اعىمداعى جىلى ءۇش وڭىردە, اتاپ ايتقاندا, سەمەي, وسكەمەن جانە كوكشەتاۋ قالالارىندا ورنالاسقان نازارباەۆ زياتكەرلىك مەكتەپتەرى حالىقارالىق مەكتەپتەر كەڭەسىنىڭ (CIS) اككرەديتتەۋىنەن ءوتتى. CIS – ءبىلىم سالاسىنداعى سوڭعى جاڭالىقتار مەن جوعارى ستاندارتتاردى ودان ءارى ىلگەرىلەتۋ ءۇشىن قۇرىلعان الەمدەگى تانىمال ۇيىمداردىڭ ءبىرى. قازىرگى ۋاقىتتا بەلدى كلۋبتىڭ مۇشەلىگىنە كوپتەگەن مەملەكەتتىڭ الدىڭعى قاتارلى وزىق مەكتەپتەرى مەن وقۋ كەشەندەرى ەنگەن. ۇيىم الەمنىڭ ۇزدىك 50 ۋنيۆەرسيتەتىمەن ىنتىماقتاستىق ورناتقان. بۇل ۋنيۆەرسيتەتتەر اككرەديتتەلگەن مەكتەپ تۇلەكتەرىن وقىتۋعا مۇددەلى. CIS سەرتيفيكاتتارىن مەكتەپ جەتەكشىلەرىنە ءبىلىم جانە عىلىم مينيسترلىگى مەكتەپكە دەيىنگى جانە ورتا ءبىلىم بەرۋ دەپارتامەنتىنىڭ ديرەكتورى شولپان كارينوۆا, نازارباەۆ ۋنيۆەرسيتەتىنىڭ پرەزيدەنتى شيگەو كاتسۋ جانە «نازارباەۆ زياتكەرلىك مەكتەپتەرى» دببۇ باسقارما ءتورايىمى كۇلاش ءشامشيدينوۆا سالتاناتتى تۇردە تابىس ەتتى.
جالپى, زياتكەرلىك مەكتەپتەردىڭ جاڭا مارتەبەسى پەداگوگيكالىق ۇجىم مەن وقۋشىلار ءۇشىن جاڭا مۇمكىندىكتەرگە جول اشپاق. مامانداردىڭ ايتۋىنشا, اتالعان اككرەديتتەۋدەن ءوتۋ ۇدەرىسى ۇزاق ۋاقىت بويى جان-جاقتى جۇمىس جۇرگىزۋدى قاجەت ەتەدى, سونداي-اق, مەكتەپتە تىكەلەي ينسپەكتسيا جۇرگىزىلگەننەن كەيىن اياقتالادى. انگليا, گەرمانيا, رەسەي, ازەربايجان, يوردانيا, اقش جانە باسقا دا مەملەكەتتەردىڭ وكىلدەرىنەن قۇرالعان CIS-ءتىڭ بەدەلدى توبى كوكتەمدە سەمەي, وسكەمەن جانە كوكشەتاۋ قالالارىندا مەكتەپتەردىڭ مەنەدجمەنتىن, مۇعالىمدەردىڭ كاسىبي وقىتۋ ماشىعىن, وقىتۋ پروتسەسىن ۇيىمداستىرۋ مەن جالپى مەكتەپ ءومىرىن سارالاپ, باعالاۋدان وتكىزگەن بولاتىن. وسىلايشا, حالىقارالىق ۇيىم وكىلدەرى مەكتەپتەردىڭ «ومىرلىك قۇندىلىقتار», «وقىتۋ جانە ۇيرەتۋ», «باسقارۋ جانە كوشباسشىلىق», «كاسىبي قۇرام جانە تەحنيكالىق قىزمەتكەرلەر», «قولجەتىمدى وقىتۋ مەن ءبىلىم», «وپەراتسيالىق جۇيەلەر», سونداي-اق, شەت تىلدەرىن مەڭگەرۋ بويىنشا بارلىق الەمدىك ستاندارتتار تالابىنا سايكەس كەلەتىندىگىن انىقتادى. وسى ورايدا سەمەي مەن كوكشەتاۋ قالالارىنداعى فيزيكا-ماتەماتيكا باعىتىنداعى جانە وسكەمەن قالاسىنداعى حيميا-بيولوگيا باعىتىنداعى نازارباەۆ زياتكەرلىك مەكتەپتەرىنىڭ ديرەكتورلارى, اتا-انالار كوميتەتتەرى مەن وقۋشىلار كوميتەتتەرىنىڭ جەتەكشىلەرى ساحنا تورىنە كوتەرىلىپ, جاۋاپكەرشىلىك ۇدەسىنەن تابىلعان ۇجىم مەن ورتالىق اپپاراتتىڭ قولداۋى ءۇشىن ريزاشىلىعىن جەتكىزدى.
قازىرگى تاڭدا نازارباەۆ زياتكەرلىك مەكتەپتەرىنىڭ بەسەۋى اككرەديتتەۋدەن ءوتتى. جوسپار بويىنشا الداعى وقۋ جىلىندا تاعى سەگىز مەكتەپ, ال 2019 جىلى بارلىق مەكتەپ حالىقارالىق اككرەديتتەۋدەن وتەتىن بولادى. قازاقستاندىق مەكتەپتەردىڭ الەمدىك دەڭگەيدەگى تاڭداۋلى ءبىلىم بەرۋ ۇيىمىنا مۇشە بولۋى وتاندىق ءبىلىم بەرۋ جۇيەسى ءۇشىن ايتۋلى وقيعا.
«زياتكەرلىك مەكتەپتەردە وقىتۋدىڭ ناتيجەلەرى مەن كەلەشەگى: جاڭا تالاپتار, جاڭا مۇمكىندىكتەر» تاقىرىبىندا وتكەن بيىلعى تامىز ءماسليحاتىندا جاھاندىق باسەكەلەستىك, وتباسى مەن مەكتەپ قارىم-قاتىناسىن قالىپتاستىرۋ, الداعى وقۋ جىلىن ءتيىمدى ۇيىمداستىرۋ ماسەلەلەرىنە نازار اۋدارىلدى.
– وزگەرىسكە تولى زاماندا زياتەرلىك مەكتەپتەردىڭ الدىنا قوياتىن تالاپتار دا وزگەرۋدە. سوندىقتان بولاشاعىمىز قانداي بولادى, بالالارعا قانداي ءبىلىم بەرەمىز دەگەن ماسەلەلەر كەڭىنەن ساراپتالدى. تامىز كەڭەسى اياسىندا مەكتەپ جەتەكشىلەرىنە جانە اتا-انالار كوميتەتتەرىنە ارنالعان 20-عا جۋىق سەكتسيا جۇمىستارى ۇيىمداستىرىلدى. بيىل بىزدە جاڭا ءۇردىس باستاۋ الدى. مەكتەپتىڭ جوعارى دارەجەدەگى مۇعالىم-زەرتتەۋشىلەرىنىڭ باسشىلىعىمەن شىعارماشىلىق زەرتحانالار قىزمەت ەتىپ, وقىتۋدىڭ يننوۆاتسيالىق تاجىريبەسىمەن ءبولىستى. ياعني, ولاردىڭ وزىق تاجىريبەسى نازارباەۆ زياتكەرلىك مەكتەپتەرىنىڭ بارلىعىنا تاراتىلادى. سونداي-اق, وڭىرلەردەن كەلگەن مۇعالىمدەر قاۋىمى ەكسپو كورمەسىن تاماشالاپ, پاۆيلوندارداعى تىڭ جاڭالىقتاردى ساباق بارىسىنا پايدالانۋ باعىتىندا جۇمىس جۇرگىزدى, دەدى «نازارباەۆ زياتكەرلىك مەكتەپتەرى» دببۇ پرەزيدەنتى كۇلاش ءشامشيدينوۆا.
ايتا كەتكەن ابزال, وتكەن وقۋ جىلىندا نازارباەۆ زياتكەرلىك مەكتەپتەرىنىڭ وقۋشىلارى ماتەماتيكا, فيزيكا, حيميا, بيولوگيا پاندەرى بويىنشا كوپتەگەن حالىقارالىق وليمپيادالاردىڭ جەڭىمپازى اتانىپ, روبوتتى تەحنيكا سالاسى بويىنشا مارتەبەلى تۋرنيرلەردىڭ جۇلدەلى ورىندارىنان كورىندى. ماسەلەن, ۆاشينگتون قالاسىندا 163 مەملەكەت قاتىسقان روبوت تەحنيكاسى سايىسىندا قازاقستاندىق جاس زياتكەرلەر 8-ورىنعا يە بولدى. وقۋ گرانتتارىن يەلەنۋ بويىنشا دا مەكتەپ تۇلەكتەرى كوش باستاپ كەلەدى. الدىن الا الىنعان اقپاراتتارعا سايكەس, بيىل 100-گە جۋىق وقۋشى نازارباەۆ ۋنيۆەرسيتەتىنە, 80-گە جۋىق تۇلەك شەتەل ۋنيۆەرسيتەتتەرىنە وقۋعا ءتۇستى.
– مەكتەپتەرىمىزدە اكادەميالىق بىلىمگە, پاندىك مازمۇنعا ۇلكەن ءمان بەرىلەدى. سونداي-اق, شىعارماشىلىقپەن اينالىسۋ, سىني تۇرعىدان ويلاۋ, پروبلەمالاردى شەشە ءبىلۋ سياقتى ماسەلەلەرگە ەرەكشە كوڭىل بولىنەدى. وسىعان وراي, اۋقىمدى جۇمىستار جۇرگىزىلىپ كەلەدى. وقۋ پروتسەسىن ۇيىمداستىرۋعا وقۋشىلار دا قاتىستىرىلادى. ياعني, بالالاردىڭ پىكىرى مەن دۇنيەجۇزىلىك تاجىريبەنى قاتار سارالايمىز. بۇگىندە بالالاردىڭ ءبىلىم دەڭگەيى وتە جوعارى. بۇل مەكتەپتەرىمىزدىڭ ءبىلىم بەرۋ دەڭگەيىنىڭ جانە جۇمىستى ۇيىمداستىرۋدىڭ حالىقارالىق دارەجەدە جۇرگىزىلۋىنىڭ ناتيجەسى, دەدى ك.ءشامشيدينوۆا.
دۋمان اناش,
«ەگەمەن قازاقستان»
