كاسپي جاعالاۋى ەلدەرىنىڭ تەاتر ونەرى سالاسىنداعى ىنتىماقتاستىعىن كۇشەيتۋ مەن مادەني جانە رۋحاني بايلانىستاردىڭ ودان ءارى نىعايۋىنا ۇلەس قوسۋ, تەاتر ونەرىن دامىتۋ جانە تەاترلاردىڭ شىعارماشىلىق باستامالارىن ىنتالاندىرۋ, بىرلەسكەن شىعارماشىلىق جوبالارعا جانە كاسىبي قارىم – قاتىناسقا جاعداي جاساۋ, جۇرتشىلىق نازارىن قازىرگى زامانعى جاڭا تەاترلىق ۇدەرىسكە اۋدارۋ ماقساتىنداعى فەستيۆالعا كاسپي جاعالاۋى جانە تۇركى تىلدەس ەلدەردىڭ كاسىبي دراما جانە مۋزىكالىق-دراما تەاترلارى قاتىسىپ, تۇركسوي-عا مۇشە-ەلدەردىڭ مەملەكەتتىك تەاترلارى باسشىلارى كەڭەسىنىڭ كەزەكتى ءماجىلىسى وتەدى.
فەستيۆالگە قازاقستان, ءازىربايجان, رەسەي جانە يران ەلدەرىنەن كلاسسيكالىق نەمەسە ۇلتتىق رەپەرتۋارلىق قويىلىمىمەن ءبىر تەاتر ۇجىمى قاتىسپاق. اتاپ ايتساق, رەسەيدەن «نوعاي مەملەكەتتىك دراما تەاترى» مەملەكەتتىك بيۋدجەتتىك مەكەمەسى مەن «استراحان دراما تەاترى» مەملەكەتتىك اۆتونوميالىق مادەنيەت مەكەمەسى, قازاقستاننان م. اۋەزوۆ اتىنداعى قازاق مەملەكەتتىك اكادەميالىق دراما تەاترى مەن ن.ءجانتورين اتىنداعى ماڭعىستاۋ وبلىستىق مۋزىكالىق-دراما تەاترى, ءازىربايجاننان يۋگ مەملەكەتتىك تەاترى جانە يراننان «اينا» تەاتر توبى قاتىسىپ, تەاتر سايىسىنا وسى ەلدەردىڭ تانىمال ماماندارى قازىلىق ەتپەك.
گۇلايىم شىنتەمىرقىزى,
«ەگەمەن قازاقستان».
ماڭعىستاۋ وبلىسى