شارانى وبلىستىق تىلدەردى دامىتۋ باسقارماسى ۇيىمداستىردى. «دوڭگەلەك ۇستەل» ءماجىلىسىنىڭ شەڭبەرىندە قوستانايلىق ءتىل ماماندارى قازاق ءتىلىن ۇيرەتۋدىڭ تەحنولوگياسى مەن ادىستەمەلەرى, شەبەرلىك ساباقتارى كورسەتتى.
نەگىزى قوستاناي وبلىستىق تىلدەردى دامىتۋ باسقارماسى بۇل جۇمىستى 2009 جىلدان جۇرگىزىپ كەلەدى. باسقارمانىڭ تىلدەردى ۇيرەتۋ ورتالىعى شەتەلدە تۇراتىن قازاقتار ءۇشىن انا ءتىلىن ۇيرەتۋدىڭ ارنايى باعدارلاماسىن جاساعان بولاتىن, ونى سەگىز جىلدان بەرى رەسەيلىك قازاقتار پايدالانىپ كەلەدى. بۇل جولى شەبەرلىك ساباقتارىنا چەليابى وبلىسىنىڭ بىرنەشە اۋداندارىنان 10 مۇعالىم كەلىپ قاتىستى. ولاردىڭ بارلىعى دا وزدەرىنىڭ تۇرعىلىقتى جەرلەرىندەگى مەكتەپتەردە قازاق بالالارعا انا ءتىلىن فاكۋلتاتيۆتىك ساباقتار جۇرگىزۋ ارقىلى ۇيرەتەدى.
«مەن چەليابى قالاسىنداعى ستۋدەنتتەرگە بىرنەشە جىلدان بەرى انا ءتىلىن وقىتىپ كەلەمىن, ءبىزدىڭ ءوزىمىز دە انا ءتىلىن ناشار بىلەمىز. بىراق جاستاردىڭ دا, ءوزىمىزدىڭ دە قازاق تىلىنە دەگەن ىنتامىز جوعارى دەپ ايتا الامىن. ساباق ۇزبەي وتكىزىلەدى. ءتىل جوعالسا بىزگە ۇلت رەتىندە دە قاۋىپ ەكەنىن تۇسىنگەنبىز. قازاقتىڭ داستۇرلەرىن ساقتاۋعا تىرىسامىز» دەيدى يۋليت بايداۋلەتوۆا.
«دوڭگەلەك ۇستەل» ءماجىلىسى شەڭبەرىندە رەسەيلىك مۇعالىمدەرگە قوستانايلىق ءتىل ماماندارى ساندۋعاش عۇبايدۋللينا, دميتري روماششەنكو ويىن ارقىلى جۇرگىزىلەتىن شەبەرلىك ساباقتارىن, وزىق ادىستەمەلەرىن كورسەتتى. چەليابىلىك مۇعالىمدەرگە وزىق ادىستەمەلىك باعدارلامالار كوشىرىلىپ بەرىلدى. مۇعالىمدەرگە سەرتيفيكاتتار تابىستالدى. مۇنداي جۇمىستى تىلدەردى دامىتۋ باسقارماسى جىلسايىن جالعاستىرىپ كەلەدى. «بارماساڭ-كەلمەسەڭ جات بولارسىڭ» دەگەندەي, رەسەيلىك قانداستارىمىز قوستاناي قالاسىنىڭ كورىكتى جەرلەرىن ارالادى.
ءنازيرا جارىمبەت,
«ەگەمەن قازاقستان»
قوستاناي
