءمينيسترىنىڭ ءبىرىنشى ورىنباسارى «قىتاي-اسەان» ەكسپو-سىنىڭ 14-ءشى جۇمىسىنا قاتىسىپ, قازاقستاننىڭ ۇلتتىق پاۆيلونىن اشتى. قازاقستان پاۆيلونى وتاندىق وندىرىسشىلەردىڭ ءتۇرلى ءونىم تۇرلەرى قويىلعان 20 ستەند ارقىلى ۇسىنىلىپ وتىر.
– قازاقستاننىڭ «قىتاي-اسەان» ەكسپو-سىنىڭ 14-ءشى جۇمىسىنا قاتىسۋى «نۇرلى جول» جانە «جىبەك جولىنىڭ ەكونوميكالىق بەلدەۋىنىڭ» ءارى قاراي تۇيىسۋىنە, قازاقستاننىڭ, قىتاي مەن وڭتۇستىك-شىعىس ازيا مەملەكەتتەرى قاۋىمداستىعىنا مۇشە ەلدەردىڭ دامۋ باعدارلامالارىنا قوسىمشا سەرپىن بەرەتىن بولادى, – دەپ اتاپ ءوتتى ا.مامين.
قحر-عا ساپارى شەڭبەرىندە قازاقستان رەسپۋبليكاسى پرەمەر-ءمينيسترىنىڭ ءبىرىنشى ورىنباسارى قىتايدىڭ China National Chemical Engineering Co.Ltd, China General Technology Holding Ltd, CITIC Group, Xin Xin Corporation, China Railways Engineering Group Co, TBEA Heng Yang Transformer Co سياقتى اسا ءىرى كومپانيالارىنىڭ باسشىلارىمەن كەزدەسۋلەر وتكىزدى.
* * *
وڭىرارالىق ىنتىماقتاستىق فورۋمى شەڭبەرىندە قازاقستاننىڭ «باتىس ماركا لامب» ەت وڭدەۋ كومپانياسىنىڭ توراعاسى راقىمجان ەسماعامبەتوۆ پەن قىتايدىڭ Zheng & Agrotechnology Co. Ltd كومپانياسىنىڭ توراعاسى لي سيانمين 30 مىڭ باس قويدى سەمىرتىپ سويۋعا جانە قوي ەتىن قحر-عا ەكسپورتتاۋعا ارنالعان زاماناۋي بورداقىلاۋ الاڭىن قۇرۋ تۋرالى مەموراندۋمعا قول قويدى. شەتەل ينۆەستيتسياسىنىڭ كولەمى 47 ملن اقش دوللارىن قۇرايدى. جوبا 2018 جىلى جۇزەگە اسىرىلماق. قۋاتى اۋىسىمىنا 1,5 مىڭ باس قوي سويۋعا جەتەتىن «باتىس ماركا لامب» ەت كومبيناتى قازىردىڭ وزىندە يرانعا قوي ەتىن ەكسپورتتاي باستادى.
سونداي-اق «Kazakh Invest» ۇك» اق باسقارماسىنىڭ توراعاسى ماقسات قاباشەۆ پەن «Silver Tiger Capital» كومپانياسىنىڭ باسشىسى تسۋي لۋنفەي كاپيتالداندىرىلۋى 250 ملن اقش دوللارى بولاتىن بىرلەسكەن ينۆەستيتسيالىق قور قۇرۋ تۋرالى كەلىسىمگە قول قويدى.
«Aitey Group» حولدينگى باسقارماسىنىڭ توراعاسى سەيىتجان ەسىموۆ پەن Stone Stock كومپانياسى باسقارماسىنىڭ توراعاسى حۋ تسزينپەي ستراتەگيالىق ارىپتەستىك تۋرالى كەلىسىمگە قول قويدى.
