وسك توراعاسى بەرىك يماشەۆ جەتەكشىلىك ەتكەن جيىندا ورتالىق سايلاۋ كوميسسياسى الدىمەن «قازاقستان رەسپۋبليكاسى پرەزيدەنتىنىڭ جارلىعىمەن تاعايىندالعان قازاقستان رەسپۋبليكاسى پارلامەنتى سەناتىنىڭ دەپۋتاتتارىن تىركەۋ تۋرالى» قاۋلى قابىلدادى. ال قاتىسۋشىلار نازارىنا قاۋلىنىڭ تولىق جوباسىن ورتالىق سايلاۋ كوميسسياسىنىڭ حاتشىسى باقىت مەلدەشوۆ تانىستىردى.
«قازاقستان رەسپۋبليكاسىنىڭ پارلامەنتى جانە ونىڭ دەپۋتاتتارىنىڭ مارتەبەسى تۋرالى» كونستيتۋتسيالىق زاڭعا سايكەس, تىركەۋدەن سوڭ دەپۋتاتتار ءوز قىزمەتىنە كىرىسەتىن بولادى. سوندىقتان دا ءبىز بۇگىن ەلباسى جارلىقتارىمەن تاعايىندالىپ, تىركەۋدەن وتكەن سەنات دەپۋتاتتارىنا ءتيىستى كۋالىك پەن ومىراۋعا تاعاتىن بەلگىلەرىن رەسمي تۇردە تاپسىرۋدامىز», دەدى بەرىك يماشەۆ.
سودان كەيىن وسك توراعاسى پارلامەنت سەناتى دەپۋتاتتارىنىڭ كۋالىكتەرى مەن ومىراۋعا تاعاتىن بەلگىلەرىن تىركەلگەن دەپۋتات – ساۋلە مۇحانبەديانقىزى ايتپاەۆا مەن ۆلاديمير ۆاسيلەۆيچ ۆولكوۆقا جانە تالعات امانگەلدى ۇلى مۇساباەۆقا ارنايى قۇتتىقتاپ, قىزمەتتىك كۋالىكتەرىن تابىس ەتتى.
ايتا كەتەيىك, 2017 جىلعى 28 ماۋسىمدا ەلىمىزدە قازاقستان رەسپۋبليكاسى پارلامەنتى سەناتىنىڭ دەپۋتاتتارىن سايلاۋ ءوتىپ, بارلىق وڭىرلەردەن جانە استانا, الماتى قالالارىنان 16 دەپۋتات سايلانعان بولاتىن.
نۇرلىبەك دوسىباي,
«ەگەمەن قازاقستان»
