وبلىستىق قۇرىلىس باسقارماسىنىڭ باسشىسى مالىك امانوۆتىڭ ايتۋىنشا, ينجەنەرلىك-كوممۋنيكاتسيالىق ينفراقۇرىلىمعا بيىل 11,2 ملرد تەڭگە قارالعان. سونىڭ ىشىندە ۇلتتىق قوردان بولىنگەن 6 ملرد تەڭگەگە 21 جوبا, رەسپۋبليكالىق بيۋدجەتتىڭ 3,3 ملرد تەڭگەسىنە 7 جوبا جۇزەگە اسىرىلادى. ال جەرگىلىكتى قازىنادان وسى ماقساتقا 1,9 ملرد تەڭگە ءبولىنىپ وتىر.
قارقىندى قۇرىلىستىڭ ارقاسىندا وبلىس ورتالىعىنىڭ اۋماعى كەڭەيىپ, جاڭا شاعىن اۋداندار بوي كوتەردى. «بەرەكە», «نۇرسايا» شاعىن اۋداندارىندا الداعى جىلى 43 كوپ پاتەرلى تۇرعىن ءۇيدىڭ قۇرىلىسى باستالادى. جەكە تۇرعىن ءۇي قۇرىلىسىنىڭ بىرىڭعاي ساۋلەت-
تىك كەلبەتىن جاساۋ ماقساتىندا اكىمدىك ينجەنەرلىك كوممۋنيكاتسياسى تارتىلعان 400 ۋچاسكە دايىندادى. قازىر قۇرىلىس جانە تۇرعىن ءۇي-كوممۋنالدىق شارۋاشىلىق كوميتەتىنىڭ سىزبالارى بويىنشا 80 تۇرعىن ۇيگە جوبالىق-سمەتالىق قۇجات جاساقتاۋعا تەندەرلىك راسىمدەر ءجۇرىپ جاتىر.
بۇقارانى باسپانامەن قامتۋعا باعىتتالعان «نۇرلى جەر» باعدارلاماسىنىڭ ارقاسىندا يپوتەكالىق قارىزبەن تۇرعىن ءۇي الۋ قولجەتىمدىلىگى ارتاتىنى دا جاقسى جاڭالىق. بۇرىن يپوتەكامەن تۇرعىن ءۇي ساتىپ الۋشىلار ەكىنشى دەڭگەيلى بانكتەرگە 17 پايىز ۇستەمە تولەۋگە ءتيىس بولسا, ەندى «نۇرلى جەر» مەملەكەتتىك باعدارلاماسىنىڭ اياسىندا ونىڭ 6-7 پايىزىن مەملەكەت سۋبسيديالايدى.
– سونىڭ ناتيجەسىندە قارىز الۋشىنىڭ اي سايىنعى تولەمى 30-40 پايىزعا ازايادى, – دەيدى وبلىستىق قۇرىلىس باسقارماسىنىڭ باسشىسى. – باعدارلاماعا قاتىسۋ ءۇشىن يپوتەكا كەزەگىنە تۇرۋ تالاپ ەتىلمەيدى, تۇرعىن ۇيلەرىنىڭ سانى ماڭىزدى ەمەس جانە قوسىمشا كوميسسيالار جوق. «نۇرلى جەر» باعدارلاماسى بويىنشا ەلىمىزدىڭ كەز كەلگەن ازاماتى يپوتەكالىق قارىز الۋعا ءوتىنىش بەرە الادى.
بۇل باستاما باسپانا العىسى كەلەتىندەرگە دە, باعدارلاماعا قاتىساتىن ءۇي سالۋشىلارعا دا ءتيىمدى بولعالى وتىر.
– ەكىنشى دەڭگەيلى بانكتەر سۋبسيديالاۋ تۋرالى شەشىم قابىلدانعان كەزدە ۇلتتىق بانكتىڭ بازالىق مولشەرلەمەسىنىڭ 5 پايىزىنان اسپايتىن سىياقى مولشەرلەمەسى بويىنشا قارىز بەرەدى, – دەيدى «دامۋ» قورىنىڭ اتىراۋ وبلىسى بويىنشا ايماقتىق بولىمشەسىنىڭ ديرەكتورى Əليا وتەپقاليەۆا.
جەكە قۇرىلىس كومپانيالارى «نۇرلى جەر» باعدارلاماسىنا قىزىعۋشىلىق تانىتۋدا, قازىر بانكتەر بىرنەشە جوبالاردى قاراپ جاتىر.
باقىتگۇل باباش,
«ەگەمەن قازاقستان»
اتىراۋ
