الدىن الا ءمالىم ەتىلگەن اقپاراتتا ايتىلعانداي, مارتەبەلى جارىسقا اقش, قىرعىزستان, وزبەكستان, ازەربايجان, تۇركيا, رەسەي, تاجىكستان, قىتاي, موڭعوليا, اۋعانستان, ۆەنگريا جانە ءوز ەلىمىزدىڭ كوكپارشىلارى قاتىسىپ, جارىس كورىگىن قىزدىرۋى ءتيىس بولاتىن.
اتاپ وتكەنىمىزدەي, جوعارىدا اتى اتالعان مەملەكەتتەردىڭ ىشىنەن بەلگىلى سەبەپتەرگە بايلانىستى ازەربايجان كوكپارشىلارى جارىسقا كەلە الماي قالدى. قالعان 11 كوماندانىڭ بالۋاندارى جاسىنداي جارقىلداپ, استىنداعى اتتارىنىڭ اۋىزدىعىن قارش-قارش شايناتىپ الاڭعا شىقتى.
بۇدان ءبىر اي بۇرىن جەرەبە تارتىلىپ, كوكپارشىلاردى ەكى توپقا جىكتەپ, انىقتاپ قويعان شەشىم بويىنشا, العاشقى بولىپ وزبەكستان مەن تاجىكستان كوماندالارى سايىستى باستادى. ناتيجەسىندە 3:0 ەسەبىمەن تاجىكستاندىق كوكپارشىلار وزبەك باۋىرلاردى تىزە بۇكتىردى. ەكىنشى بولىپ الاڭعا بەتتەگەن تۇركيا جانە اقش ەلى قۇرامالارىنىڭ ويىنى سۇرەڭسىزدەۋ بولعانىمەن, تۇرىك باۋىرلار 7:1 ەسەبىمەن جەڭىس تۋىن كوتەردى. ءۇشىنشى سايىس – قازاقستان جانە اۋعانستان كوماندالارى اراسىندا ءوربىدى. اۋعان بۋزاشىلارى (كوكپارشىلارى) الەكەدەي جالانعان ءبىزدىڭ جىگىتتەرگە تيتتەي دە قارسىلىق تانىتا المادى. ەسەپ – 9:2. ءتورتىنشى جۇپقا تۇيىسكەن ازەربايجان مەن قىتاي جىگىتتەرى الاڭعا شىعىپ, ات تەرلەتىپ شارشامادى. ازەربايجان كوكپارشىلارى جارىسقا كەلمەگەندىكتەن, جەڭىس قىتايلىق كوكپاقشىلاردىڭ قانجىعاسىنا وپ-وڭاي بايلاندى.
كوكپاردىڭ سوڭعى جۇبى – قىرزعىستان جانە موڭعول ەلىنىڭ ازاماتتارى كورەرمەندەرگە ناعىز سايىستى كورسەتتى. اسىرەسە, استىنداعى اتتارى ۇستىندەگى بالۋاننىڭ تاقىم قاعىسىن قالت جىبەرمەي جاتتىققان قىرعىز جىلقىلارىنىڭ كەرەمەت ايلا-ءتاسىلىن كورگەن جۇرت تا, قاراپ وتىرعان ءبىز دە سۇيسىندىك. تاۋلى جەردە كوكپار تارتىپ جاتتىققان قىرعىزدارعا موڭعوليالىق ازاماتتار اجەپتاۋىر قارسىلىق تانىتتى. بىراق ناتيجە – 4:0. جەڭىس قىرعىزستاندىقتار ەنشىسىنە بۇيىردى.
جوعارىداعى بەس كەزدەسۋدى تۇيىندەپ تاستاعان ۇيىمداستىرۋشىلار كۇن ەكىنتىگە تاياعاندا چەمپيوناتتىڭ رەسمي اشىلۋ سالتاناتىن وتكىزدى. اۋەلى, دودانى تاماشالاۋعا جينالعان ءنوپىر جۇرتقا جامبى اتۋ, تەڭگە ءىلۋ, تازى جارىستىرۋ سياقتى ويىندار كورسەتىلىپ, سوڭىندا الىس-جاقىننان ات ارىلتىپ كەلگەن كوكپارشىلار شەرۋى ءوتتى.
العاشقى بولىپ ءسوز العان مادەنيەت جانە سپورت مينيسترلىگى سپورت جانە دەنە شىنىقتىرۋ ىستەرى كوميتەتىنىڭ توراعاسى ەلسيار قاناعاتوۆ بۇعان دەيىن حالقىمىزدىڭ اسىل مۇراسى – ۇلتتىق ويىن تۇرلەرىنەن تەك قانا توعىزقۇمالاقتان الەمدىك دەڭگەيدە جارىس وتكىزىلىپ كەلگەن بولسا, ەندى مىنە, قاتارعا كوكپار قوسىلدى دەگەندى اتاپ ءوتىپ, جينالعان جۇرت پەن قازاق ەلىنە ات باسىن بۇرعان سايىسكەرلەرگە العىسىن ءبىلدىردى.
مارتەبەلى مەيماندار اتىنان پىكىر ايتۋ باقىتى اقش-تىڭ قازاقستانداعى توتەنشە جانە وكىلەتتى ەلشىسى دجورج كرول مىرزاعا بۇيىرىپ, ەلشى ءوز تىلەگىن كوپشىلىككە قازاق تىلىندە جەتكىزدى. «ەكسپو كورمەسى اياسىندا وتكىزىلىپ وتىرعان بۇل جارىسقا امەريكالىقتاردىڭ شاقىرىلۋى ەكى مەملەكەت اراسىنداعى جاقسى بايلانىستىڭ ناتيجەسى», دەدى ەلشى مىرزا.
سالتاناتتى ءراسىمنىڭ سوڭى كونتسەرتتىك باعدارلاماعا جالعاسىپ, ەلىمىزگە تانىمال ونەر جۇلدىزدارى ءوز ونەرلەرىن پاش ەتتى.
بەكەن قايرات ۇلى,
«ەگەمەن قازاقستان»
