م.نالىباەۆ اۋىلىنداعى مەكتەپتىڭ اشىلۋىنا قىزىلوردا وبلىسىنىڭ اكىمى قىرىمبەك كوشەرباەۆ قاتىسىپ, اۋىل تۇرعىندارىن قۋانىشتارىمەن قۇتتىقتادى.
- ەلباسى نۇرسۇلتان ءابىش ۇلى نازارباەۆ ءوزىنىڭ جىل سايىنعى جولداۋلارىندا ءبىلىم سالاسىنا اسا كوڭىل ءبولىپ وتىراتىنىن وزدەرىڭىز بىلەسىزدەر. وبلىس كولەمىندە جىل سايىن جاڭا مەكتەپتەر پايدالانۋعا بەرىلۋدە. وسىلايشا اپاتتىق جاعدايداعى مەكتەپتەردى جويۋعا قول جەتكىزىپ كەلەمىز,- دەدى وبلىس اكىمى ق.كوشەرباەۆ.
ايتا كەتۋ كەرەك, مەكتەپ 2000 جىلى اسار ادىسىمەن سالىنىپ, ونىڭ قۇرىلىسىنا اۋىل تۇرعىندارى, مۇعالىمدەر مەن وقۋشىلار اتسالىسقان. كەزەك كۇتتىرمەس شارالاردى قولعا الۋدىڭ ناتيجەسىندە 300 ورىندىق تيپتىك جوباداعى جاڭا مەكتەپ بوي كوتەردى.
ءدال وسى كۇنى, جاڭاقورعان اۋدانى تومەنارىق اۋىلىندا جاڭا مەكتەپ اشىلىپ, وعان وبلىس اكىمىنىڭ ورىنباسارى رۋسلان رۇستەموۆ قاتىستى. ءبىلىم ۇياسى 300 ورىندىق جانە وسىعان دەيىن اپاتتىق جاعدايدا بولعان. ايتا كەتۋ كەرەك, جاڭاقورعان اۋدانىنىڭ وزىندە بيىلعى جىلى وسى تارىزدەس 6 مەكتەپتىڭ قۇرىلىسى جۇرگىزىلۋدە.
انىقتاما ءۇشىن: قىزىلوردا وبلىسىندا ءۇش اۋىسىمدىق ءبىلىم بەرۋ جۇيەسى جويىلىپ, 3 پەن 6 جاس ارالىعىنداعى بالالاردى بالاباقشامەن قامتۋ ماسەلەسى شەشىلدى. جىل سوڭىنا دەيىن اپاتتى جاعدايداعى مەكتەپتەر سانىن تولىقتاي شەشۋ جوسپارلانىپ وتىر.
