قوس بوكسشى جەكپە-جەك باستالا سالا قارسىلاسىن تۇقىرتىپ الۋ ءۇشىن كۇرزى جۇدىرىقتارىن اياعان جوق. كەلەسى كەزەڭدە ولجاس سىلتەگەن سوققىلار نىساناعا ءدوپ ءتيىپ, تويراكتى ەسەڭگىرەتىپ تاستادى. دىمى قۇرىعان يواندي قايتا-قايتا بوقاەۆتى قۇشاقتاپ, ويىن ءتارتىبىن بۇزۋمەن بولدى. كۋبالىقتىڭ قۋلىعىن دەر كەزىندە بايقاعان تورەشى ءۇشىنشى راۋندتا تويراكقا ەسكەرتۋ جاساعان. كەزدەسۋدىڭ قالعان بولىگىندە ايقىن باسىمدىلىققا يە بولعان ولجاس قارسىلاسىن 3:0 ەسەبىمەن تىزە بۇكتىردى.
نەگىزى ولجاستىڭ قارسىلاسىنا قاراعاندا حالىقارالىق ارەناداعى تاجىريبەسى ازداۋ. ول بيىل ەكى كەزدەسۋ وتكىزىپ, ءبىر رەت جەڭسە, ءبىر رەت ۇتىلعان. يواندي دا بيىلعى جوبادا كوپ رينگكە شىعا قويماعان-دى. ايتسە دە, جاس «ارلان» تاجىريبەلى «قابىلاندى» قاپى قالدىردى.
دۇنيەجۇزىلىك بوكس سەرياسىنىڭ (WSB) جەتىنشى ماۋسىمداعى فينالدىق جەكپە-جەگى ءدال قازىر استاناداعى «قازاقستان» سپورت كەشەنىندە ءوتىپ جاتىر. ازىرگە 5:3 ەسەبىمەن كۋبالىقتار الدا كەلەدى.
