كورمەگە لاتىن الىپبيىندە جارىق كورگەن 130 كىتاپ قويىلدى. ولاردىڭ اراسىنان «الىپپەدەن» باستاپ «حيميا», «الگەبرا», «بيولوگيا» كىتاپتارىن, مەكتەپكە قاجەت باسقا دا وقۋ قۇرالدارىن, سونداي-اق, مۇحتار اۋەزوۆ, بەيىمبەت مايلين, سۇلتانماحمۇت تورايعىروۆ, ءسابيت دونەنتاەۆ, ساكەن سەيفۋللين, يسا بايزاقوۆ, وتەباي تۇرمانجانوۆ سىندى اقىن-جازۋشىلاردىڭ كوركەم شىعارمالارىن, بالالارعا ارنالعان ەرتەگىلەردى, «قوزى كورپەش – بايان سۇلۋ», «الپامىس» سىندى ەپيكالىق جىرلاردى ۇشىراستىردىق. جالپى, ۇلتتىق اكادەميالىق كىتاپحانانىڭ كىتاپ قورىندا 1500-دەي لاتىن الىپبيىندە شىعارىلعان كىتاپ بار ەكەن.
شارا بارىسىندا «قازاقستان -2050» جالپىۇلتتىق قوزعالىسى كەڭەسىنىڭ توراعاسى مۇحتار مانكەەۆ كورمەنىڭ كىتاپحانامەن بىرلەسىپ جاسالعان العاشقى شارا ەكەنىن تىلگە تيەك ەتتى. بۇل كورمەنى ەلىمىزدىڭ باسقا دا وبلىستارى ەستافەتا رەتىندە جالعاستىراتىنىنا سەنىم ارتتى.
قوعام قايراتكەرى, فيلولوگيا عىلىمدارىنىڭ دوكتورى, پروفەسسور مىرزاتاي جولداسبەكوۆ لاتىن الىپبيىنە كوشۋ قوعامدا قيىندىق تۋدىرمايتىنىن اتاپ ءوتتى. عالىمنىڭ ايتۋىنشا, لاتىن الىپبيىنە كوشۋ تۋرالى ويلار تاۋەلسىزدىكتىڭ العاشقى جىلدارىنان باستاپ وقتىن-وقتىن ايتىلىپ كەلە جاتىر. سوندىقتان قوعام بۇعان دايىن. ءبىر ماسەلە – لاتىن جازۋىنىڭ ەڭ ىڭعايلى, دۇرىس نۇسقاسىن تاڭداپ الۋ. مىرزاتاي جولداسبەكوۆ سونداي-اق, لاتىن الىپبيىندە قايتا باسىپ شىعاراتىن كىتاپتاردى ىرىكتەۋدە مۇقيات بولۋ كەرەكتىگىن العا تارتتى.
ساياسي عىلىمدار دوكتورى, پروفەسسور كامال بۇرحانوۆ لاتىن الىپبيىنە كوشكەن ەلدەردىڭ تاجىريبەسى 2006 جىلى ەلىمىزدە زەرتتەلگەنىن مالىمدەدى. «2006 جىلى ەلىمىزدەگى 5-6 ينستيتۋتقا اقشا ءبولىنىپ, لاتىنعا كوشكەن ەلدەردىڭ تاجىريبەسىن زەرتتەگەنبىز. تاريح ينستيتۋتى وسى ماسەلەنىڭ تاريحىن زەردەلەدى. وسى ماقساتتا ءبىزدىڭ ءبىر توپ عالىمدار تۇركياعا, ءبىر توبى ازەربايجانعا, ءبىر توبى وزبەكستانعا ىسساپارعا شىقتى. ولار لاتىن الىپبيىنە كوشۋگە بايلانىستى بارلىق ماسەلەلەر بويىنشا زەرتتەۋ جۇرگىزدى. قازىرگى تاڭدا بۇل زەرتتەۋلەر سول كەزدە وسى ماسەلە بويىنشا جۇمىس جاساعان ينستيتۋتتاردا ساقتاۋلى», دەدى عالىم.
ايگۇل سەيىل,
«ەگەمەن قازاقستان»
سۋرەتتى تۇسىرگەن
ورىنباي بالمۇرات
«ەگەمەن قازاقستان»
