بۇقارالىق اقپارات قۇرالدارى وكىلدەرىنىڭ زاۋىت باسشىلىعىمەن بولعان كەزدەسۋىندە ءبىراز جايت ورتاعا سالىندى. سەرىكتەستىكتىڭ باس ديرەكتورى ولەگ بالىبين زاۋىتتىڭ وندىرىستىك مۇمكىندىكتەرىن العا تارتا كەلىپ, ساتۋ جەلىلەرى ارقىلى ءوز ونىمدەرىن قازاقستاننىڭ كەز كەلگەن وڭىرىنە جەتكىزە الاتىنىن ايتتى. ول ءسوز رەتىندە ەلىمىزدىڭ وزگە دە وڭىرلەرىندەگى كاسىپورىندارىمەن بايلانىستار ورناتۋعا مۇددەلى ەكەندىكتەرىن دە جاسىرمادى. جالپى, كاسىپورىن ازىرگە سۇرانىسقا يە ارزان دا ساپالى تىركەمەلى جانە اسپالى اۋىل شارۋاشىلىعى تەحنيكالارىن شىعارۋدى كەڭەيتۋگە دەن قويىپ وتىر. بۇل تۇرعىدان كەلگەندە اۋىلشارۋاشىلىق مەحانيكالاندىرۋ عىلىمي-زەرتتەۋ ينستيتۋتىمەن سىناقتان وتكەن توپىراقتى وڭدەۋگە جانە سەبۋگە ارنالعان اۋىلشارۋاشىلىق تەحنيكالارىنىڭ كونسترۋكتورلىق قۇجاتتارىن بەرۋ تۋرالى كەلىسىم دە بار. جاقىن ۋاقىتتارى العاشقى نۇسقالارى ازىرلەنىپ, ودان كەيىن وندىرىسكە جاپپاي ەنگىزۋ جوسپارلانعان. زاۋىت جىلىنا «PVP-351» «SHABYN» جيناۋ-پرەستەۋ تەحنيكاسىنىڭ 200 داناسىن, «پر-ف-145» «SHABYN» تەحنيكاسىنىڭ 600 داناسىن, اسپالى جەر جىرتۋ قۇرالىنىڭ 150 داناسىن جانە وزگە دە قۇرال-جابدىقتاردى شىعارا باستايدى. زاۋىتتا قازىرگى كەزدە 78 ادام جۇمىس ىستەۋدە.
اۋىلشارۋاشىلىق كەشەنىن دامىتۋ جونىندەگى جاڭا مەملەكەتتىك باعدارلامانىڭ باستى ماقساتىنىڭ ءبىرى زاماناۋي اۋىلشارۋاشىلىق تەحنيكالارىمەن جانە قۇرال-جابدىقتارىمەن قامتاماسىز ەتۋدى ارتتىرۋ, سونداي-اق ەلىمىزدەگى اۋىلشارۋاشىلىق ماشينالارىن جاساۋ سالاسىن دامىتۋ. اتالعان مىندەتتەردى ءتيىمدى شەشۋ ءۇشىن قۇرامىنا مەملەكەتتىك جانە كۆازيمەملەكەتتىك سەكتور, اۋىلشارۋاشىلىق تەحنيكالارى مەن قۇرال-جابدىقتارىن ءوندىرۋشى كاسىپورىندار وكىلدەرى كىرگەن جۇمىس توبى قۇرىلىپ وتىر. جۇمىس توبى وتىرىسىنىڭ قورىتىندىسى بويىنشا ماشينا-تراكتور پاركىن جاڭارتۋدى ارتتىرۋعا كەدەرگى جانە ءوندىرىس دەڭگەيىنىڭ تومەن بولۋىنا ىقپال ەتەتىن سەبەپتەر سارالانىپ, اۋىلشارۋاشىلىق ماشينالارىن جاساۋدىڭ جول كارتاسى ازىرلەندى. جول كارتاسى قازىرگى بار ءوندىرىس قۋاتىن ارتتىرۋمەن قاتار, جاڭا ءونىم تۇرلەرىن شىعارۋعا دا مۇمكىندىك بەرەدى دەپ كۇتىلۋدە. جانە شارۋالاردى شەتەلدىك نۇسقالاردان ءبىر دە كەم ەمەس وتاندىق ساپالى دا ارزان تەحنيكالارمەن قامتاماسىز ەتۋى ءتيىس. اۋىل شارۋاشىلىعى مينيسترلىگى تاراپىنان بۇل باعىتتا بىرقاتار شارالار قولعا الىنىپ, ساتىمەن جۇزەگە اسىرىلىپ جاتقانىن دا قاپەرگە سالا كەتكەن ورىندى. بيىلعى جىلدان باستاپ اۋىلشارۋاشىلىق تەحنيكاسىن ساتىپ الۋدى سۋبسيديالاعاندا ەڭ الدىمەن باسىمدىق وتاندىق ءونىم وندىرۋشىلەرگە بەرىلەدى. ەگەر بۇعان دەيىن شەتەلدىك ءبىر كومباين ءۇشىن 30 ملن تەڭگە قاراجات قاجەت بولسا, قازىرگى كەزدە وسى اقشاعا 3 كومباين ساتىپ الۋ سۋبسيديالانادى. جانە «قازاگرو» اق جەلىسى بويىنشا وتاندىق تىركەمەلى جانە اسپالى اۋىلشارۋاشىلىق تەحنيكالارىن ليزينگكە ساتىپ الۋدى جەڭىلدەتىلگەن نەسيەمەن قامتاماسىز ەتۋ جوسپارلانعان. وسىنداي تەتىكتەردىڭ ارقاسىندا تەحنيكا ساتىپ الۋ كولەمىن 50-70 پايىزعا ارتتىرىپ, 1,5-2 ەسەگە دەيىن جاڭارتۋ كوزدەلىپ وتىر. سونىمەن قاتار, وتاندىق زاۋىتتاردى قۇرال-جابدىقتار ساتىپ الۋى مەن جاڭارتۋى ءۇشىن جەڭىلدەتىلگەن نەسيەمەن قامتاماسىز ەتۋ باعدارلاماسى دا جۇزەگە اسىرىلۋدا.
اسقار تۇراپباي ۇلى,
«ەگەمەن قازاقستان»
اقمولا وبلىسى
