توعىزىنشى راۋند: قارسىلاسىن بىرنەشە مارتە نوكداۋنعا جىبەرگەن قانات يسلام بۇگىنگى كەشتىڭ باستى كەزدەسۋىندە تەكنيكالىق نوكاۋتپەن جەڭىسكە جەتتى.
بەسىنشى راۋند: راۋندتىڭ ورتا تۇسىنا كەلگەندە قانات قارسىلاسىن ەكىنشى رەت نوكداۋنعا جىبەردى. قانادادان كەلگەن بوكسشى ازىرشە قاناتتىڭ اۋىر سوققىلارىنا توتەپ بەرۋدە.
ءۇشىنشى-ءتورتىنشى راۋند: جەكپە-جەك باسىن قارقىنمەن باستاعان قانات ءۇشىنشى راۋندتا قارسىلاسىن نوكداۋتقا جىبەردى. قاناتتىڭ سوققىلارىنان كۋكتى گونك ءۇنى قۇتقارىپ قالدى. ءتورتىنشى راۋندتا دا قانات قارسىلاسىنا قاراعاندا بەلسەندى بولدى. الايدا, تورەشى قانات يسلام بەلدەن تومەن سوققى جاسادى دەپ, ۇپايىن شەگەرىپ تاستادى. ءبىرىنشى راۋندتا دا تورەشى قاناتقا بەلدەن تومەن سوققى جاساعانى ءۇشىن اۋىزشا ەسكەرتۋ بەرگەن بولاتىن.
سونىمەن, شارشى الاڭداعى جۇرگىزۋشىلەر ەكى بوكسشىنىڭ اتاق-ابىرويىن جانكۇيەرلەرگە تانىستىرىپ, تورەشى جەكپە-جەكتىڭ ەرەجەسىن ەسكەرتىپ, كەزدەسۋدى باستاۋعا رۇقسات بەردى.
"جامان بالا" برەندون كۋك جەكپە-جەك الدىندا استاناعا تەك جەڭىس ءۇشىن كەلگەنىن ايتقان-دى.
«مەن نەگىزى قازاقستانعا جوسپارلانعان ۋاقىتتان ءۇش كۇن ەرتە كەلىپ الدىم. ۋاقىتتىق بەلدەۋگە, اۋا رايىنا تەز ۇيرەنىسىپ كەتتىم. قاناتتىڭ جەكپە-جەكتەرىن قاراپ شىقتىم. بىراق, قازىر سىزدەرگە ول تۋرالى ەشتەڭە ايتا المايمىن. ءبارىن شارشى الاڭ كورسەتەدى. بۇل مەنىڭ سىرت ەلدەگى العاشقى كەزدەسۋىم. مەن ەلدەرىڭىزگە تەك جەڭىس ءۇشىن كەلدىم», - دەگەن ەدى كۋك.
جانعوش تۇراروۆ پەن برۋنو رومەيدىڭ جەكپە-جەگى 10 راۋندقا سوزىلدى. تارتىستى وتكەن جەكپە-جەكتە جانعوشتىڭ اسىعى الشىسىنان ءتۇسىپ, ۇپاي سانىمەن جەڭىسكە جەتتى.
بوكس كەشىنىڭ ماڭىزدى كەزدەسۋىنە از ۋاقىت قالدى. وسى ورايدا, قانات يسلامنىڭ ءباسپاسوز جيىنىندا ايتقان ءسوزىن وقي وتىرىڭىز:
«ەلوردادا تۇڭعىش رەت كەزدەسۋ وتكىزبەكپىن. 9-شى قىركۇيەك كۇنى شارشى الاڭعا شىعاتىن بوكسشىلاردىڭ بارلىعى تاۋەلسىز ەلدىڭ ەر-ازاماتتارى. ماقساتىمىز - ەلگە جەڭىس سىيلاۋ, قازاق بوكسشىلارىنىڭ مىقتى ەكەنىن بۇكىل الەمگە تانىتۋ»
كەشتى تاماشالاۋعا قازاق كۇرەسىنىڭ, جالپى قازاق سپورتىنىڭ ايبوز ۇلى جاقسىلىق ۇشكەمپىروۆ تە كەلدى.
بوكس كەشى جانعوش تۇراروۆ پەن برۋنو رومەي اراسىنداعى كەزدەسۋمەن جالعاسادى. ءبىزدىڭ بوكسشى كاسىپقوي رينگتە 21 رەت ونەر كورسەتكەن. ونىڭ قارسىلاسى ارگەنتينالىق سپورتشى دا وسىنشا مارتە شارشى الاڭعا شىققان.
جانىبەك پەن پەرەيرو اراسىنداعى بوكس سوڭىنا دەيىن سوزىلدى. برازيليالىق سپورتشى جەكپە-جەك اياقتالعانشا شىداپ بەردى. ايتسە دە, كەزدەسۋ بارىسىندا جانىبەك ءالىمحان ۇلى ايقىن باسىمدىقپەن جەڭىسكە جەتتى.
قازىر شارشى الاڭعا نوكاۋتتىڭ شەبەرى جانىبەك ءالىمحان ۇلى كوتەرىلەدى. ونىڭ قارسىلاسى برازيليالىق پەرەيرو دوس سانتوس. ايتا كەتۋ كەرەك, بۇل جانىبەكتىڭ كاسىپقوي رينگتەگى نەبارى 2-ءشى كەزدەسۋى.
رۋسلان مىرساتاەۆ قارسىلاسىن نوكاۋتپەن تىزە بۇكتىردى.
جەكپە-جەكتەر قالاي ءوتىپ جاتىر؟
التىنشى جەكپە-جەك. رۋسلان مىرساتاەۆ پەن ارگەنتينالىق اندرەس ماتياس كۇش سىناسادى. ەكى بوكسشى دا كاسىپقوي رينگكە ەندى قادام باسقان سوپرتشىلار. مىرساتاەۆ 4-ءشى, ماتياس 6-شى جەكپە-جەگىن وتكىزبەك.
ايتىپ اۋىز جيىپ بولعانىمىزشا نۇرسۇلتان ءدوپ تيگەن سوققىسىمەن دۋارتەنى نوكاۋتقا جىبەردى.
جاڭاباەۆ جەكپە-جەك باستالا سالا قارسىلاسىن نوكداۋنعا ءتۇسىردى. ارتى جاقسى بولسىن دەيىك.
بوكس كەشى جالعاسادى. رينگكە تاعى ءبىر برازيليالىق الەكس ساندرو دۋارتە مەن تارازدىڭ تارلانى نۇرسۇلتان جاڭاباەۆ كوتەرىلدى. بۇگىنگى كەزدەسۋ نۇرسۇلتاننىڭ كاسىپقوي بوكستاعى 3-ءشى جەكپە-جەگى. جەرلەسىمىزگە ساتتىلىك تىلەيمىز.
كۇتكەنىمىزدەي الي احمەدوۆ جەڭىسكە جەتتى. توماس ءدجاستيننىڭ دىم ىستەي الماسىنا كوزى جەتكەن تورەشى ويىندى توقتاتتى.
6 راۋند. الي قارسىلاسىن ەكى رەت نوكداۋنعا جىبەردى. توماس قولعابىن تاستاي قاشار ما ەدى, گونگ داۋسى ەستىلدى.
"اۋىل قايدا, سۋ قايدا؟" بۇل جەكپە-جەكتى وسىلاي سۋرەتتەۋگە بولادى.
توماستىڭ مىقتىلىعىن مويىنداماسقا شارا جوق. 4 راۋند بويى تاياق جەپ ءجۇرىپ نوكاۋتقا تۇسپەۋ - ەرلىكپەن پارا-پار.
بۇگىنگى كەشتى تاماشالاۋعا كوپتەگەن تانىمال تۇلعالار جينالعان. سولاردىڭ ءبىرى - دانيار ەلەۋسىنوۆ.
زالعا جينالعان كورەرمەندەر كوپ.
وپپا! ەكىنشى راۋندتا الي قارسىلاسىن نوكداۋنعا جىبەردى. جاڭبىرداي جاۋعان سوققىلار دەپ وسىنى ايتۋعا بولادى.
ءبىرىنشى راۋند. ءاليدىڭ الەۋەتى قارسىلاسىنا قاراعاندا جوعارى ەكەنى انىق بايقالىپ تۇر. بىرنەشە مارتە جويقىن سوققىسىن دارىتىپ ۇلگەردى.
بۇگىنگى كەشتىڭ 4-ءشى جەكپە-جەگى. رينگكە امەريكالىق توماس دجاستين مەن قازاقستاندىق الي احمەتوۆ شىعادى. اقش بوكسشىسى 18 كەزدەسۋ وتكىزىپ, 7 مارتە نوكاۋتپەن جەڭگەن. الي 8 جەكپە-جەكتىڭ بارىندە قارسىلاسىنان باسىم تۇسكەن. بۇل جەكپە-جەك 10 راۋندتان تۇرادى.
ءوز جەكپە-جەگىنەن كەيىن ديماش نيازوۆ سۇحبات بەرگەن. ونىڭ ايتۋىنشا, جانكۇيەرلەردىڭ قولداۋى كوپ كومەكتەسىپتى. ءبىزدىڭ ورەنىمىز قارسىلاسىن نوكاۋتپەن جەڭە الماعانى ءۇشىن كەشىرىم سۇراپ جاتىر. كەشىرەمىز بە؟
ءبىتتى. دجوناتان ەكى رەت نوكداۋنعا تۇسكەن. شاكىرتىنىڭ تاياق جەپ جاتقانىنا توزبەگەن باپكەرى رينگكە سۇلگىسىن لاقتىردى. وسىلايشا, ءبىرىنشى راۋندتىڭ 2 مينۋتىندا ايدوس ەربوسىن ۇلى قارسىلاسىن قاپى قالدىردى. ارگەنتينالىققا وكپەلەۋدىڭ رەتى جوق. بارى وسى بولدى.
تورەشىلەر جەكپە-جەكتى باستاۋعا رۇقسات بەرە سالا ايدوس بەل شەشە كىرىستى. ونىڭ سوققىلارىنا ارگەنتينالىق شىداي الماي, رينگتى اينالا قاشىپ ءجۇر.
كەشىمىزدى جالعاستىرامىز. شارشى الاڭعا ارگەنتينالىق دجوناتان بارباديللو مەن الماتىلىق ايدوس ەربوسىن ۇلى كوتەرىلدى. دجوناتان 17 جەكپە-جەك وتكىزسە, ايدوس ۇشىن كاسىپقوي بوكستاعى نەبارى 7 كەزدەسۋ. مەسسيدىڭ جەرلەسىنىڭ قارىمى قالاي ەكەنىن بايقايمىز. اتاقتى وتانداسى سەكىلدى دجوناتان دا جەڭىسكە جەتە الا ما؟
ەكىنشى جەكپە-جەكتە ۇپاي سانى بويىنشا ديماش نيازوۆ جەڭىسكە جەتتى. ءۇش تورەشى دە ءبىراۋىزدان ءبىزدىڭ بوكسشىنى جەڭىسكە لايىق دەپ تانىپتى.
ورەندەرىمىزدى قولداۋعا دانيار ەلەۋسىنوۆ, داۋرەن ەلەۋسىنوۆ سەكىلدى تانىمال بوكسشىلار دا كەلىپتى.
ديماشتىڭ سوققىسى ءدوپ تيگەن سايىن كورەرمەندەر قيقۋلاپ كەتەدى. "ديماش", "قازاقستان" دەگەن ۇراننىڭ قانشا رەت ەستىلگەنىنەن ءبىزدىڭ بوكسشىنىڭ سوققىسى قانشاۋى ءدال تيگەنىن بايقاۋعا بولادى.
جەكپە-جەكتىڭ 5-راۋندى ءوتىپ جاتىر. ازىرگە قاي بوكسشىنىڭ سوققىسى جويقىن شىعىپ جاتقانىن ايتۋ قيىن. ەكى سپورتشى دا مىقتى ەكەن. ءبىر-بىرىنەن باسىم تۇسە الار ەمەس. ايتسە دە, ديماشتىڭ شويىن جۇدىرىعى نىساناعا ءدوپ ءتيىپ جاتىر.
زالعا جينالعان كورەرمەندەر قايتا-قايتا "ديماش, ديماش" دەپ قولداپ وتىر. ايتا كەتۋ كەرەك, بۇگىندە قازاقستاندا ديماش ەسىمى تانىمال. مۇحيتتىڭ ار جاعىندا جۇرگەن قانداسىمىز بوكستان بولەك, ەڭبەگى ارقاسىندا حالىقتىڭ ىقىلاسىنا بولەنگەن-ءدى.
ءبىرىنشى راۋند تەڭ جاعدايدا ءوتتى دەسە بولادى. قارسىلاستار ءبىر-ءبىرىنىڭ وسال تۇسىن اڭدىپ جۇرگەندەي.
ديماش قازىرگى تاڭدا نيۋ-يورك قالاسىندا پوليتسيا بولىپ قىزمەت اتقارادى.
بۇگىنگى كەشتىڭ ەكىنشى جەكپە-جەگى تاعى ءبىر برازيليالىق بوكسشى ەدۋاردو پەرەيرو دوس رەيس پەن ديماش نيازوۆتىڭ اراسىندا وتەدى. ەدۋاردو 22 رەت شارشى الاڭعا شىعىپ, 4 رەت جەڭىلگەن. ديماش كاسىپقوي رينگتەگى 12-ءشى جەكپە-جەگىن وتكىزەدى.
ءبىرىنشى راۋندتىڭ 50 سەكۋندىندا مەيىرىم نۇرسۇلتانوۆ قارسىلاسىن نوكاۋتقا جىبەردى. جەكپە-جەك باستالا سالا مەيىرىم العا لاپ قويعان. برازيليالىق سپورتشى قازاق بوكسشىسىنىڭ جاڭبىرداي جاۋعان سوققىسىنا توتەپ بەرە العان جوق. ايتا كەتۋ كەرەك, بۇل مەيرىمنىڭ كاسىپقوي بوكستاعى 4 كەزدەسۋى. استانالىق سپورتشى سونىڭ بارىندە جەڭىسكە جەتىپ, 3-ەۋىندە قارسىلاسىن نوكاۋتقا جىبەردى.
شارشى الاڭعا العاش بولىپ مەيىرىم نۇرسۇلتانوۆ پەن برازيليالىق يسماەل بۋەنو كوتەرىلدى.
«ەكسپو-2017» حالىقارالىق كورمەسى اياسىندا ۇيىمداستىرىلىپ جاتقان قانات يسلام مەن برەندان كۋك اراسىنداعى جەكپە-جەك باستالدى.
