قازاقستان حالقى اسسامبلەياسى توراعاسىنىڭ ورىنباسارى – حاتشىلىق مەڭگەرۋشىسى دارحان مىڭباي كورەيلەردىڭ «توعىزىنشى تەرريتوريادا» ءومىر ءسۇرىپ جاتقانىنا 80 جىل جانە قازاقستان – وڭتۇستىك كورەيا ديپلوماتيالىق قارىم-قاتىناسىنا 25 جىل تولىنا وراي ۇيىمداستىرىلعان فورۋم ەكى ەل اراسىنداعى ىنتىماقتاستىقتىڭ بەلگىسى ەكەنىن جەتكىزدى.
«قازاقستانداعى كورەي حالقى ەلدىڭ دامۋىنا ەلەۋلى ۇلەس قوسىپ ءجۇر. وسى ورايدا, ءبىز الەمنىڭ ءار ەلىنەن كەلگەن كورەي كاسىپكەرلەرىنىڭ استاناعا جينالعانىنا قۋانىشتىمىز. ولاردىڭ قازاقستان باعدارلامالارىنا قىزىعۋشىلىق تانىتىپ, ارىپتەستىك ورناتۋعا مۇددەلى ەكەنىنە سەنىمدىمىن», – دەيدى دارحان مىڭباي.
كورەيا رەسپۋبليكاسىنىڭ قازاقستانداعى توتەنشە جانە وكىلەتتى ەلشىسى كيم دە سيك ەكى ەل اراسىنداعى قارىم-قاتىناستى نىعايتۋ ءۇشىن بارىن سالاتىنىن مالىمدەدى.
«قازاقستانعا ەلشى بولىپ كەلگەنىمە كوپ بولعان جوق. ايتسە دە, وسى ءۇش اي ىشىندە قازاقستاننىڭ تالاي بەلەستەردى باعىندىرعانىنا كوزىم جەتتى. قازاقستان پرەزيدەنتى نۇرسۇلتان نازارباەۆ تا وڭتۇستىك كورەيانىڭ تاجىريبەسى تۋرالى ءجيى ايتىپ تۇراتىنىنان حاباردارمىز. ءبىزدىڭ ەلدە جاقىندا جاڭا پرەزيدەنت سايلاندى. كورەيا باسشىسى قازاقستانمەن اراداعى ىنتىماقتاستىق بايلانىستى كۇشەيتۋدى ماقسات ەتەدى. جاڭا ەلشى رەتىندە وسى جولدا بار كۇش-جىگەرىمدى ايامايمىن», – دەيدى كيم دە سيك.
شارانى «قازاقستانداعى كورەيلەر اسسوتسياتسياسى» ەلباسى نۇرسۇلتان نازارباەۆتىڭ «100 ناقتى قادام» جوباسىن قولداۋ ماقساتىندا, سونداي-اق, «ەكسپو-2017» حالىقارالىق كورمە اياسىندا ۇيىمداستىردى. فورۋمعا الەمنىڭ 10-نان استام ەلىنەن كورەي كاسىپكەرلەرى كەلدى. سونىمەن قاتار, قازاقستان پارلامەنتى دەپۋتاتتارى, ينۆەستيتسيا جانە دامۋ مينيسترلىگى وكىلدەرى دە شاقىرىلدى. شەت ەلدەردەن ات تەرلەتىپ كەلگەن مەيماندار قازاقستان تاراپى ۇسىنعان باعدارلامالارمەن تانىستى. سونىمەن قاتار, ەل بيزنەسمەندەرىمەن ارىپتەستىك ورناتۋ جانە ينۆەستيتسيا سالۋ ماسەلەلەرى بويىنشا جان-جاقتى اقپارات الىپ, كەلىسسوزدەر جۇرگىزۋ جوسپارلانعان. ۇيىمداستىرۋشىلاردىڭ ايتۋىنشا, شەتەلدەن كەلگەن كورەي كاسىپكەرلەرى قازاقستان نارىعىنا قىزىعۋشىلىق تانىتىپ, وسىندا جۇمىس ىستەۋگە ىقىلاس تانىتىپتى.
فوتو: 365info.kz
اباي اسانكەلدى ۇلى,
«ەگەمەن قازاقستان»
