وبلىس ورتالىعى ماڭايىندا ورنالاسقان جاڭاقونىس اۋىلىنداعى ورتا مەكتەپ ءۇيى ابدەن توزىعى جەتىپ, ەسكىرىپ قالعان سوڭ بۇگىنگى زامانعا ساي ءسانى مەن ساۋلەتى كەلىسكەن 600 ورىندىق سىڭعىرلاعان جاڭا مەكتەپ عيماراتى بوي كوتەرىپتى. ال بوساپ قالعان بۇرىنعى مەكتەپ ءۇيى ەسكى ءارى تار دەمەسەڭىز ىرگەتاسى مىقتى, كۇردەلى جوندەۋ جۇرگىزسە ءالى دە ءبىراز جىل پايدالانۋعا تۇرارلىقتاي ەكەن. وسى ماسەلەنىڭ شەشىمىن نوۆىي اۋىلدىق وكرۋگى اقساقالدار كەڭەسىنىڭ توراعاسى ساعىناي قۇسايىنوۆ ۇسىنىپتى. ول تەك ۇسىنىس جاساپ قانا قويماي, ەسكى مەكتەپتىڭ بۇگىنگى ۇرپاق مۇددەسىنە قىزمەت جاساۋىنا تىكەلەي باستاماشى بولا ءبىلىپتى. ءسويتىپ ەل ىشىندە ابىروي بەدەلى جوعارى ادامگەرشىلىگى مەن كىسىلىگى مول ساعىناي قاجىنىڭ قولداۋىنىڭ ناتيجەسىندە اتالعان نىسان كۇردەلى جوندەۋ جۇرگىزىلگەن سوڭ 523 جەتكىنشەكتى قابىلداي الاتىن بالالار شىعارماشىلىق ۇيىنە اينالىپتى. ەگەر ساكەڭ بۇل ىسكە بەلشەشە كىرىسپەگەندە ەسكى مەكتەپ تالان-تاراجعا ءتۇسىپ, ونىڭ ماتەريالدارى ۇستاعاننىڭ قولىندا, تىستەگەننىڭ اۋزىندا كەتكەن بولار ەدى دەدى اقساقالدار. قازىرگى كۇنى قايتا جاڭعىرتىلعان عيمارات ءوزىنىڭ مۇمكىندىگىن تولىق پايدالانىپ وتىرعانى دا اقساقالداردىڭ «ەگەمەنگە» كەلۋىنە تۇرتكى بولىپتى.
ورتالىقتا 28 ۇيىرمە جۇمىس ىستەيدى ەكەن. شىعارماشىلىق ۇيىندە بالالاردىڭ ساباقتان تىس ۋاقىتتارىن ءتيىمدى تۇردە وتكىزۋىنە, ونەردىڭ ءتىلىن تاۋىپ, سپورتپەن شۇعىلدانۋىنا بارلىق جاعدايلار جاسالىپتى. بۇل ورتالىق اشىلىپ ىسكە كىرىسكەننەن كەيىن دە ساعىناي قاجى ولارمەن بايلانىستى ۇزبەپتى. كۇرەس كىلەمىن جانە اۆتوبۋس الىپ بەرۋگە سەپتىگىن تيگىزىپتى. بۇگىندە قۇرىلعانىنا ءبىر جىل تولىپ وتىرعانىن شىعارماشىلىق ءۇيىنىڭ تاربيەلەنۋشىلەرى وسى قىسقا ۋاقىت ىشىندە 28 رەسپۋبليكالىق جانە حالىقارالىق جۇلدەلەرگە يە بولىپتى.
ءبىلىم سالاسى ارداگەرلەرىنىڭ ايتۋىنشا, ساعىناي قاجىنىڭ ۇرپاق تاربيەسىنە تيگىزگەن شاپاعاتى تەك ءبىر شىعارماشىلىق ۇيىمەن شەكتەلمەيدى. بۇعان دەيىنگى وتپەلى جىلداردىڭ كۇردەلى كەزەڭدەرىندە نۇراشاساي مەكتەبىنىڭ ورتا مەكتەپ مارتەبەسىنە يەلەنۋىنە دە ىقپال جاساپتى. بۇل ءۇشىن قاجەتتى دەلىنگەن بارلىق جوندەۋ جۇمىستارىن تىكەلەي ءوزى باسقارىپتى. وسى ارقىلى 40 جۇمىس ورنى اشىلعان. ءارى ءاربىر ۇستاز بەن تاربيەشى جەتكىنشەكتەردى تاربيەلەۋ سەكىلدى سۇيىكتى ىسىمەن اينالىسۋلارىنا مۇمكىندىك الىپتى.
«ساعىناي قۇسايىنوۆ ادامدارعا تەك جاقسىلىق جاساۋ ءۇشىن جاراتىلعان جان. ول تالاي ادامداردىڭ ساۋابىن الدى. قامىققاندى جۇباتتى. «جانام دەگەن جۇرەكتەرگە وت بەردى», «جاقسىنىڭ جاقسىلىعىن ايت – نۇرى تاسىسىن» دەگەندەي ءبىز «ەگەمەنگە» ەل ءۇشىن ەڭبەكتەنۋدەن تانبايتىن ساكەڭنىڭ, ساعىناي قاجىنىڭ ۇلكەن جۇرەگى تۋرالى ايتۋ ءۇشىن كەلىپ وتىرمىز. ءبىز وسىنداي ابزال دا اسىل ازاماتتىڭ ەسىمى «ەگەمەننىڭ» بەتىنەن كورىنىس تاپقانىن قالايمىز», دەدى ولار اتتانار ساتتە.
ءبىز دە اقساقالداردىڭ تىلەگىن گازەتىمىزگە جولداعاندى ءجون كوردىك.
تەمىر قۇسايىن,
«ەگەمەن قازاقستان»
اقتوبە وبلىسى
