– ول ءوز ۇيىندە سپورت زالىن اشىپ العان, سوڭعى بىرنەشە جىلدا اۋىل بالالارى توپىرلاپ جينالىپ, جاڭاشىل ازاماتتىڭ نۇسقاۋىمەن نەشە ءتۇرلى جاتتىعۋلار جاسايدى, كۇندىز-ءتۇنى شتانگا, گىر تاستارىن جالىقپاي كوتەرىپ, سيقىرى مول سپورتتىڭ قىر-سىرىنا ۇيرەنۋدە, – دەگەن اققاينار اۋىلدىق وكرۋگىنىڭ باس مامانى سەرىكحان قۇرمانوۆتىڭ سوزىنەن كەيىن ويلانىپ جاتپاستان ءۋالي نۇرقاسىنوۆتىڭ ۇيىنە تارتىپ كەتتىك. مىعىم دەنەلى, وزىنە جاراسىمدى ساقال جىبەرگەن ۋاكەڭ ءبىزدى ەسىك الدىنان قارسى الدى. كەڭ ءدالىز ارقىلى تۇپكى بولمەگە ەنگەندە ءوز كوزىمىزگە سەنبەدىك, دەنە جاتتىعۋلارىن جاسايتىن تۋرنيك, جۇگىرۋگە ارنالعان ارنايى جابدىق 32, 24,16 پۇتتىق گىر تاستارى, وتىرىپ, تۇرەگەلىپ تۇرىپ جاتتىعۋلار جاسايتىن قۇرالدار قاز-قاتار ءتىزىلىپ تۇر. ادام دەنەسىنىڭ سىمباتتى بولۋىنا, بۇلشىق ەتتەرىنىڭ بۇلت-بۇلت ويناپ, كۇشتى بولۋىنا ىقپال جاسايتىن نەشە ءتۇرلى جاتتىعۋلار جايلى جازىلعان ماقالالار مەن جۋرنال قيىندىلارى ءبىر بۇرىشقا ءىلىنىپتى.
– 67 جىل بۇرىن اققاينار اۋىلىندا دۇنيەگە كەلدىم, وسىنداعى ورتا مەكتەپتى بىتىرگەن سوڭ ەڭبەككە ارالاسىپ كەتتىم. ورمان شارۋاشىلىعىندا قىزمەت ەتىپ, 9 جىل بويى ومارتا ۇستادىم. ون شاقتى جىل كاتونقاراعاي مەملەكەتتىك ۇلتتىق پاركىندە ينسپەكتور بولىپ ىستەدىم. ەكى جىل بولدى, زەينەتكەرمىن, جۇبايىم سايلاۋگۇل ۇزاق جىل مەكتەپتە ۇستازدىق ەتتى, باقىت, سايان دەگەن ۇل-قىزدارىم, ءۇش نەمەرەم بار, – دەپ ۋاكەڭ ءومىر جولىن قىسقاشا ايتىپ بەردى.
بۇدان كەيىن ۋاكەڭ سپورتپەن بالا كەزدەن شۇعىلدانعانىن, ازاماتتىق بورىشىن اتقارىپ جۇرگەن كەزدە گىر تاستارى مەن شتانگا كوتەرىپ, بىرنەشە رەت جارىستارعا قاتىسقانىن ايتتى. تابيعاتى تامىلجىعان تايگادا اسكەر قاتارىندا بولعان اققاينارلىق ازامات ەلگە ورالعان سوڭ ءوزى ۇناتاتىن سپورتتى جالعاستىرعان. الدىمەن گىر تاستارىن ساتىپ الادى. 32 كەلىلىك قوس گىردى ەش قينالماستان بىرنەشە رەت كوتەرۋ سپورت جاناشىرىنا قيىندىق تۋعىزبايدى. ال قىسى-جازى ۇيدەن شىقپاي جۇگىرۋگە ارنالعان قۇرالدى سيىرىن ساتىپ, سول اقشاعا ساتىپ الىپتى.
– ادام اعزاسى 100 جىل, ءتىپتى ودان دا ۇزاق ءومىر سۇرۋگە شىداس بەرەدى. ول ءۇشىن نە ىستەۋ كەرەك؟ اراق پەن شىلىمدى ۇمىتىپ, كۇنىنە تاڭەرتەڭ تۇرا سالا دەنە جاتتىعۋلارىن جاساۋ, كەم دەگەندە 5-6 شاقىرىم جۇگىرگەن ادامنىڭ دەنساۋلىعى مىقتى بولىپ, ۇزاق ءومىر سۇرەتىنى بەلگىلى. مەن جاتتىعۋدى كۇن سايىن جاسايمىن, اۋا رايى قولايلى كەزدە دالاعا شىعىپ جۇگىرسەم, كوك تايعاق, جاڭبىرلى كۇنى ۇيدەگى قۇرالعا شىعىپ الىپ, جۇگىرەمىن. اۋىل بالالارى ارمانشىل عوي, بولاشاقتا يليا, جاسۇلان سياقتى اتاقتى اۋىر اتلەت بولعىسى كەلەدى. ولار ءبىزدىڭ ۇيگە كۇن سايىن كەلەدى, جاتتىعۋ جاسايدى, ول ءۇشىن كوك تيىن المايمىن. دالادا قاڭعىپ, اراق ءىشىپ, شىلىم شەككەنشە, سپورتپەن اينالىسسا قانداي عانيبەت. اققاينار اۋىلىنان بولاشاقتا الەم چەمپيوندارى شىعىپ جاتسا, تاڭعالماڭىزدار, – دەپ ۋاكەڭ اعىنان جارىلدى.
كەۋدە مەن اياقتىڭ بۇلشىق ەتتەرىن جەتىلدىرەتىن جاتتىعۋعا ارنالعان, ءبىر ورىندا تۇرىپ سالماعى بىرنەشە پۇت گىر تاستارىن جوعارى كوتەرەتىن سناريادتار, باسقا دا سپورت قۇرالدارىن اۋىلدى قويىپ, سپورت مەكتەپتەرىنەن تابۋ وڭاي ەمەس. شاعىن عانا اۋىلدا تۇرىپ جاتقان ءۋالي نۇرقاسىنوۆتىڭ سپورتتى سەرىك ەتىپ, اۋىل بالالارىن تاربيەلەپ جاتقانى ەرلىككە ءتان ءىس ەمەس دەپ كىم ايتار؟
وڭداسىن ەلۋباي,
جۋرناليست
شىعىس قازاقستان وبلىسى,
كاتونقاراعاي اۋدانى
سۋرەتتى تۇسىرگەن اۆتور
