ءبىزدىڭ كەيىپكەرىمىز 2010 جىلدان باستاپ دىنگە بەت بۇردى. بىراق يمان ىزدەگەن البىرت جاستى ارامزالار الداپ سوقتى. تەرىس اعىمنىڭ سوڭى تەرىس باتاعا ۇرىندىرىپ, اقىرى تەمىر تورعا قامالدى. كىم كىنالى؟ نە ءۇشىن؟
ءيا, سولاي. اداسپاس ءۇشىن قىلمىستىق جولعا تۇسپەۋ كەرەك دەيمىز. بىراق ونى اركىم ۇنەمى جادىندا ۇستامايدى. ۇستاسا دا بۇرا تارتاتىندار كوپ. بىرەۋلەر بىلە تۇرا جاماندىق ىسكە بەت بۇرادى.
سوتتالعان اسحات راحمەتوۆ تە كەزىندە سپورتتان ءبىراز جەتىستىكتەرگە جەتىپ, قازاقستان مەن ورتالىق ازيادا دويبىدان چەمپيون اتانعان. الايدا, ايدىڭ-كۇننىڭ امانىندا تەرىس جولعا ءتۇسىپ كەتتى. سول جولدا ءجۇرىپ قىلمىستىق ارەكەتتەرگە قالاي بارعاندىعى, ادام شوشىرلىق قىلمىس جاساعانى, ارتىنان ۇستالىپ وپىنعانى, بىراق ومىرلىك تۇزەلمەس قاتەلىك جىبەرگەنى تۋرالى «قازاقستان» تەلەارناسىنان كورسەتىلگەن «اقيدانىڭ اقىرى» اتتى فيلمدە ەگجەي-تەگجەيلى باياندالادى. وسى ءفيلمدى كورە وتىرىپ, جات يدەولوگيانىڭ باۋىنا شىرمالعان جانداردىڭ وبالى كىمگە دەپ ويلايسىز. بىراق نە ىستەسە دە, قانداي قاتەلىك جىبەرسە دە, ەڭ الدىمەن, ادامنىڭ وزىنە بايلانىستى عوي. سول قاتەلىككە اسحات راحمەتوۆتىڭ ءوزى ۇرىندى. اتالعان فيلم بايانداعان وقيعالارعا كوز جۇگىرتە وتىرىپ, ماسەلەنىڭ بايىبىنا تەرەڭىرەك بويلاي تۇسەمىز. سوندىقتان ۇعىنىقتى بولۋى ءۇشىن فيلم جەلىسىنە كەزەك بەرەيىك.
فيلم بىلتىر اقتوبە قالاسىندا ماۋسىم ايىندا ۇلىق رامازان ايى باستالاردان تۋرا ءبىر كۇن بۇرىن بولعان توبە قۇيقانى شىمىرلاتار سۋىت وقيعادان باستالادى. قاسيەتتى ايدا اقتوبە قالاسىندا ۇيىمداسقان قىلمىستىق توپ تەررورلىق اكت جاسادى. وكىنىشتىسى سول, سىرتتان كەلگەن جاۋ جوق. بوگدە نيەتتىلەردىڭ ايتاعىنا ەرگەن جاستار بەيبىت كۇننىڭ بەرەكەسىن قاشىردى. قولدارىنا قارۋ الىپ, قانىپەزەرلىكپەن قانداستارىن ءولتىردى. قانشاما وتباسى ءبىر كۇندە قارا جامىلىپ, قانشاما انا شاشىن جايىپ اڭىراپ قالدى.
فيلمدە كورسەتىلگەندەي, وتكەن جىلعى قاندى وقيعانى ەسكە الۋ اسحاتقا دا اۋىر تيەتىن كورىنەدى. بولعان وقيعانى ول كۇرسىنە ەسىنە الادى. ءدال 4 ماۋسىم كۇنى تانىستارى – ارمان ايتۋعان مەن دميتري تاڭاتاروۆ وعان الما كەزەك تەلەفون سوعادى. ءبىز شىلدەحانا جاسايىن دەپ جاتىرمىز, ياعني اقيدا – ارابشا, ال قازاقشاسى – شىلدەحانا. تەز كەل دەيدى. اسحات اقتوبەگە اسىعىس اتتانادى.
ساعات تاڭەرتەڭگى 12-گە قاراي اسحات ايتىلعان مەكەنجايعا جەتكەندە شاقىرىلعانداردىڭ الدى-ارتى تولىق جينالىپتى. «ەلۋ, الپىستاي ادام جينالعان ەكەن. ءبىر بولمەلى پاتەر. سىيماعاندار بولدى. كوبىسى دالىزدە تۇردى. قايسىبىرى ءبىر جاققا زۆونداپ جاتتى. بىراق تەلەفونداردى جيناپ الدى. اس ۇيگە الىپ كەتتى. ارتىنان بىزگە سۋ جانە قۇرما بەردى. سودان اۋىز تيدىك. تەلەفون جيناپ العاننان كەيىن جيھاد تۋرالى, سيريا جايىندا ايتىلدى. اۋعانستان, امەريكا تۋرالى ايتىلدى. مەنىڭ تۇسىنۋىمشە, امەريكا پرەزيدەنتىن ايتتى. ولاردىڭ بارلىعى مۇسىلمانداردى ءولتىرىپ جاتىر, تۇرمەگە جاۋىپ جاتىر. توقتاتۋ كەرەك دەگەن ماعىنادا ءسوز بولدى. سوسىن تاڭاتاروۆ ءوزىنىڭ داپتەرىن الىپ ء«ولىم جانە ۇيقى» دەگەن لەكتسيانى وقىدى. سول جەردە قاندى جوسپار تۋرالى ايتىلدى», دەيدى سوتتالعان اسحات راحمەتوۆ.
قاندى جوسپاردى ۇيىمداستىرۋشىلار دميتري تاڭاتاروۆ, ارمان ايتۋعان جانە سۇلتان كابيەۆتىڭ الدىن الا مۇقيات دايىنداعانىنان جينالعانداردىڭ كوبى بەيحابار بولعان. جاماعات ءبىراۋىزدان دميتري تاڭاتاروۆتى سول جەردە ءامىر, ياعني باسشى ەتىپ سايلايدى. بۇلار ءبىر-بىرلەرىن كوبىنە ازان شاقىرىپ قويعان ەسىمدەرىمەن ەمەس, كەيىننەن وزدەرى تاڭداپ العان ارابشا لاقاپ اتتارىمەن اتايدى. سوندىقتان ءدميتريدى بارلىعى ء«ابدۋلمۋميت» دەيدى. سودان كوزى قانتالاعان توپ تال تۇستە ءاليا مولداعۇلوۆا كوشەسىندەگى «پاللادا» قارۋ-جاراق دۇكەنىنە بەت الادى. سوتتالعان ارسەن تاڭاتاروۆ: «ولار ەرتە دايىندالعان. ءدال قارۋ-جاراق دۇكەنىنە جاقىن تۇستان پاتەر جالداعان. ءبارى جۇگىردى, مەن دە ارتتارىنان جۇگىردىم. ۆيدەودا كورىنىپ تۇر. سول 25 ادامنىڭ سوڭىندا ءۇشىنشى بولىپ كەلگەنمىن. كىرىپ بارسام, ءبارى قيراپ جاتىر. ءبىر ادام قان-قان بولىپ جاتىر. سول جاقتاعى بولمەگە بارسام, وندا دا استاڭ-كەستەن. مىلتىق الىپ جاتىر. مەن دە پيستولەت الدىم دا, قايتا ورنىنا قويدىم. سەبەبى, ونى قولدانۋدى بىلمەيمىن. قانداي پاترون سالۋ كەرەك, ونى ومىردە ۇستاپ كورمەگەم. قولىمدا بىرنارسە بولسىن دەپ پىشاقتى الدىم».
«قارۋ-جاراق دۇكەنىن باسىپ العان قىلمىستىق توپ, الدىمەن ساتۋشىنى اتادى. ساتۋشى ءجانتاسىلىم الدىندا دابىلداتقىشتى باسىپ ۇلگەرگەن. دۇكەندى ون مينۋتتاي ويرانداعان ولار قالاعان قارۋلارىن العان. تەررورلىق توپتى تويتارۋ ءۇشىن العاش بولىپ جەتكەن «كۇزەت» قىزمەتكەرلەرىن مۇزداي قارۋلانعان جيىرمادان استام ادام وقپەن قارسى الادى. اتىس كەزىندە «كۇزەتتىڭ» قىزمەتكەرى مەيىرحان تاجىباەۆ وققا ۇشادى. «پاللادا» قارۋ-جاراق دۇكەنىنە جەدەل جەتكەن جاس جىگىتتى تەرروريستەر سول ساتتە-اق جەر جاستاندىردى. بۇل قارۋلى توپتىڭ سوڭعى قۇربانى بولمادى.... وقيعا ورنىنا ىلە-شالا جەتكەن ءۇش پوليتسيا قىزمەتكەرىن دە جارالاعان ەكسترەميستەر بەس قارۋىن سايلاپ, كەلەسى نىسانعا اتتانادى.
سوتتالعان ارسەن تاڭاتاروۆ: «مەن سورەدە جاتقان تراۆماتيكالىق تاپانشانى الدىم. سوسىن ءبارىمىز كوشەگە شىقتىق. ەركەبۇلاندا دا قارۋ بولدى. بىراق ەكەۋمىز دە قارۋىمىزدى تاستادىق. قاسىمداعىلار ۇلكەن ءبىر اۆتوبۋستى توقتاتتى. اۆتوبۋسقا كىرگەن سوڭ, دميتري تاڭاتاروۆ جۇرگىزۋشىنىڭ باسىنا اۆتوماتتى تاقاپ, اسكەري بولىمشەگە قاراي ءجۇر دەپ بۇيىردى».
اۆتوبۋستاعى جولاۋشىلاردى اپىل-عۇپىل تۇسىرگەن تەرروريستەر جۇرگىزۋشىگە ەسەت باتىر كوشەسىندەگى ۇلتتىق ۇلاننىڭ اسكەري بولىمشەسىنە جەدەل جەتكىزۋدى بۇيىرادى. ال قىلمىسكەرلەردىڭ التاۋى بولسا, پوليتسيا قىزمەتكەرلەرىنىڭ كولىگىنە وتىرىپ, «پانتەرا» قارۋ-جاراق دۇكەنىن بەتكە الادى.
اسكەري بولىمشەگە شابۋىل ءساتسىز اياقتالدى. ساربازدار قارۋ-جاراق قويمالارىن دەر كەزىندە جاۋىپ ۇلگەرگەن ەكەن. جان الىسىپ, جان بەرىسكەن اتىس كەزىندە ءۇش اسكەري جاۋىنگەر وققا ۇشىپ, التاۋى جارالاندى. قۇقىق قورعاۋ ورگاندارى قىلمىسكەرلەردى ۇستاۋ ءۇشىن دەرەۋ انتيتەررورلىق شاراعا كىرىستى.
تۋرا ءبىر اپتاعا سوزىلعان ارپالىستا قىلمىسكەرلەر تۇگەل قۇرىقتالدى. انتيتەررورلىق وپەراتسيا بارىسىندا 9 كۇدiكتi ۇستالىپ, 18 ءدىني ەكسترەميستىڭ كوزi جويىلدى. وكىنىشكە قاراي, تەررورشىلاردىڭ قولىنان 3 اسكەري قىزمەتشى مەن 4 بەيبىت تۇرعىن قازا تاپتى. 7 اسكەري قىزمەتشى مەن 12 پوليتسيا قىزمەتكەرى جاراقات الىپ, 40-تاي ادامعا مەديتسينالىق كومەك كورسەتىلدى.
وسىلايشا ەل ءىشىن الاتايداي بۇلدىرگەن تەررورشىلار قازاقستان تاريحىندا بولماعان قاندى قاساپ جاساي جازدايدى. بىراق قاراشا قاۋىمدى قان قاقساتقان جاۋدىڭ الىستان كەلمەگەنى بەلگىلى بولدى. تەررورلىق ارەكەتتى سالافيلىك يدەولوگيانىڭ وكىلدەرى جاساعانى اشكەرە ەتىلدى. وسى وقيعا تۋرالى فيلمدە اقتوبە وبلىسى ءدىن ىستەرى باسقارماسى «اڭسار» اقپاراتتىق-تالداۋ ورتالىعىنىڭ باسشىسى جانداۋلەت سۇلەيمەنوۆ بىلاي دەيدى: «ولاردىڭ اراسىندا ءبىزدىڭ قازاقستان مۇسىلماندارى ءدىني باسقارماسى ۇستاناتىن, ءبىزدىڭ بابالارىمىز ۇستانعان, ءابۋ حانيفا مازھابىن ۇستانعان بىردە-ءبىر ادام بولماعان. جانە ولار سالافيلىك-ۋاحابيلىك باعىتتا جۇرگەن ازاماتتار ەكەندىگىن وزدەرى دە كورسەتتى. دەمەك, بۇل جەردە سالافيزم ماسەلەسى تۇر».
جالپى, بۇگىندە تەرروريستەرگە پسيحوتروپتىق زات بەرۋ ارقىلى اقىلىنان الجاستىرىپ قىلمىس جاساتۋ ءجيى قولدانىلاتىن ادىستەردىڭ ءبىرى. ارنايى ساراپتاما قىلمىسكەرلەردىڭ قان قۇرامىنان قۋاتتى پسيحوتروپتىق زاتتاردىڭ بارلىعىن انىقتاعان. سوتتالعان اسحات راحمەتوۆ: «سوتتا بىلگەنىمدەي سۋ مەن قۇرمانىڭ ىشىندە پسيحوتروپتىق زات بولعان ەكەن. ول سانامىزعا قاتتى اسەر ەتتى. سوندا كەيبىرەۋلەر جىلادى. ءبىز سەزىمگە ەلىتىپ, كوپشىلىكتىڭ سوڭىنان ەرىپ كەتتىك».
ارينە, تەرىس ءدىن جولىنا ءتۇسىپ, جات ەلدەگى سالافيلىك اعىمعا تابىناتىنداردىڭ بۇل ءبىرىنشى قانتوگۋى ەمەس ەدى. 2011 جىلى اقتوبەنىڭ تەمىر اۋدانىنا قاراستى شۇبارشي مەن كەڭقياق اۋىلدارىنداعى قاندى وقيعاعا دا شەت ەلدىڭ ءپاتۋاسى سەبەپ بولعانى ءمالىم. قازىر ءوز الدىمىزعا تاۋەلسىز ەلمىز, ءوزىمىزدىڭ ءدىني باسقارمامىز بار. قازاقستان مۇسىلماندارى ءدىني باسقارماسى جانىنداعى عۇلامالار كەڭەسى سالت-ءداستۇر, ۇلتتىق دۇنيەتانىمعا ساي ءپاتۋالار شىعارىپ كەلەدى. ال سىرتتاعى ءاربىر ايتاققا ەرۋ, بەلگىسىز بىرەۋلەردىڭ ويدان شىعارعان پاتۋاسىماعىن باسشىلىققا الۋ ادامگەرشىلىكتەن اداستىرادى, اۋىر قىلمىسقا اپاراتىندىعىن اڭعارتادى فيلم مازمۇنى. وسى ورايدا قازاقستان مۇسىلماندارى ءدىني باسقارماسىنىڭ توراعاسى, باس ءمۇفتي ەرجان قاجى مالعاجى ۇلى: ء«ار ەلدىڭ ءوزىنىڭ ءپاتۋاسى بار. دەمەك, ءار ازامات ءوز ەلىنىڭ پاتۋاسىمەن عانا ءجۇرۋى كەرەك. قازىر ءوزىڭىز ويلاڭىز, قانشاما يسلام ەلى بار. سونىڭ ءبارى ءپاتۋا شىعارا بەرسە, ءبىز سونى الا بەرسەك نە بولادى؟ سىرت جاقتا تۇرعان قالاعان ادام ءپاتۋاسىن بەرە سالادى. ونىڭ بارىمەن جۇرە بەرۋ مۇمكىن ەمەس. ول بولمايتىن, شاريعاتقا قارسى نارسە».
سونىمەن اقتوبەدەگى ويراندا ورىمدەي جاستاردى ولىمگە يتەرمەلەگەن نە؟ ولاردى بەيبىت جانداردىڭ قانىن مويىنىنا جۇكتەۋگە جەتەكتەگەن كىم؟ بۇل سۇراقتارعا فيلمدە بارىنشا زەردەلەنىپ جاۋاپ قايتارىلادى. ارينە, ونىڭ ءبارىن تىزە بەرۋ مۇمكىن ەمەس. بىراق بۇل ورايدا قازاقستان مۇسىلماندارى ءدىني باسقارماسىنىڭ توراعاسى, باس ءمۇفتي ەرجان قاجى مالعاجى ۇلى بىلاي دەيدى: «اقيدا ماسەلەسى. ءسالافيزمنىڭ ۇستاناتىنى – وسى. ەڭ ۇلكەن قاتەلىگى دە سول. ءتىپتى نامازدىڭ شارتتارىن, باسقا شاريعي نارسەلەردى بىلمەي جاتىپ, ولار اقيدا, اقيدا دەيدى. اقيدا دەگەن ۇلكەن ءىلىم. ولاردىڭ ءدىني ءىلىمى جوق بولعان سوڭ, ونى جوعالتىپ الۋدان قورقادى. ونى وزدەرى جەتە تۇسىنە دە المايدى. ءبىر شارۋا ىستەسە, مەن شيرك ىستەپ قويدىم دەپ قورقادى. بىرەۋ بىردەمە ىستەپ جاتسا, اناۋ شيرك ىستەپ جاتىر دەپ ويلايدى. نەگە دەيسىز بە؟ ويتكەنى وزدەرى شيرك ىستەگەن ادام «كاپىر» ونى ءولتىرۋ كەرەك دەپ ايتىپ قويعاننان كەيىن. بۇل وسىلايشا جالعاسا بەرەدى, جاۋلىققا ۇلاسا بەرەدى...».
اقيدانى العا تارتىپ اداستىرعانداردىڭ باستى قاتەلىگى دە وسى اقيدانى جەتە تۇسىنە الماۋدا ەكەنى راس. اقيدا – ادامنىڭ سەنىم سۇراقتارى مەن قورشاعان دۇنيە جونىندە قالىپتاسقان تانىمى, پىكىرى, ءدىني ۇستانىمدار جيىنتىعى. مۇسىلمان اقيداسىنىڭ ءتۇپ نەگىزى – قۇران مەن سۇننەت. دەمەك, اقيدا – سەنىم. ال سول سەنىمگە سەلكەۋ تۇسىرە وتىرىپ قورقىتۋ, اقيدا ارقىلى اداستىرىپ, توزاق ارقىلى تورعا ءتۇسىرۋ ءدىن اتىن جامىلعان توپتاردىڭ باستى قارۋى. قمدب-نىڭ اقتوبە وبلىسى بويىنشا وكىل يمامى, «نۇر عاسىر» وبلىستىق ورتالىق مەشىتىنىڭ باس يمامى تولەبي وسپان: «مۇنداي قادامعا بۇلار ءبىر عانا ءسوز ارقىلى بىردەن شىعىپ كەتكەن جوق. بۇل جەردە بۇعان دەيىن مەملەكەتكە, قۇزىرلى ورگاننىڭ قىزمەتكەرلەرىنە, يمامدارعا, جالپى قوعامعا دەگەن ىشكى جەككورۋشىلىكتىڭ بەلگىلى ءبىر دارەجەدە قالىپتاسقاندىعىن كورەمىز», دەيدى.
تەررورلىق اكتىگە قاتىسقانداردىڭ كوبى 18 بەن 30 جاس ارالىعىنداعى تەپسە تەمىر ۇزەتىن جىگىتتەر ەدى. اقتوبە وبلىسى ءدىن ىستەرى باسقارماسى «اڭسار» اقپاراتتىق-تالداۋ ورتالىعىنىڭ باسشىسى جانداۋلەت سۇلەيمەنوۆ: «تەرىس باعىتتاعى پيعىلداعى ءدىني يدەولوگيالاردىڭ تاكتيكاسى – جاستاردى قۇرىققا ءتۇسىرۋ. 14 پەن 29 جاس ارالىعىن ءبىز جاستار دەپ ايتامىز. نەگە جاستاردى تاڭدايدى, ويتكەنى جاستار كەز كەلگەن اقپاراتتى بويىنا تەز سىڭىرەدى, ناتيجەسىندە كەلەتىن زالالدارىن ويلاپ جاتپايدى. قىزۋ قاندى, كۇش قايراتى بويىندا تاسىعان. سول سەبەپتى, اقپاراتتى تەز قابىلداپ, سوعان ساي تەز ارەكەت ەتۋگە بەيىم. سوندىقتان دا, جات پيعىلدىلار ولاردىڭ ءدىني ساۋاتسىزدىعىن وسىلاي پايدالانا وتىرىپ, وزدەرىنىڭ دىتتەگەن ماقساتتارى مەن استىرتىن ساياسي يدەولوگياسىن جۇرگىزىپ جاتقانىن ءبىز كورىپ وتىرمىز», دەيدى. بۇل باعىتتا قوعام قايراتكەرى امانكەلدى ايتالى دا: «نەگىزىنەن, ءبىز مۇنى ءوزىمىزدىڭ ىشكى يدەولوگيالىق دامۋىمىزدان ىزدەۋىمىز كەرەك. ءبىزدىڭ ىشكى وسالدىعىمىزدى سىرتقى كۇشتەر جاقسى پايدالانادى. ول راس, سوندىقتان ماسەلە ءالى دە بولسا ءوزىمىزدىڭ ىشكى قوعامدىق قاتىناستارمىزدا, ءوزىمىزدىڭ تاربيەلىك جۇمىسىمىزدا دەپ ويلايمىن», دەيدى.
ال ءفيلمنىڭ ەكىنشى بولىمىندە اداسقان جاستاردىڭ وسى كەزگە دەيىنگى ءومىر جولدارى ايتىلادى. ولاردىڭ جاقسى وقۋ بىتىرگەندەرى, قىزمەتكە تۇرىپ, شاڭىراق كوتەرگەلى جۇرگەندەرى, ءسويتىپ اركىم ءوز ءومىر جولىمەن بەيبىت ءجۇرىپ جاتقانى سۋرەتتەلەدى. بىراق تەرىس اعىمعا اربالعاندىقتان تەرىس جولعا تۇسكەنى سوتتالعانداردىڭ وكىنىشىمەن ايانىشتى سۋرەتتەلەدى.
قاندى وقيعانىڭ باستى ۇيىمداستىرۋشىلارى – دميتري تاڭاتاروۆ پەن ارمان ايتۋعاننىڭ قارجىلىق سەبەپتەرگە بايلانىستى سيرياعا بارا الماي قالعانى بەلگىلى بولدى. سوندىقتان ولار جيھادتى قازاقستاندا جاساۋعا شەشىم قابىلداعان. جالپى, بىلتىرعى جىلعى اقتوبە تەراكتىسىنە قاتىسقانداردىڭ كوبى سيرياعا بارۋعا ۇگىتتەلگەندەر. راديكال اعىمنىڭ ىقپالىمەن ۇيىمداسقان قىلمىستىق توپتىڭ قاتارىنا قوسىلعاندار وپىق جەپ, كوزدەرىنەن قاندى جاس اعۋدا. ولار ەندى الداۋ مەن ازعىرۋعا وزگەلەردىڭ دە ەرىپ, وزەكتەرى ورتەنبەگەنىن قالايدى. اقتوبە وقيعاسىنان سوڭ تەرروريزممەن كۇرەس كۇشەيدى. زاڭ قاتايتىلدى. ءتىپتى شەتەلگە «جيھاد» دەگەن جەلەۋمەن كەتكەندەر ازاماتتىقتان ايىرىلادى. وسىلايشا اتالعان فيلمدە تاۋەلسىزدىكتىڭ شيرەك عاسىرلىق مەرەيتويىنا سالافيلىك اعىم وكىلدەرىنىڭ جاساعان قارالى «تارتۋى» قازاق تاريحىنا قارا ارىپتەرىمەن جازىلىپ قالعانى بايان ەتىلەدى. ەندى بۇدان بىلاي مۇندايعا جول بەرمەۋ ءۇشىن راديكال توپ وكىلدەرىمەن اشىق سۇحباتتار جۇرگىزىپ, اعارتۋ جۇمىستارىن جانداندىرۋ كەرەكتىگى باسا ايتىلادى. ويتكەنى, لاڭكەستىكپەن تىرەستە, راديكال اعىمدارمەن كۇرەستە تۇتاس قوعام بولىپ جۇمىلا كىرىسكەندە عانا ءبىر ناتيجەگە جەتۋگە بولادى. سوندىقتان دا قوعام قايراتكەرى امانكەلدى ايتالى: «بۇل پوليتسيانىڭ ماسەلەسى ەمەس, ەلدىڭ ماسەلەسى, اقتوبەنىڭ ماسەلەسى ەمەس, قازاقستاننىڭ ماسەلەسى. سەبەبى, سول قاندى قاقتىعىسقا قىزىلوردانىڭ دا, كوشەتاۋدىڭ دا بالالارى, جىگىتتەرى قاتىستى. تۇتاس ۇلتتىڭ ماسەلەسى...», دەگەندى اشىق ايتادى. دەمەك, اتالعان ءفيلمنىڭ ادامدارعا, جاستارعا بەرەر تاعىلىمى كوپ. فيلم قوعامدى ساقتاندىرادى, ادامدارعا اداسپاۋعا جول كورسەتەدى, جاستارعا اق پەن قارانى ايىرۋعا باعىت بەرەدى.
الەكساندر تاسبولات,
«ەگەمەن قازاقستان»
