اماندىق باتالوۆ جيىن بارىسىندا اۋدان جانە قالا اكىمدەرىنە, وبلىستىق باسقارمالار مەن دەپارتامەنتتەردىڭ باسشىلارىنا بىرقاتار تاپسىرمالار جۇكتەدى. «بيىلعى جىلدىڭ وتكەن جەتى ايىنىڭ الەۋمەتتىك-ەكونوميكالىق دامۋ قورىتىندىسى شىعارىلدى. ءبىزدىڭ الدىمىزدا بىرنەشە ماڭىزدى تاپسىرما تۇر. مەملەكەتتىك «نۇرلى جەر» جانە «نۇرلى جول» باعدارلامالارىنىڭ ورىندالۋى ەلباسىنىڭ ەرەكشە باقىلاۋىندا. سول سەبەپتى, وسى جانە وزگە دە باعىتتار بويىنشا جۇمىستاردى قارقىندى جۇرگىزۋ قاجەت. مەملەكەتتىك-جەكەمەنشىك سەرىكتەستىك مەحانيزمدەرىن قولدانۋ ماسەلەسىندەگى, سونىڭ ىشىندە دەنساۋلىق ساقتاۋ سالاسىندا وسى مەحانيزمدى قولدانۋدا بەلسەندى جۇمىستار جۇرگىزۋىمىز كەرەك. وڭىرگە ينۆەستيتسيا تارتۋ دا ەرەكشە نازاردا.
سوندىقتان دا, اۋدان, قالا اكىمدەرى مەن باسقارما جانە دەپارتامەنت باسشىلارىنا وسى اتالعان تاپسىرمالاردى ورىنداۋدا ۇلكەن جاۋاپكەرشىلىك تانىتۋدى سۇرايمىن. اتالعان باعىتتاردىڭ ورىندالۋى ارقايسىڭىزدىڭ اتقارعان جۇمىستارىڭىزدىڭ ايقىن كورسەتكىشى بولىپ تابىلادى», - دەدى ءوڭىر باسشىسى. جيىن بارىسىندا وبلىس اكىمى «رۋحاني جاڭعىرۋ» باعدارلاماسىن ورىنداۋعا ەرەكشە نازار اۋدارۋ قاجەتتىگىن دە اتاپ ءوتتى. اماندىق عابباس ۇلى وبلىستىق ىشكى ساياسات باسقارماسىنىڭ باسشىسى مەن وسى سالاعا جەتەكشىلىك ەتەتىن اكىم ورىنباسارىنا: «وبلىستا «رۋحاني جاڭعىرۋ» باعدارلاماسىن ىسكە اسىرۋ باعىتىندا قولعا الىنعان جۇمىستاردى كۇشەيتۋ قاجەت. بىزدە كوپ مۇمكىنشىلىكتەر بار, الايدا بەلسەندىلىك تانىتۋ جاعى اقساپ تۇر. ىستەلىپ جاتقان جۇمىستارىڭىزدا ناقتىلىق بايقالمايدى. جاڭاشا كوزقاراسپەن قاراپ, ءتيىستي شارالار قابىلداڭىزدار, - دەي كەلە, «رۋحاني جاڭعىرۋ» باعدارلاماسىن جۇزەگە اسىرۋ ماقساتىندا ارنايى اشىلعان تالدىقورعان قالاسىنداعى وبلىستىق جوبالىق كەڭسە جۇمىسىن قايتا قاراپ شىعۋدى تاپسىردى.
