2-8 قىركۇيەك ارالىعىنداعى فورۋم-فەستيۆال تەاتر رەجيسسەرلەرىنىڭ شىعارماشىلىعىنا جول اشىپ, قازاق رەجيسسۋراسىن جاڭا ەسىمدەرمەن تولىقتىرۋدى ماقسات تۇتادى, سونىمەن قاتار, جاس جانە تانىمال تەاتر رەجيسسەرلەرىمەن پىكىرتالاستار, لەكتسيالار, شەبەرلىك-سىنىپتارى, سەمينارلار وتكىزىلىپ, وتاندىق ونەردىڭ ءورىسىن كەڭەيتۋگە مۇمكىندىك تۋادى.
قازاقتىڭ جاڭاشىل تەاتر رەجيسسەرى قايرات سۇگىربەكوۆتىڭ ەسىمىن ەستە قالدىرۋ ماقساتىندا ۇيىمداستىرىلىپ وتىرعان شارانىڭ باستى ماقساتى تالانتتى جاس رەجيسسەرلەر شىعارماشىلىعىنا قوعام مەن قالىڭ كوپشىلىكتىڭ نازارىن اۋدارۋ.
فورۋم-فەستيۆالگە رەسپۋبليكامىزداعى 20-40 جاس ارالىعىنداعى جاس رەجيسسەرلەردەن ەلىك نۇرسۇلتان, داۋرەن سەرعازين, دينا قۇنانبايقىزى, رۇستەم جانامانوۆ, بولات ءابدىراحمانوۆ, فارحاد مولداعاليەۆ, جۇلدىزبەك جۇمانباي, گۇلناز قامىسباەۆا, مەيرام حابيبۋللين جانە ايدىن سالبانوۆ قاتىسۋدا.
فەستيۆال بارىسىندا كورەرمەندەر قازاقتىڭ مەملەكەتتىك م. اۋەزوۆ اتىنداعى اكادەميالىق دراما تەاترى, ع.مۇسىرەپوۆ اتىنداعى بالالار مەن جاسوسپىرىمدەر تەاترى, رەسپۋبليكالىق اكادەميالىق نەمىس دراما تەاترى, استانا جاستار تەاترى, اقتوبە وبلىستىق «الاقاي» تەاترى, سولتۇستىك قازاقستان وبلىستىق س.مۇقانوۆ اتىنداعى قازاق دراما تەاترى, شىعىس قازاقستان وبلىستىق جاستار تەاترى, وڭتۇستىك قازاقستان وبلىستىق ج.شانين اتىنداعى اكادەميالىق قازاق دراما تەاترى, الماتى قالاسى مەملەكەتتىك قۋىرشاق تەاترى, اتىراۋ وبلىستىق ماحامبەت وتەمىس ۇلى اتىنداعى قازاق دراما تەاترى قويىلىمدارىن تاماشالاي الادى.
قارشىعا كۇلەن
